ސްރީނަގަރް، އިންޑިއާ (ފެބްރުއަރީ 5) - އިންޑިއާއިން ކޮންޓްރޯލް ކުރާ ކަޝްމީރު ސަރަހައްދުގައި މަސައްކަތް ކުރާ މަގްބޫލް ނޫސްވެރިޔަކު ފުލުހުން ހައްޔަރުކޮށްފި އެވެ.
ކަޝްމީރް ވައްލާ ނިއުސް ޕޯޓަލްގެ އެޑިޓަރު ފަހަދް ޝާހްއަށް ތުހުމަތު ކުރަނީ "ޓެރަރިޒަމަށް ހިތްވަރު ދިނުމާއި ފޭކު ހަބަރު ފެތުރި" ކަމަށެވެ. މީގެ ކުރިން އެތައް ފަހަރެއްގެ މަތިން އޭނާ ފުލުހަށް ހާޒިރުކޮށް ސުވާލުކޮށްފައިވެ އެވެ.
ފުލުހުން ނެރުނު ބަޔާނެއްގައި ބުނީ ފޭސްބުކްގައި ޝާހް ކުރާ ޕޯސްޓުތަކުގެ ސަބަބުން ފުލުހުންނާއި ސަލާމަތީ އިދާރާތަކުގެ އަގު ވެއްޓެމުންދާ ކަމަށެވެ.
ކޮމިޓީ ޓު ޕްރޮޓެކްޓް ޖާނަލިސްޓްސް އިން އޭނާ މިނިވަން ކުރަން ގޮވާލާފައިވާ އިރު، ކަޝްމީރުގައި ނޫސްވެރިކަމުގެ ހައްގަށް އިހްތިރާމް ކުރުމަށް އިންޑިއާއަށް ބާރު އެޅި އެވެ.
"ޝާހް ހައްޔަރު ކުރުމުން ފެންނަނީ އިދާރާތަކުން ނޫސްވެރިކަމުގެ މިނިވަންކަމަށް އިހްތިރާމް ނުކުރާ މިންވަރާއި، ނޫސްވެރިންނަށް މިނިވަންކަމާއި ރައްކާތެރިކަމާ އެކު މަސައްކަތް ކުރުމުގެ ހައްގު ނެތްކަން،" އެ ޖަމިއްޔާއިން ބުންޏެވެ.
ކަޝްމީރުގެ ނޫސްވެރިން ފުލުހަށް ހާޒިރުކޮށް ސުވާލު ކުރުމަކީ 2019 ވަނަ އަހަރުގެ ފަހުން އާއްމު ކަމެކެވެ. އެ އަހަރު އިންޑިއާ ސަރުކާރުން ވަނީ ކަޝްމީރުގައި އަމިއްލަ ވެރިކަމެއް ހިންގަން ދީފައި އޮތް ހައްގު އަތުލައި، ސީދާ އިންޑިއާ ސަރުކާރުގެ ބާރުގެ ދަށަށް ގެންގޮސްފަ އެވެ.
އޭގެ ފަހުން ޓެރަރިޒަމްގެ ތުހުމަތުގައި ނޫސްވެރިންނަށް ބިރު ދައްކައި، ހައްޔަރުކޮށް، ދައުވާ ކުރުން ދަނީ އިތުރުވަމުންނެވެ. ދާދި ފަހުން ކަޝްމީރުގެ ޕްރެސް ކްލަބް ވެސް ސަރުކާރުން ވަނީ އުވާލާފަ އެވެ.
އިނގިރޭސީންގެ އަތުން 1947 ވަނަ އަހަރު މިނިވަންކަން ލިބުނު ފަހުން ކަޝްމީރް އޮންނަނީ އިންޑިއާ އާއި ޕާކިސްތާނަށް ދެ ބަޔަކަށް ބަހާލާފަ އެވެ. ނަމަވެސް ދެ ގައުމުން ވެސް ބޭނުން ވަނީ ކަޝްމީރު އެއްކޮށެވެ.
އިންޑިއާއިން ކޮންޓްރޯލް ކުރާ ކަޝްމީރުގައި އުޅޭ ގިނަ ބަޔަކު މިނިވަންކަން ބޭނުންވެ އެވެ. އޭގެ އިތުރުން ޕާކިސްތާނުގެ ބައެއްގެ ގޮތުގައި އޮންނަން ބޭނުންވާ މީހުން ވެސް ވަރަށް ގިނަ އެވެ.
އެ ސަރަހައްދުގައި ބައި މިލިއަން އިންޑިއާ ސިފައިން އުޅޭ އިރު، ދޭތެރެ ދޭތެރެއިން އުފެދޭ ހަމަނުޖެހުންތަކުގައި މިހާތަނަށް އެތައް ހާސް ބަޔަކު މަރުވެފައިވެ އެވެ.
