ރާއްޖޭގައި ދީނީ ގޮތުން ހައްދުފަހަނަ އަޅައިދިއުން ހުއްޓުވުމުގައި މައްކާގެ ރާބިތަތުލް އާލަމިލް އިސްލާމިއްޔާގެ އެހީތެރިކަމަށް ރައީސް އިބްރާޙިމް މުހައްމަދު ސޯލިހް މިއަދު އެދިވަޑައިގަނެފި އެވެ.
ރާއްޖެ ވަޑައިގެން އުޅުއްވާ އެ ޖަމިއްޔާގެ ސެކްރެޓަރީ ޖެނެރަލް ޝައިހް ޑރ. މުހައްމަދު ބިން އަބްދުލްކަރީމް އަލް އީސާ ރައީސް ސޯލިހުގެ އަރިހަށް އިހްތިރާމްގެ ޒިޔާރާތެއް މިއަދު ކުރެއްވުމާ އެކު، އޭނާއަށް ނިޝާން ކަލާފާނުގެ ޝަރަފު އެމަނިކުފާނު އެރުއްވި އެވެ. އެއީ އިސްލާމީ ވަހުދަތު ދެމެހެއްޓުމަށްޓަކައި އެ ޖަމިއްޔާއިން ކުރަމުންދާ މަސައްކަތުގެ އަގުވަޒަން ކުރުމުގެ ގޮތުންނެވެ.
ދެ ބޭފުޅުންގެ މެދުގައި ދެކެވުނު ބައެއް ވާހަކަތައް ހިއްސާކުރަމުން ރައީސް އޮފީހުުން ބުނީ ދީނީ ގޮތުން ހައްދުފަހަނައަޅައިދިއުން ހުއްޓުވުމަށްޓަކައި ރާއްޖޭގެ ތައުލީމީ މަންހަޖު އިސްލާހު ކުރުމުގެ މަޝްވަރާތައްވެސް ކުރެވުނު ކަމަށެވެ.
"...ރާއްޖޭގައި ދީނީ ގޮތުން ހައްދުފަހަނަ އަޅައިދިއުން ހުއްޓުވުމަށް ތައުލީމީ މަންހަޖުގެ ތެރޭގައި އިސްލާމީ ސައްހަ އަގީދާ ހިމެނުމާއި، ދިވެހިންގެ މެދުގައި އިސްލާމީ އަގީދާ އަށަގެންނެވުމަށްޓަކައި ދީނުގެ ކަންކަމުގެ ހަގީގަތް އޮޅުން ފިލުވަދިނުމުގައި ރާބިތާގެ އެހީތެރިކަމަށް (ރައީސް ސޯލިހް) އެދިވަޑައިގެން،" ރައީސް އޮފީހުން މީޑިޔާތަކަށް މައުލޫމާތު ދިނުމަށް ނެރުނު ނޫސްބަޔާނުގައި ވެއެވެ.
ރާބިތާގެ ސެކްރެޓަރީ ޖެނެރަލް ވިދާޅުވި ގޮތުގައި ރައީސް ސޯލިހަކީ ބައިނަލްއަގްވާމީ މުޖްތަމައުގައި ގަދަރު ލިބިވަޑައިގެންފައިވާ ބޭފުޅެކެވެ.
މިއަދު އޭނާއަށް ނިޝާން ކަލާފާނުގެ ޝަރަފުގެ އިއްޒަތް އެރުވީ ރާއްޖެ އާއި ރާބިތަތުލް އާލަމިލް އިސްލާމީއާ ދެމެދު އުފެދިފައިވާ އިސްލާމީ އުހުއްވަތްތެރިކަމުގެ ގުޅުން ބަދަހިކުރުމަށާއި، އިސްލާމީ ވަހުދަތު ދެމެހެއްޓެވުމަށާއި، ދުނިޔޭގައި އަމާންކަމާއި ސުލްހަމަސަލަސްކަން ގާއިމުކުރުމަށް ދެއްވާ ހާއްސަ އަހަންމިއްޔަތުކަމުގެ އަގު ވަޒަންކުރުމުގެ ގޮތުން ކަމަށް ރައީސް އޮފީހުން ބުންޏެވެ.
ނިޝާން ކަލާފާނުގެ ޝަރަފުގެ އިއްޒަތް، ނިސްބަތް ވަނީ މީލާދީން 1585 އިން 1609 އަށް ރާއްޖޭގައި ރަސްކަން ކުރެއްވި އައްސުލްތާން އިބްރާހީމް ކަލާފާނަށެވެ.
މި ދަތުރު ފުޅުގައި ސައުދީގެ ވަފުދު، ރައީސްގެ އިތުރުން އިސްލާމިކް މިނިސްޓަރު ޑރ. އަހުމަދު ޒާހިރާއި ޑިފެންސް މިނިސްޓަރު މާރިޔާ އަހުމަދު ދީދީއާ ވެސް ބައްދަލުކުރައްވާ ގޮތަށްވެސް ވަނީ ހަމަޖެހިފަ އެވެ.
