ލޯކަލް ޓޫރިޒަމްއާ އެކު އއ. އުކުޅަސް ފަރިވެ ފޮޅިފައި އޮތަސް، ރަށަށް ގެންނަން ޖެހޭ އުމްރާނީ ތަރައްގީއާ މެދު ސަރުކާރާއި ކައުންސިލުން ހަނދާން ނައްތައެއް ނުލަ އެވެ. ހާއްސަކޮށް މި ދުވަސްވަރު އެވެ. ކައުންސިލުގެ ރައީސް ޝައުކަތު އިބްރާހީމް (މަނިކު) "އަދަދު" އަށް ވިދާޅުވި ގޮތުގައި އުމްރާނީ ތަރައްގީގައި މިދުވަސްކޮޅަކީ އީދެއް ކަމަށެވެ.
"ކައުންސިލްގެ ރައީސްގެ ގޮތުގައި މިވީ 13 އަހަރުގެ ތެރޭގައި އެންމެ ބާރަށް އުމްރާނީ ތަރައްގީ ކުރިއަށްދާ އަހަރަކީ އަޅުގަނޑަށް ދެންނެވިދާނެ ހަގީގަތުގައި މި އަހަރުތަކޭ (2022/2021). މިވަގުތު ވެސް ވަރަށް ބޮޑެތި ބިޔަ ޕްރޮޖެކްޓްތައް މިރަށުގައި ކުރިއަށް އެބަދޭ،" ޝައުކަތު ވިދާޅުވި އެވެ.
"އަދި ކުރިއަށް އޮތް ކުޑަ ދުވަސްކޮޅެއްގެ ތެރޭގައި ވަރަށް ބޮޑެތި އިތުރު ޕްރޮޖެކްޓްތައް މިރަށުގައި ފެށިގެންދާނެ ކަމަށް އަޅުގަނޑުމެން މި ބަލަނީ."
އުކުޅަސް ރައްޔިތުން މިހާރު އެންމެ ބޮޑު އުއްމީދެއް ކުރަމުން އަންނަނީ ރަށުގެ ފަޅުން ބަޔެއް ހިއްކައި ބިން ބޮޑުކުރުމުގެ ޕްރޮޖެކްޓަށެވެ. "ފޭސް 2" ގެ ނަން ދީފައިވާ އެ ސަރަހައްދު ހިއްކުމަށް އިން ކަނޑައެޅުމުގެ މަސައްކަތް މިހާރު ކުރިއަށް އެބަދެ އެވެ.
ޑިސެމްބަރު 2022 ގައި ސޮއިކުރެވުނު މި ޕްރޮޖެކްޓް އެކިއެކި ސަބަބުތަކާ ހުރެ ލަސްވި ނަމަވެސް ޝައުކަތު އުއްމީދުކުރައްވާ ގޮތުގައި އެ މަސައްކަތް މި އަހަރު ނިމި އަންނަ އަހަރުގެ ތެރޭގައި ބިން ބޭނުންކުރެވެން ފެށޭނެ އެވެ.
"ބިން މުޅިން ނުހިއްކުނަސް މިއަހަރުގެ ތެރޭގައި އަޅުގަނޑުމެން ބިމުގެ ލޭންޑް ޔޫޒް ޕްލޭނާ ބިމުގެ ޑިވެލޮޕްމެންޓް ޕްލޭނާއި އާބަން ޕްލޭން ވެސް ހަދާނަން. އަދި ބިންތައް އެކިއެކި ގޮތްގޮތަށް ތަރުތީބުކުރުމުގެ މަސައްކަތްތައް އަޅުގަނޑުމެން ކުރާނަން،" ޝައުކަތު ވިދާޅުވި އެވެ.
"އެއީ ވަރަށް ބޮޑު ބިޔަ ޕްރޮޖެކްޓެއް. އަދި މިރަށުގެ ރައްޔިތުންނަށް، ޒުވާނުންނަށް އެންމެ މުހިއްމު ވެސް އެއް ޕްރޮޖެކްޓް އެ ޕްރޮޖެކްޓަކީ."
