ލަންޑަން، އިނގިރޭސިވލާތް (ފެބްރުއަރީ 10) - އިނގިރޭސި ވަލީ އަހުދު އަމީރު ޗާލްސް ދެ ވަނަ ފަހަރަށް ކޮވިޑަށް ޕޮޒިޓިވްވެފައިވާ ކަމަށް އެމަނިކުފާނުގެ އޮފީހުން ބުނެފި އެވެ.
"ވޭލްސްގެ އަމީރު ކޮވިޑަށް ޕޮޒިޓިވްވެއްޖެ. އެމަނިކުފާނު މިހާރު ހުންނެވީ އެކަހެރިވެގެން،" ޗާލްސްގެ ރަސްމީ ޓްވިޓާ އެކައުންޓް މެދުވެރިކޮށް އިއުލާނު ކުރި އެވެ.
"މިއަދު ވިންޗެސްޓާގައި އޮތް ހަރަކާތްތަކުގައި ބައިވެރިނުވެވޭތީ އެމަނިކުފާނު ހިތާމަ ކުރައްވާ. ވީ އެންމެ އަވަހަކަށް ވިންޗެސްޓާގެ ޒިޔާރަތް އަލުން ޝެޑިއުލް ކުރެވޭތޯ އެމަނިކުފާނު ބައްލަވާނެ."
ބުރާސްފަތި ދުވަހު ވިންޗެސްޓާގައި ރާވާފައިވާ އޮތް ހަރަކާތަކީ ސްޓެޗޫއެއް އާއްމުކޮށް ދައްކާލުމަށް ރޭވި ހަރަކާތެކެވެ.
މީގެ ކުރިން މާޗް 2020 ވަނަ އަހަރު ވެސް އުމުރުފުޅުން 73 އަހަރުގެ ޗާލްސް ކޮވިޑަށް ޕޮޒިޓިވްވި އެވެ. އެ ފަހަރު ވެސް އެމަނިކުފާނު އައިސޮލޭޝަންގައި އެއް ހަފްތާ ހޭދަކުރެއްވި އެވެ.
ޗާލްސް އާއި މަންމާފުޅު ރާނީ އެލިޒަބަތު ދެ ވަނަ އެންމެ ފަހުން ސީދާ ބައްދަލުވެވަޑައިގެންނެވި އިރެއް ވަލީ އަހުދުގެ އޮފީހުން ހާމައެއް ނުކުރެ އެވެ.
ނަމަވެސް އުމުރުން 95 އަހަރުގެ ރާނީއަށް ދާދި ފަހުން ކުރިމަތިވެވަޑައިގެންނެވި ގިނަ ސިއްހީ މައްސަލަތަކާ ހެދި، ރަސްމީ ޒިންމާތައް އަދާ ނުކުރައްވާ ގިނަ ދުވަސްތަކެއް ހޭދަވި އެވެ.
ރަސްމީ ޒިންމާތައް އަދާކުރެއްވުމަށް ރާނީ އެނބުރި ވަޑައިގެންފައިވާ އިރު، މި ހަފްތާގައި އޮތް ހަރަކާތްތަކަކީ އެކަމަނާގެ ރާނީކަމަށް 70 އަހަރު ފުރުން ފާހަގަކުރަން ފެށި ކަންކަމެވެ.
ޗާލްސްއަށް ދެ ވަނަ ފަހަރަށް ކޮވިޑް ޖެހިފައިވާ އިރު، ބުދަ ދުވަހު ބްރިޓިޝް މިޔުޒިއަމް ފޯ ދަ އޭޝިއަން ޓްރަސްޓްގެ ހަފްލާއެއްގައި އެމަނިކުފާނު ބައިވެރިވެވަޑައިގެންނެވި އެވެ.
އެ ހަފްލާގައި ފިނޭންސް މިނިސްޓަރު ރިޝީ ސުނަކް އާއި ހެލްތު މިނިސްޓަރު ސާޖިދު ޖާވިދް އަދި އިންޓީރިއާ މިނިސްޓަރު ޕްރިޓީ ޕަޓޭލް ބައިވެރިވެވަޑައިގެންނެވި އެވެ.
ކޮވިޑް ޖެހުނުކަން ވަލީ އަހުދުގެ އޮފީހުން ކަށަވަރުކޮށްދިން ނަމަވެސް، އެމަނިކުފާނުގެ ސިއްހީ ހާލުކޮޅާ ބެހޭ ގޮތުން އެއްވެސް އެއްޗެއް ހާމައެއް ނުކުރެ އެވެ.
