ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކުގެ ސެކިއުރިޓީ ބަލަހައްޓައި، އިމާރާތް ސާފު ކުރުމުގެ މަސައްކަތް މިމަހުން ފެށިގެން ކުރާނީ މަސައްކަތް ހަވާލުކޮށްފައިވާ އަމިއްލަ ކުންފުނިތަކަކުން ކަމަށް ހައުސިންގް ޑިވަލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.
ފްލެޓްތަކުގެ ސެކިއުރިޓީ ބެލެހެއްޓުން އެޗްޑީސީން މިދިޔަ މަހުގެ 22 ވަނަ ދުވަހު ހަވާލުކުރީ ވަށި ޕްރައިވެޓް ލިމިޓެޑް އާއި އެވެެ. އަދި އިމާރާތްތައް ސާފު ކުރުމުގެ މަސައްކަތް އެޗްޑީސީން ހަވާލު ކުރީ އެލްއެމް އެންޓާޕްރައިސިސް އާއި ޕާމް ގްލޯ އާއި ކޭއެސްއޭ މޯލްޑިވްސް އާއި ލީރޯ އިންވެސްޓްމެންޓަށެވެ.
އެޗްޑީސީން ބުނީ އެ ފްލެޓްތަކުގައި ދިރިއުޅޭ ރައްޔިތުންގެ ރައްކާތެރި ކަމަށާއި އަ ތަނުގެ ސާފުތާރިހުކަން ދެމެހެއްޓުމަށް ސެކިއުރިޓީންނާއި ތަން ސާފު ކުރާ މީހުން އެހީތެރިވާނެ ކަމަށެވެ.
ފްލެޓް ތަކަށް އިއްޔެ ހިދުމަތް ދޭން ފަށަފައި ވާއިރު ކުނި ނެގުން ވަނީ އެ ހަތަރު ކުންފުންޏަށް ބަހާލާފަ އެވެ. ފްލެޓްތައް ސާފުކުރާނީ ކޮންމެ ދުވަހަކު ހެނދުނު 8:00 އިން މެންދުރު 12:00 ޖެހުމާ ހަމައަށެވެ.
- އެލްއެމް އެންޓާޕްރައިސިސް ކުންފުނި: ޓަވަރު އެކަކުން ހަތަރަކަށް
- ޕާމް ގްލޯއިން: ޓަވަރު ފަހަކުން އަށަކަށް
- ކޭއެސްއޭ މޯލްޑިވްސް: ޓަވަރު ނުވަޔަކުން 12 އަށް.
- ލީރޯ އިންވެސްޓްމެންޓިން: ޓަވަރު 13 އިން 16 އަށް
ސެކިއުރިޓީ ބެލެހެއްޓުމުގެ މަސައްކަތުގެ ދަށުން ހިޔާ ޓަވަރުތަކުގެ ގްރައުންޑް ފްލޯ އާއި ބޭސްމެންޓް ޕާކިން އޭރިއާ ބެލެހެއްޓުމަށް 24 ގަޑިއިރު ސެކިއުރިޓީ ގާޑެއް ހަރަކާތްތެރިވާނެ އެވެ. އަދި ފްލެޓްތަކުގައި ހަރުކޮށްފައި ހުންނަ ސީސީޓީވީ ކެމެރާ މޮނީޓާކޮށް ހާދިސާއެއް ރިޕޯޓްކޮށްފި ނަމަ އެކަމަށް އެޓެންޑުވާނެ އެވެ.
ހިޔާ މަޝްރޫއުގައި 16 ޓަވަރު ހަދާފައިވާއިރު، ކޮންމެ ފްލޯއެއްގައި، 20 ފްލެޓް ހުރެ އެވެ. އަދި ކޮންމެ ފްލެޓެއްގައި މަދުވެގެން ފަސް މީހުން ދިރިއުޅޭނެ ކަމަށް ހައުސިން ޑެވެލޮޕްމަންޓް ކޯޕަރޭޝަނުން ލަފާކުރެ އެވެ. އެހެންކަމުން އެއީ ފްލޯއެއްގައި 100 މީހުންނެވެ.
އެ އަދަދުން ބަލާ ނަމަ ކޮންމެ ޓަވަރެއްގައި، ގާތްގަނޑަކަށް 2،400 މީހުން ދިރިއުޅުން އެކަށީގެންވެ އެވެ. މުޅި 16 ޓަވަރަށް ބަލާ ނަމަ އެ އަދަދު 40،000 އާ ކައިރިކުރާނެ އެވެ. މިހާރު 1500 އަށްވުރެ ގިނަ އާއިލާ ދިރިއުޅެމުންދާއިރުގައި އެތަނުގައި ކުނީގެ މައްސަލަ އާއި ވައްކަމުގެ މައްސަލަތަކަކީ ހައްލު ނުވެ އޮތް މައްސަލަތަކެކެވެ.
އެގޮތުން މިދިޔަ މަހުގެ 16 ވަނަ ދުވަހު އެކަނި 24 ޓަނުގެ ކުނި ވަނީ އެ ސަރަހައްދުން ނަގާފަ އެވެ.
