ރާއްޖޭގައި އިންޑިއާ ސިފައިން ތިބުމާ ދެކޮޅަށް، "އިންޑިއާ އައުޓް" ގެ ނަމުގައި އިދިކޮޅުން ކުރިއަށް ގެންދާ ކެމްޕޭނާއި ފަހުން ވެސް ހިންގައިފާނެ އެފަދަ އެހެން ކެމްޕޭންތައް ވެސް ގާނޫނީ ކުށަކަށް ހެދޭ ފަދަ ބިލެއް، ހުށަހަޅަން، މަޖިލީހުގެ ސުޕަމެޖޯރިޓީ އޮންނަ އެމްޑީޕީން ތައްޔާރުވެއްޖެ އެވެ.
"ދިވެހި ރާއްޖެއިން ބޭރު ގައުމުތަކާ އެކު ގާއިމްކޮށްފައިވާ ޚާރިޖީ ގުޅުންތަކަށް ނޭދެވޭ އަަސަރުކުރާނެ ފަދަ ހުއްޓުވުމުގެ ބިލު" ގެ ނަމުގައި އެމްޑީޕީން އެކުލަވައިލި ޑްރާފްޓްގައިވާ ބިލުގައިވާ ގޮތުން، އެ ބިލް ގާނޫނަކަށް ވުމަށްފަހު، ރާއްޖެއާ އެހެން ގައުމުތަކާ ދެމެދު އޮންނަ ގުޅުންތަކަށް ނޭދެވޭ އަސަރުކޮށްފާނެ ފަދަ އަމަލެއް ކުރާ މީހާ އެކުރަނީ ކުށެކެވެ. ބިލުގައިވާ ގޮތުން، ރާއްޖެއާ ގުޅުން ގާއިމްކޮށްފައިވާ ގައުމެއްގެ އިއްޒަތާއި ގަދަރަށް ބުރޫ އަރާ ފަދަ އަމަލެއް ކުރުމަކީ ވެސް ކުށެކެވެ.
ބިލްގެ (6) ވަނަ މާއްދާގެ (ހ) ގައި އެގޮތަށް ހިމަނަން ޑްރާފްޓްގައި އޮތް އިރު އެ މާއްދާގެ (ށ)ގައި އޮތީ އެ ކުށަށް ދޭނެ އަދަބެވެ.
"...މި މާއްދާގެ ހ. ގައި ބަޔާންކޮށްފައިވާ ކުށެއް ކޮށްފި މީހެއްގެ އަދަބަކީ، އެ އަމަލެއްގެ ކުޑަބޮޑުމިނަށް ބަލައި ގިނަވެގެން 20،000 ރުފިޔާއިން ޖޫރިމަނާކުރުން ނުވަތަ އެއް އަހަރަށް ވުރެ ދިގުނޫން މުއްދަތަކަށް ގޭބަންދުކުރުން ނުވަތަ ހަ މަސް ދުވަހަށް ވުރެ ދިގުނޫން މުއްދަތަކަށް ޖަލަށް ލުމެވެ،" އެމްޑީޕީން ތައްޔާރު ކުރި ޑްރާފްޓުގައި ބުނެފައިވެ އެވެ.
އެ ބިލަކީ ސީދާ، "އިންޑިއާ އައުޓް" ކެމްޕޭނަށް އަމާޒުކޮށް، ޑްރާފްޓްކުރި ބިލެއް ކަމަކަށް އެމްޑީޕީއަކުން ނުބުނެ އެވެ. އެޕާޓީގެ ޕާލަމެންޓްރީ ގްރޫޕްގެ ލީޑަރު އަދި މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ހާރިޖީ ގުޅުންތަކަށް ބުރޫ އަރާ ގޮތަށް އަމަލުކުރާ ފަރާތްކަށް ފިޔަަވަޅު އެޅޭނެ ގާނޫނެއް ހަދަން އެމްޑީޕީން ވަރަށް އަވަހަށް ބިލެއް ހުށަހަޅާނެ ކަމަށެވެ.
"ވަރަށް އަވަހަށް [އެ ބިލު] މަޖިލީހަށް ހުށަހަޅާނަން،" އޭނާ ވިދާޅުވި އެވެ.
އޭނާ ވިދާޅުވިގޮތުގައި މަޖިލީހުގެ މިއަހަރުގެ ފުރަތަމަ ދައުރަށް އެ ބިލު ހުށަހަޅާނެ އެވެ. އެހެން ނަމަވެސް އެ ބިލު ހުށަހަޅުއްވާނީ ކޮން މެމްބަރެއް ކަމެއް އަދި ނުނިންމަ އެވެ. ރައްޔިތުންގެ މަޖިލިސް މިއަހަރަށް ހުޅުވާނީ އަންނަ ބުރާސްފަތި ދުވަހު އެވެ.
އެމްޑީޕީން މިފަދަ ބިލެއް ހުށަހަޅަން ނިންމާފައި ވާއިރު، "އިންޑިއާ އައުޓް" ގެ ނަމުގައި އިދިކޮޅުން ކުރިއަށް ގެންދާ ކެމްޕޭންގައި މިހާރު އިސްކޮށް އުޅުއްވަނީ ކުރީގެ ރައީސް އަބްދުﷲ ޔާމީނެވެ. އެ ކެމްޕޭން ރާއްޖޭގެ އެކި ކަންކޮޅުތަކަށް ފުޅާކުރައްވަން އެމަނިކުފާނު ގެންދަވަނީ ބައެއް ރަށްތަކަށް ދަތުރު ވެސް ކުރައްވަމުންނެވެ.
