އިނގިރޭސިވިލާތަށް އެރި ތޫފާން މާލިކްގެ ސަބަބުން ވައި ގަދަވެ ވެއްޓުނު ގަސްތަކުގެ ދަށުވެ އުމުރުން ނުވަ އަހަރުގެ ކުއްޖަކާއި 60 އަހަރުގެ އަންހެނަކު މަރުވެއްޖެ އެވެ.
ކުޑަ ފިރިހެން ކުއްޖާ މަރުވީ ސްޓެފޯޑްޝަޔާގަ އެވެ. އަދި އަންހެން މީހާ މަރުވީ އެބަޑީންގަ އެވެ.
ތޫފާނުގެ ސަބަބުން ކަރަންޓް ކޭބަލްތަކަށް ވެސް އަސަރުކޮށް، ސްކޮޓްލެންޑާއި އިންގްލެންޑްގައި އެތައް ހާސް ގެޔަކުން ވަނީ ކަރަންޓު ކެނޑިފަ އެވެ.
ސްކޮޓްލެންޑްގެ އިރުމަތީ އައްސޭރިފަށާއި އިންގްލެންޑްގެ އިރު އުތުރަށް މޫސުމާ ގުޅޭ އެމްބާ އިންޒާރެއް ނެރިފައިވާ އިރު، ސްކޮޓެލެންޑްގެ އެހެން ހިސާބުތަކާއި، އުތުރު އަޔަލެންޑާއި، އުތުރު އިންގްލެންޑަށް ނެރިފައި ވަނީ އާދަޔާ ހިލާފަށް ވައިގަދަ ވާނެ ކަމަށް ލަފާކޮށް ރީނދީ އިންޒާރެކެވެ.
އާދީއްތަ ދުވަހު ކޮރީގެ ނަން ދީފައިވާ އިތުރު ތޫފާނެއް އަރާނެ ކަމަށް ލަފާކުރެވޭ އިރު، އެ ތޫފާނާ އެކު ސްކޮޓްލެންޑްގެ ހިސާބުތަކަށް އަދިވެސް އިތުރަށް ވައިގަދަ ވާނެ އެވެ.
ސްކޮޓްލެންޑްގެ 20،000 ގެޔަށް އަދިވެސް ކަރަންޓު ފޯރުކޮށްދެވިފައި ނުވާ އިރު، ތޫފާން ކޮރީ އައުމާ އެކު އިތުރު މައްސަލަތައް ކުރިމަތިވާނެ ކަމަށް ސްކޮޓްލެންޑްގެ ޑެޕިއުޓީ ފަސްޓް މިނިސްޓަރު ޖޯން ސްވިނީ ވިދާޅުވި އެވެ.
ގްލާސްގޯގައި ގަދީމީ ޓަވަރެއް ކައިރީގައި ދިރިއުޅޭ ގިނަ ބަޔަކު ވަނީ ރައްކާތެރި ހިސާބުތަކަށް ބަދަލުވެފަ އެވެ. ޓްރިނިޓީ ބިލްޑިން ޓަވަރު ވެއްޓުމުގެ ބިރު އެބަ އޮތް ކަމަށް ގްލާސްގޯ ސިޓީ ކައުންސިލުން ބުންޏެވެ.
