ރޭގަނޑުގެ ނާސްތާއަށް ބިސްގަނޑެއް އަޅައިނުދިނުމުން ހިނގައިދިޔަ ޒުވާބެއްގެ ތެރެއިން އދ. އެއްލައިދޫ ރިސޯޓުގެ ކައްކާއަކަށް ވަޅިން ހަމަލާދީ މަރާލި މައްސަލައިގައި ޝަރީއަތް މިއަދު ކްރިމިނަލް ކޯޓުގައި ކުރިއަށް ގެންގޮސްފި އެވެ.
އެ މައްސަލައިގައި ފުލުހުން ދައުވާ ކުރަނީ ރިސޯޓުގައި މަސައްކަތް ކުރި ސްރީ ލަންކާގެ މުވައްޒަފެއް ކަމަށްވާ ޖަޔަލަތު ކޮޑިއާޗިގެ ޖަނަކަ ޕްރަސަންނަ ޕެރޭރާ، 42، ގެ މައްޗަށެވެ. އެ މާރާމާރީގައި މަރުވީ ހަމަ ސްރީ ލަންކާއަށް ނިސްބަތްވާ ޕަތުމް ދިލްޝަން ޑި ސިލްވާ އަގަމްޕޮޑި، 24، އެވެ. ހާދިސާ ހިނގީ މީގެ ތިން އަހަރު ކުރިން ޖެނުއަރީ 10، 2019 ގަ އެވެ.
މިއަދު އެ މައްސަލައިގައި އޮތީ ޝަރީއަތް ކުރިއަށްގެންދާނެ ގޮތުގެ ތާވަލެއް ކަނޑައެޅުމެވެ. އަދި ދައުވާ ލިބޭ ޖަޔަލަތުގެ ދިފާއީ ވަކީލު އަހުމަދު ޝިޔާމް އަލަށް މައްސަލައާ ހަވާލުވެވަޑައިގެންފައިވާތީ އޭނާއަށް މައްސަލައާ ގުޅޭ ލިޔެކުންތައް ހަވާލު ކުރުމަށް ވެސް މިއަދުގެ އަޑުއެހުމުގައި ނިންމި އެވެ.
ޖަޔަލަތުގެ މައްޗަށް ދައުލަތުން އުފުލާފައިވާ ދައުވާގައި ބުނަނީ، ހާދިސާ ހިހިނ ރޭ 21:30 ހާއިރު، މަރުވި ޕަތުމް ދިލްޝަންގެ ކައިރީގައި ބިސްގަނޑެއް އަޅައިދޭން އެދުުމުން ދެ މީހުންގެ ދެމެދުގައި ޒުވާބެއް އުފެދުނު ކަމަށެވެ. އެ ޒުވާބުގެ ތެރެއިން، ރައިސް ކުކާގައި އޮތް ދޭފަތެއް ޕަތުމް ދިލްޝަން ނަގައި، ޖަޔަލަތުއާ ދިމާލަށް ދިޔުމުން، އަތުޖެހޭ ހިސާބުގައި އޮތް ހައެއްކަ އިންޗީގެ ވަޅިއެއް އޭނާ ނަގައި، ދިލްޝަންގެ ކަރުން ތިރިއަށް މޭމައްޗަށް ހަރައިލި ކަމަށް ދައުވާގައި ބުނެ އެވެ.
ޕަތުމް ދިލްޝަން މަރުވީ އެ ހަމަލާގައި ލިބުނު ޒަހަމަށް ފަރުވާދެމުން ގެންދަނިކޮށް ހަމަ އެ ރޭ އެއްލައިދޫ ރިސޯޓުގެ ކްލިނިކުގެ ތެރޭގައި ކަމަށް ވެސް ދައުވާގައި ބުނެފައިވެ އެވެ. އޭނާ މަރުވީ ހާދިސާ ހިނގިތާ ގާތްގަނޑަކަށް ގަޑިއެއްހާއިރުގެ ތެރޭގައި ކަމަށް ދައުލަތުން ބުނެ އެވެ.
އެ ހާދިސާއަށްފަހު ޖަޔަލަތު ހައްޔަރުކޮށްގެން އދ. މަހިބަދޫ ކޯޓަށް ގެންދިޔުމުން، ޕަތުމް ދިލްޝަންގެ ހަށިގަނޑަށް ވަޅިއަކުން ހަމަލާދިން ކަމަށް އޭނާ އެއްބަސްވެފައިވެ އެވެ. އަދި ވަޅި ހެރި ކަމަށް އިއުތިރާފްވެ ފުލުހުންނަށް ވެސް އޭނާ ވަނީ ބަޔާނެއް ދީފަ އެވެ. ނަމަވެސް ދައުލަތުން އޭނަގެ މައްޗަށް އުފުލި ގަސްދުގައި މީހަކު މެރުމުގެ ދައުވާއަށް ޖަޔަލަތު ވަނީ މީގެ ކުރިން ކޯޓުގައި އިންކާރުކޮށްފަ އެވެ.
މީގެ ކުރިން އެ މައްސަލައިގައި ބޭއްވި އަޑުއެހުމެއްގައި ޖަޔަލަތު ބުނެފައި ވަނީ އޭނާއާއެކު މަސައްކަތް ކުރީ ޕަތުމް ދިލްޝަނަށް ހަމަލާދިނީ މަރާލުމުގެ ގަސްދުގައި ނޫން ކަމަށެވެ.
ޖަޔަލަތުގެ މައްޗަށް އުފުލާފައިވާ ދައުވާ ސާބިތު ކުރުމަށް ދައުލަތުން ވަނީ ގިނަ އަދަދެއްގެ ހެކި ކޯޓަށް ހުށަހަޅައިފަ އެވެ. އަދި އެއްލައިދޫ ރިސޯޓުގައި އެއިރު މަސައްކަތް ކުރިން ބައެއް މުވައްޒަފުން ހެކީގެ ގޮތުގައި ދައުލަތުން ވަނީ ހުށަހަޅައިފަ އެވެ.
