މާލެ ސިޓީ ކައުންސިލްގެ މަސައްކަތްތަކާ ގުޅޭ ގޮތުން މަޝްވަރާ ކުރުމަށް އެ ކައުންސިލުން އިއްޔެ ލޯކަލް ޖަވަމެންޓް އޮތޯރިޓީ (އެލްޖީއޭ) އާއެކު ބައްދަލުވުމެއް ބާއްވައިފި އެވެ.
އިއްޔެ ބޭއްވި އެ ބައްދަލުވުމުގައި މާލެ ސިތީ ކައުންސިލްގެ މޭޔަރު ޑރ. މުހައްމަދު މުއިއްޒު އާއި އެލްޖީއޭގެ ސީއީއޯ އަފްޝަން ލަތީފް ވެސް ބައިވެރިވެވަޑައިގެންނެވި އެވެ.
އެލްޖީއޭން ބުނީ އެ ބައްދަލުވުމަކީ ސިޓީ ކައުންސިލުގެ މަސައްކަތްތަކާއި ކައުންސިލަށް ދިމާވާ ދަތިތަކާއި އަދި އެހީތެރިކަން ބޭނުންވާ ކަންކަމާ ގުޅޭގޮތުން ބޭއްވި ބައްދަލުވުމެއް ކަމަށެވެ.
އެ ބައްދަލުވުމާ ގުޅިގެން އަފްޝަން ވިދާޅުވީ މަޝްވަރާ ކުރި ކަންކަމަށް އަވަސް ހައްލެ ހޯދުމަށް މަސައްކަތް ކުރައްވާނެ ކަމަށެވެ.
އެލްޖީއޭން މާލެ ސިޓީ ކައުންސިލާއެކު ބައްދަލުވުމެއް ބާއްވާފައި ވާއިރު، މާލެއިން 1000 ޕާކިން ސްލޮޓް އަމިއްލަ ފަރާތްތަކަށް އުޅަނދުގެ އުމުރު ދުވަހަށް ވިއްކުމަށް ސިޓީ ކައުންސިލުން ނިންމި ނިންމުން ފަސްކުރަން އެލްޖީއޭ އިން އަންގައިފައި ވަނީ މިދިޔަ ބުދަ ދުވަހު އެވެ.
މާލެ ސިޓީ ކައުންސިލު އިދާރާއިން އަމިއްލަ ފަރާތްތަކަށް ބިން ވިއްކުމަށް ނިންމާ އެކަމުގެ އަމަލީ މަސައްކަތް ކައުންސިލުން ކުރިއަށް ގެންދާކަމުގެ ޝަކުވާ ލިބޭތީ އެކަން ކައުންސިލުން ކުރަނީ ބިމާ ބެހޭ ގާނޫނާއި އެ ގާނޫނުގެ ދަށުން އެކުލަވާލާފައިވާ ގަވާއިދުތަކާ އެއްގޮތަށް ނޫން ކަމަށް ފާހަގަކުރާ ކަމަށް ވެސް އެ އޮތޯރިޓީން ބުނެފައިވެ އެވެ.
