އަންނަ މޭ މަހުން ފެށިގެން ހުރިހާ ޓީޗަރުންނާއި ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުވާނެ ކަމަށާއި އެ ބަދަލާއެކު ގްރެޖުއޭޓް ލެވެލްގެ ސެކަންޑްރީ ޓީޗަރަކަށް އިތުރު ގަޑިއާ ނުލައި ހަމަ އެކަނި މުސާރައިގެ ގޮތުގައި 19،740ރ. ލިބޭނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީސް މިއަހަރަށް ހުޅުވަން މިއަދު ބޭއްވި ޖަލްސާގައި އިއްވެވި މި އަހަރުގެ ރިޔާސީ ބަޔާނުގައި ރައީސް ސޯލިހު ވިދާޅުވީ އަންނަ މޭ މަހުން ފެށިގެން ޓީޗަރުންގެ މުސާރަ ބޮޑުވާއިރު ލިބިގެންދާނީ 56 ޕަސެންޓްގެ ކުރިއެރުމެއް ކަމަށެވެ. ޓީޗަރުންގެ މުސާރަ ބޮޑު ކުރުމަކީ އެމަނިކުފާނުގެ ރިޔާސީ ވައުދެކެވެ.
"ގައުމު ބިނާކުރުމުގެ އެންމެ ބުރަ މަސްއޫލިއްޔަތު އަދާކުރަނީ ، ދަރިން ބިނާކުރާ އެދުރުން. އެމީހުންނަށް އެކަށީގެންވާ އުޖޫރައެއް ލިބިދިނުމަކީ އަޅުގަނޑުމެންގެ ވައުދެއް. އަންނަ މޭމަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރަން އަޅުގަނޑު ނިންމައިފިން. މިބަދަލާއެކު ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ، އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ މިއީ 56 ޕަރސެންޓްގެ ކުރިއެރުމެއް،" ރައީސް ވިދާޅުވި އެވެ.
"ތައުލީމީ ދާއިރާއަށް ބޮޑުކުރިއެރުމެއް ގެނެވިއްޖެ"
ރައީސް މިއަދު ވިދާޅުވި ގޮތުގައި ތައުލީމީ ދާއިރާއަށް ކުރިއެރުން ގެނައުމަށްޓަަކައި ސަރުކާރުން މިދިޔަ އަހަރު ގިނަ މަސައްކަތްތަކެއް ވަނީ ކޮށްފަ އެވެ. އޭގެ އެންމެ ބޮޑު ބަޔަކީ އެ ދާއިރާއަަށް ބޭނުންވާ މީހުން ބިނާކުރުމަށް ކުރި މަސައްކަތްތަކެވެ.
އެމަނިކުފާނު ވިދާޅުވި ގޮތުގައި މިދިޔަ އަހަރު އެކަނިވެސް 4،000 އަށް ވުރެ ގިނަ ޓީޗަރުންނަށް ތައުލީމާއި ތަމްރީނުގެ ފުރުސަތު ސަރުކާރުން ހޯދައި ދިނެވެ.
"ނިމިދިޔަ އަހަރު 4،082 ޓީޗަރުންނަށް ބޭނުންވާ ތަފާތު ހުނަރާ ތަމްރީން އަދި 20 ޕްރިންސިޕަލަކަށް މާސްޓަސް ފެންވަރަށް ތަމްރީންވުމަށް ރާއްޖެއިން ބޭރުން ފުރުސަތު ހޯދާދެވިއްޖެ. މިކަންކަން ހުއްޓުމެއްނެތި ކުރިއަށް ގެންދެވޭނެ،" ރައީސް ސޯލިހު ވިދާޅުވި އެވެ.
މީހުން ބިނާކުރުމުގެ އިތުރުން، ސްކޫލްތަކަށް ބޭނުންވާ އުމްރާނީ ގިނަ މަސައްކަތްތަކެއް ވެސް މިދިޔަ އަހަރު ކޮށްފައިވާ ކަމަށް އެމަނިކުފާނު ވިދާޅުވި އެވެ. މިދިޔަ އަހަރު 22ސްކޫލެއްގައި 117 ކްލާސް ރޫމާ 6 މަލްޓިޕާޕަސް ހޯލް އިމާރާތްކޮށް ނިންމުނު ކަމަށާއި 55 ސްކޫލެއްގައި 473 ކްލާސްރޫމާ 27 މަލްޓިޕާޕަސް ހޯލްގެ މަސައްކަތް މިހާރު ވެސް ހިނގަމުން އަންނަ ކަމަށް ރައީސް ވިދާޅުވި އެވެ. އެ މަސަައްކަތްތަކަށް 900 މިލިޔަނަށް ވުރެ ގިނަ ރުފިޔާ ހަރަދުވާނެ ކަމަށް ވެސް އެމަނިކުފާނު ވިދާޅުވި އެވެ.
