ރ. އަލިފުށީގައި ބޯޓުޔާޑްތައް ހިންގުމަށް ދޫކޮށްފައިވާ ބޮޑު ބިމުން އެ ރަށު ކައުންސިލަށް ދައްކަން ޖެހޭ ކުލި ނުލިބޭތީ, އެކަމުގައި ހައްލެއް ހޯދުމުގެ މަސައްކަތް ފަށައިފި އެވެ.
އަލިފުށީގައި އެކިއެކި ބޯޓުޔާޑްތައް ހިންގުމަށް ޖުމްލަ 72,000 އަކަފޫޓްގެ ބިން ވަނީ ދޫކޮށްފަ އެވެ. އެ ތަންތަނުގައި ފުޅާ ދާއިރާއެއްގައި ބޯޓު ބަނުމުގެ މަސައްކަތްތައް ކުރިއަށްދިޔަސް, ރަށުގެ ރައްޔިތުންގެ މާލިއްޔާއަށް އެތަނުން ފައިދާއެއް ނުވެ އެވެ.
އެ ބިންތަކުން ކައުންސިލަށް ލިބެންޖެހޭ ކުލި އެއްގޮތަކަށް ވެސް ނުލިބޭތާ ފަސް ވަރަކަށް އަހަރު ވަނީ ވެފަ އެވެ. އެކަން މެދުވެރިވީ, ބިންތަކުގެ އެއްބަސްވުމުގެ މުއްދަތު ހަމަވެފައިވަނިކޮށް ގާނޫނަށް ގެނައި ބަދަލަކުން ކައުންސިލަށް ބިމުގެ ބާރު ގެއްލުމެވެ. ކުރީ ސަރުކާރުގައި އެފަދަ ބިންތަކުގެ ބާރު ކައުންސިލްތަކުގެ އަތުން ނެގި އެވެ.
އެހެންވެ, އެ ބިންތަކާ ގުޅޭ އާ އެއްބަސްވުން ކައުންސިލަށް ހެދޭ ގޮތް އޮތީ ނުވެފަ އެވެ. އެއްބަސްވުމެއް ނެތި ބިންތަކުން ކުލި ނެގޭނެ ގޮތެއް ވެސް ކައުންސިލަށް ނެތެވެ. އެކަމަކު މިހާރު ގާނޫނަށް ގެނައި އިސްލާހާއެކު, އެ ބިންތަކުގެ ބާރު އަނެއްކާވެސް ވަނީ ކައުންސިލަށް ލިބިފަ އެވެ.
ބިންތަކުގެ ބާރު އަލުން ލިބުމާއެކު, އެއްބަސްވުންތައް އެކުލަވާލައި, އެ ތަންތަނުން ކުލި ހޯދުމުގެ މަސައްކަތް މިހާރުގެ ކައުންސިލުން ވަނީ ފަށާފަ އެވެ.
އަލިފުށީ ކައުންސިލްގެ ރައީސް އާދަމް އިމްރާން ވިދާޅުވި ގޮތުގައި, ވޭތުވެދިޔަ އަހަރުތަކުގައި ކުލި ނަގާފައިނުވާތީ ބޯޓުޔާޑްތަކުން ކައުންސިލަށް ދައްކަން ޖެހޭ ބައިވަރު ފައިސާ އެބަހުއްޓެވެ. އެހެންވެ, އެ ފައިސާތައް އެތަންތަނުގެ ވެރިންނަށް ކައުންސިލަށް ދެއްކޭނެ އެންމެ ލުއިފަސޭހަ އިންތިޒާމެއް ހަމަޖައްސަން މަސައްކަތް ކުރަމުން އަންނަ ކަމަށް ވިދާޅުވި އެވެ.
އިމްރާން ވިދާޅުވީ އެހާ ގިނަ ފައިސާ އެއްފަހަރާ ދެއްކުން ވާނީ ރައްޔިތުންނަށް ވަރަށް ބޮޑު ބުރައަކަށް ކަމަށާއި އެހެންވެ އިސްކަން ދޭނީ ވީހާވެސް ލުއިފަސޭހަކޮށް, އެތަންތަނުގެ ވެރިންގެ ހިޔާލާއި މަޝްވަރާއާއެކު އެކަން ކުރުމަށް ކަމަށެވެ.
ކައުންސިލުން މިހާރު ވަނީ އެކަމުގައި ގާނޫނީ ލަފާ ވެސް ހޯދައި, އެއްބަސްވުންތަކެއް ޑްރާފްޓްކޮށްފަ އެވެ. ދެން އޮތީ އެ އެއްބަސްވުންތަކާމެދު ހިޔާލު ހޯދައި, ބޯޓުޔާޑްތަކުގެ ވެރިންނާއެކު އޭގައި ސޮއިކުރުންކަން އިމްރާން ފާހަގަކުރެއްވި އެވެ.
"އެ އެއްބަސްވުންތައް ޑްރާފްޓްކޮށްފައި ހުންނާނީ ރައްޔިތުންނަށް އެންމެ ލުއިވާނެ ގޮތަށް, ބެކްޑޭޓްގަ ހުރި ފައިސާ އެއް ފަހަރާ ދެއްކުމުގެ ބަދަލުގައި, އެއްބަސްވެވޭ މިންވަރު ދަށްކޮށް ލުއިފަސޭހަވާނެ ގޮތަށް," ކައުންސިލްގެ ރައީސް ވިދާޅުވި އެވެ.
އޭނާ ފާހަގަކުރެއްވި ގޮތުގައި, މީގެކުރިން ވެސް ވަގުތީ އެއްބަސްވުންތަކެއް ހަދަން މަސައްކަތްކުރި ނަމަވެސް, އޭގެން ވެސް މަގުސަދު ހާސިލްނުވީ ބެކްޑޭޓްގަ ހުރި ފައިސާތައް އެއް ފަހަރާ ދައްކަން ޖެހުމުންނެވެ. އެކަންވީ ރައްޔިތުންނަށް ވަރަށް ބޮޑު ބުރައަކަށްކަން އޭނާ ފާހަގަކުރެއްވި އެވެ.
އެހެންވެ, މި ކައުންސިލުން އިސްކަންދޭނީ ރައްޔިތުންނާ މަޝްވަރާކޮށް ހިޔާލު ހޯދައިގެން މަގުސަދު ހާސިލްކުރުމަށް ކަމަށް އިމްރާން ވިދާޅުވި އެވެ. އެއާއެކު ކުރިއަށް އޮތް ތަނުގައި ރަށަށް އެންމެ ބޮޑު އާމްދަނީއެއް ވަންނަން އޮތް ބޯޓުޔާޑްތަކުން ކައުންސިލްގެ ބަޖެޓަށް ފައިސާ ވަންނަން ފަށާނެ ކަމަށް ކައުންސިލްގެ ރައީސް އުއްމީދު ކުރައްވަ އެވެ.
