ރައްޔިތުންގެ މަޖިލީހުގެ އިންތިހާބަށް 17 ގަޑިއިރު ވެފައި ވަނިކޮށް ތިން ރަށެއްގައި ހޮސްޕިޓަލް އަޅަން ހަވާލުކޮށްފި އެވެ.
އިންތިހާބަށް ވަގުތު ކުޑަތަންވެފައި ވަނިކޮށް ހޮސްޕިޓަލް އަޅަން ހަވާލުކުރީ ރ. އަލިފުށި, ނ. މަނަދޫ އަދި މ. މުލީގަ އެވެ. އެ ރަށްތަކުގައި ހޮސްޕިޓަލް އެޅުމުގެ މަސައްކަތް އެމްޓީސީސީއާ ހަވާލުކުރީ މިއަދު އެވެ.
މުލި އަދި މަނަދޫގައި އަޅަނީ 50 އެނދުގެ ހޮސްޕިޓަލެވެ. އެއީ 185 މިލިއަން ރުފިޔާއަށް, ދެ އަހަރު ދުވަހުގެ މުއްދަތުގައި ނިންމަން ހަވާލުކުރި މަޝްރޫއުތަކެވެ. އަލިފުށީގައި އަޅަނީ 30 އެނދުގެ ހޮސްޕިޓަލެކެވެ. އެއީ 128 މިލިއަން ރުފިޔާއަށް 730 ދުވަހުގެ ތެރޭގައި ނިންމަން ހަވާލުކުރި މަޝްރޫއެކެވެ.
ވިހި ވަނަ މަޖިލީހުގެ އިންތިހާބަށް ވަގުތު ކުޑަތަން ވެފައި ވަނިކޮށް ހޮސްޕިޓަލް އަޅަން ހަވާލުކުރިއިރު, އިންތިހާބު ބޯމަތިވެފައި އޮއްވައި ރައީސް ޑރ. މުހައްމަދު މުއިއްޒު ރަށްރަށަށް ވަޑައިގެން ޕްރޮޖެކްޓުތައް އިއުލާނު ކުރުމުން އިންތިހާބަށް ނުފޫޒު ފޯރުވިދާނެ ކަމަށް ބުނެ ހިއުމަން ރައިޓްސް ކޮމިޝަން އޮފް މޯލްޑިވްސް އިން ވަނީ ކަންބޮޑުވުން ފާޅުކޮށްފަ އެވެ.
"ރައްޔިތުންގެ މަޖިލީހުގެ އިންތިހާބު އިއުލާނު ކުރުމަށްފަހު [ޖެނުއަރީ 30] ގެ ފަހުން ރައީސުލްޖުމްހޫރިއްޔާ 100 އަށް ވުރެ ގިނަ ރަށްރަށަށް ދަތުރުކޮށްފައިވޭ. ގައުމުގެ ވެރިޔާގެ ހައިސިއްޔަތުން ރަށްރަށް ޒިޔާރަތްކޮށް ރައްޔިތުންނާ ބައްދަލު ކުރުމަކީ ކުރުން މުހިންމު ކަމަކަށްވީ ނަމަވެސް ރައްޔިތުންގެ މަޖިލީހުގެ އިންތިހާބު ކައިރިވެފައި ވަނިކޮށް މި ދަތުރުތަކުގައި އެކި މަޝްރޫއުތައް އިއުލާނު ކުރުމާއި ސޮއި ކުރުމުގެ އިތުރުން ކުރީގައި ނިމިފައި ހުރި ނިމިފައި ހުރި ޕްރޮޖެކްޓުތައް އިފުތިތާހު ކުރުމަކީ އޭގެ ސަބަބުން އިންތިހާބަށް ނުފޫޒު ފޯރުވަން ފުރުސަތު އޮތް ކަމެއް،" އެ ކޮމިޝަނުން ބުނެފައިވެ އެވެ.
އިންތިހާބާ ދިމާކޮށް ގިނަ އަދަދެއްގެ މަޝްރޫއުތައް ހަވާލުކުރަމުން ދާއިރު, ގިނަ އަދަދެއްގެ ބަޔަކަށް ވަޒީފާތައް ވެސް ދެމުން އެބަދެ އެވެ.