އއ. އުކުޅަސް
އެކާވީސް ހެކްޓަރުގެ އުކުޅަށް އިތުރުކުރެވޭ ބިމުގެ ބޮޑުމިނަކީ 14 ހެކްޓަރެވެ. އަދި 100 ގޯއްޗަށް ވުރެ މަދުނުވާނެ ގޮތަކަށް ގޯތިދޫކުރަން ވެސް ވަނީ ރާވައިފަ އެވެ. އަލަށް ހިއްކާ ބިމުގައި ޓޫރިޒަމް ޒޯނެއް ހަދަން ވެސް ވަނީ ޕްލޭންކޮށްފަ އެވެ. ކައުންސިލުން ރާވާފައި އޮތީ އެ ސަރަހައްދުން ބިން ވިއްކުމަށެވެ. އެއީ 12 ބިމެކެވެ.
"އެ ބިންތަކަށް އަޅުގަނޑުމެން މި ބަލަނީ ރަނގަޅު އިންވެސްޓްމަންޓްތައް އަންނާނެކަމަށް. އެއާ އެކީގައ ރަށުގެ ޓުއަރިޒަމް ކުރިއަށް އޮތް ތާނގައި ވަރަށް ބޮޑުތަން ފުޅާވެގެން ދާނެކަމަށް އަޅުގަނޑުމެން ދެކެނީ،" ޝައުކަތު ވިދާޅުވި އެވެ.
އުކުޅަހުގައި އޮންނަ ދެ ބަނދަރު ވެސް އަޕްގްރޭޑްކުރަން ސަރުކާރުން ވަނީ ބަޖެޓް ހަމަޖައްސައިދީފަ އެވެ. އޭގެ ތެރެއިން އެއް ބަނދަރުގެ އަޕްގްރޭޑިން މަސައްކަތުގެ 95 ޕަސެންޓް މިހާރު ވަނީ ނިމިފަ އެވެ. ކައުންސިލުން މިހާރު ތައްޔާރުވަމުން އަންނަނީ ދެ ވަނަ ބަނދަރުގެ އަޕްގްރޭޑިންގެ މަސައްކަތަށެވެ.
މީގެ އިތުރުން ރަށުގެ ސްކޫލްގެ 12 ކްލާސްރޫމާއި މަލްޓިޕާޕާސް ހޯލުގެ މަސައްކަތްތައް ކުރިއަށްދޭ އެބަ ދެ އެވެ. އަދި އިންޖީނުގޭގެ ގޯތީގައި އާ އިންޖީނުގެއެއް އިމާރާތް ކުރުމުގެ މަސައްކަތް ވެސް ކުރިއަށް އެބަދެ އެވެ. ސާފު ބޯފެން ފޯރުކޮށްދިނުމަށްޓަކައި ސްޓެލްކޯ އިން ވެސް އަންނަނީ ބޮޑު ޕްރޮޖެކްޓެއް ހިންގަމުންނެވެ. އަދި މަގު ހެދުމަށް ވެސް ސަރުކާރުން ވަނީ ބަޖެޓްކޮށްފަ އެވެ.
"އަދި ހަމަ އެހެންމެ މިއަހަރުގެ ތެރޭގައި، އަޅުގަނޑަށް މައުލޫމާތު ލިބިފައި އޮތް ގޮތުން ވެއްޖިއްޔާ، މިރަށުގެ މިނީ ހޮސްޕިޓަލްގެ ޓެންޑާ އޯޕަން ކުރެވޭނެ،" ޝައުކަތު ވިދާޅުވި އެވެ.
ޒުވާނުންނަށް އުފާވެރި ހަބަރުތަކެއް ވެސް ޝައުކަތު ދެއްވި އެވެ. އެގޮތުން ސްޕޯޓްސް މިނިސްޓްރީން އަންނަނީ ރަށުގެ ބޯޅަ ދަނޑުގައި ޓާފް އެޅުމާއި ލައިޓް ޖެހުމުގެ މަސައްކަތް ކުރަމުންނެވެ. މީގެ އިތުރުން މާލެ ފިޔަވައި ރާއްޖޭގައި އަޅާ މަލްޓި ސްޕޮޓްސް ކޮމްޕްލެކްސްތަކުގެ ތެރެއިން އެއް ތަން މި ރަށުގައި އެޅުމަށްޓަކައި ޓެންޑާ އަށް އޮތީ ހުޅުވާލައިފަ އެވެ.
"އެއީ ވަރަށް ފުރިހަމައަށް، އިންޓަނޭޝަނަލް މުބާރާތްތައް ވެސް ބޭއްވޭ ފެންވަރަށް ތަރައްގީކުރެވިގެންދާ ތަނެއް،" ޝައުކަތު ވިދާޅުވި އެވެ.
