ލަންޑަން، އިނގިރޭސިވިލާތް (ފެބްރުއަރީ 6) - ރާނީ އެލިޒަބަތު ދެ ވަނަ އެ މަގާމު ފުރުއްވާތާ 70 އަހަރު ފުރުން އާދީއްތަ ދުވަހު ފާހަގަކުރަމުންދާ އިރު، ކުރިއަށް އޮތް ތަނުގައި ކުއީން ކޮންސޯޓް ނުވަތަ ރާނީއެއްގެ ލަގަބު ކެމިލާއަށް އަރުވަން ބޭނުންފުޅުކަން ހާމަކުރައްވައިފި އެވެ.
ކެމިލާއަކީ ވަލީއަހުދު އަމީރް ޗާލްސްގެ އަނބިކަނބަލުންނެވެ. ގައުމާ މުހާތަބުކޮށް ފޮނުއްވި ބަޔާނެއްގައި ރާނީ ވިދާޅުވީ ކެމިލާއަށް ކުއީން ކޮންސޯޓްގެ ލަގަބު އަރުވަން ބޭނުންފުޅު ކަމަށެވެ. އެހެންކަމުން، ރާނީއަށް ފަހު އިނގިރޭސި ރަސްކަމުގެ ކަންކަން ކުރިއަށް ގެންދަވާނެ ގޮތްތައް ރާވަމުންދާކަން ހާމަވެ އެވެ.
ޗާލްސް އާއި ކެމިލާ ކައިވެނި ކުރެއްވީ 2005 ވަނަ އަހަރު އެވެ. ކެމިލާއަށް ރާނީއެއްގެ ދަރަޖަ ދެއްވަން ރާނީ ބޭނުންފުޅުވާތީ، އެކަމުން ދޭހަވަނީ ކެމިލާއާ މެދު އުުރުން 95 އަހަރުގެ ރާނީގެ ހިތްހަމަޖެހުން ކަމަށް އެނެލިސްޓުން ބުނެ އެވެ.
ރާނީގެ ޕްލެޓިނަމް ޖުބިލީ ފާހަގަކުރުމުގެ ގޮތުން އަންނަ ޖޫން މަހު ހަތަރު ދުވަސް ވަންދެން އިނގިރޭސިވިލާތުގައި އެކި ހަރަކާތްތައް އޮންނާނެ އެވެ. އަސްކަރީ ޕެރޭޑަކާއި، މިއުޒިކް ކޮންސެޓެކާއި، މަގުމަތީގެ ޕާޓީތަކާއި، މުޅި ގައުމުގައި ބާއްވާ މެންދުރުގެ ބޮޑު ކެއުމަކާއި، ޕުޑިން މުބާރާތެއް ހިމެނެ އެވެ.
އެ ހަރަކާތްތައް އޮންނާނީ 1953 ވަނަ އަހަރުގެ ޖޫން މަހު ރާނީގެ މަސްއޫލިއްޔަތާ ހަވާލުވެވަޑައިގެންނެވި ދުވަހާ ދިމާކޮށެވެ. އުމުރުން އެންމެ 25 އަހަރުގައި ރާނީކަމާ އެކަމަނާ ހަވާލުވެވަޑައިގެންނެވީ ފެބްރުއަރީ 6، 1952 ވަނަ އަހަރު ބައްޕާފުޅު، ރަސްގެފާން ޖޯޖް އަވަހާރަވުމުންނެވެ.
