ކޮލޮމްބޯ، ސްރީލަންކާ (ފެބްރުއަރީ 2) - ތެޔޮ ގަންނާނެ ބޭރު ފައިސާ ނެތުމުގެ ސަބަބުން ކަރަންޓް ކަނޑަމުންދާ ސްރީލަންކާއަށް އެމެޖެންސީ ލޯނެއްގެ ގޮތުގައި އިންޑިއާއިން 500 މިލިއަން ޑޮލަރު ދީފި އެވެ.
އޮފިޝަލުން ބުނީ ދެ ގައުމުގެ މެދުގައި ރަސްމީ އެއްބަސްވުމެއްގައި ސޮއިކުރީ ބުދަ ދުވަހު ކަމަށެވެ. އެއްބަސްވުމަކާ ހަމައަށް ދިޔައީ ދެ ހަފްތާގެ މަޝްވަރާއަށް ފަހު އެވެ.
އިންޑިއާއިން 500 މިލިއަން ޑޮލަރުގެ ލޯނެއް ދޭން އެއްބަސްވި އިރު، ބޭރު ފައިސާގެ ސަޕޯޓުގެ ގޮތުގައި 915 މިލިއަން ޑޮލަރު ދޭން ވެސް މީގެ ދުވަސްކޮޅެއް ކުރިން އެއްބަސްވި އެވެ.
އިންޑިއާގެ އޮފިޝަލަކު ބުނީ ލަންކާއަށް ބޭނުންވާ އަވަސް ކާބޯތަކެއްޗާއި ބޭސް އިންޑިއާއިން އިމްޕޯޓް ކުރަން އިތުރު އެއް ބިލިއަން ޑޮލަރުގެ ކްރެޑިޓް ލައިނެއް ދޫކުރަން ވެސް މަޝްވަރާތައް ކުރިއަށްދާ ކަމަށެވެ.
"500 މިލިއަން ޑޮލަރު ކަނޑައެޅީ އިންޑިއާގެ ސަޕްލަޔަރުންގެ އަތުން ޕެޓްރޯލިއަމް އުފެއްދުންތައް ގަންނަން،" އޮފިޝަލް ބުންޏެވެ.
ތެލުގެ އިތުރުން ހަނޑުލާއި ބައެއް އެހެން ޒަރޫރީ ކާބޯތަކެތީގެ ދަތިކަން ވެސް ސްރީލަންކާއަށް ވަނީ ކުރިމަތިވެފަ އެވެ. އެހެންވެ، ސުޕަމާކެޓްތަކުން ތަކެތި ވިއްކަނީ ރޭޝަންކޮށްގެންނެވެ.
ތަކެތީގެ ދަތިކަމާ ހެދި ޖެނުއަރީ މަހު އިންފްލޭޝަން ރޭޓް ރެކޯޑް މިންވަރަކުން 25 ޕަސެންޓަށް އުފުލުނެވެ.
ސްރީލަންކާއަށް ބޭރު ފައިސާ ލިބޭ މައިގަނޑު އެއް ސިނާއަތަކީ ފަތުރުވެރިކަމެވެ. ނަމަވެސް ކޮވިޑް ބަލިމަޑުކަމުގައި އެ ސިނާއަތް ވަނީ ހުއްޓިފަ އެވެ.
