ވޮޝިންޓަން، އެމެރިކާ (ޖެނުއަރީ 29) - ނެޓްފްލިކްސްގެ ސީރީޒް "ޓައިގާ ކިންގް" އިން މަގްބޫލުކަން ހޯދި ޖޯ އެގްޒޯޓިކް އިސްތިއުނާފް ކުރި މައްސަލައިން ކުރި ނުލިބި، 21 އަހަރުގެ ޖަލު ހުކުމެއް އައިސްފި އެވެ.
ޖޯ އެގްޒޯޓިކް ނުވަތަ ޖޯ މަލްޑޮނާޑޯ ޕެސެޖް އަކީ ބޮޑެތި މިނިކާވަގު ބަންދުކޮށްގެން އެމެރިކާގައި ޕްރައިވެޓް ޒުލެއް ހިންގި މީހެކެވެ. އޭނާއަށް އެންމެ ފުރަތަމަ 22 އަހަރުގެ ޖަލު ހުކުމެއް އައީ ވިޔަފާރީގައި ވާދަވެރި ކެރޯލް ބޭސިކިން މަރާލަން އުޅުނު ކަމަށް 2020 ވަނަ އަހަރު ސާބިތުވެގެންނެވެ.
އިޖުރާއީ މައްސަލައެއް ދިމާވި ކަމަށް ބުނެ، އެ ހުކުމް ކުޑަ ކުރަން ކޯޓުން ފަހުން އެންގި އެވެ. މައްސަލަ އިސްތިއުނާފުކޮށް، ހުކުމަކާ ހަމައަށް ދިޔުމުން ހުކުރު ދުވަހު ކޯޓުގައި އުމުރުން 58 އަހަރުގެ ޖޯ އެގްޒޯޓިކް އެދުނީ އޭނާއަށް "ދެ ވަނަ ފުރުސަތެއް" ދިނުމަށެވެ.
ޕްރޮސްޓޭޓް ކެންސަރު ޖެހިފައިވާ ޖޯ ބުނީ "މިނިވަންކަމަށް އިންތިޒާރު ކުރަނިކޮށް ޖަލުގައި މަރުވެގެން ދިޔަ ނުދިނުމަށެވެ."
ނަމަވެސް ކެރޯލް ބާސިކް ފަނޑިޔާރުގެ ކިބައިން އެދުނީ އޭނާ ޖަލުގައި ބަހައްޓައި ދިނުމަށެވެ. އޭނާ ބުނީ ޖޯގެ ސަބަބުން ފުރާނައަށް ނުރައްކާވާނެ ކަމަށެވެ. ފަނޑިޔާރު ނިންމެވީ 21 އަހަރުގެ ޖަލު ހުކުމެއް ދެމެހެއްޓުމަށެވެ.
ޖޯ އެގްޒޯޓިކްގެ ޒޫ ހުޅުވީ އޮކްލަހޯމާގައި 1999 ވަނަ އަހަރު އެވެ. އެ ސީރީޒްގައި އޭނާގެ ވިޔަފާރި ކުރިއެރި ގޮތާއި، ލިބުނު ގެއްލުންތަކާއި، ކެރޯލް ބާސްކިންއާ ދެކޮޅަށް އޮތް ރުޅިވެރިކަން ފެނުނެވެ.
ކެރޯލް ބާސްކިން ތުހުމަތު ކުރި ގޮތުގައި ޖޯ އެގްޒޯޓިކް އަކީ މިނިކާވަގުތައް ބަންދުކޮށްގެން، އެ ތަކެއްޗަށް އަނިޔާވެރިކޮށް އަމަލު ކުރާ މީހެކެވެ. އަދި އޭނާގެ ޒޫ ބަންދުކުރަން މަސައްކަތް ކުރި އެވެ.
އެހެންވެ، ކެރޯލް ބާސްކިން މަރާލަން ދެ މީހަކަށް އެތައް ހާސް ޑޮލަރު ޖޯ ދިނެވެ. އެކަމަކު އޭގެ ތެރެއިން އެކަކަކީ އެފްބީއައިގެ ސިއްރު އޭޖެންޓެކެވެ.
"ޓައިގާ ކިންގް 2" ނެރުނީ މިދިޔަ ނޮވެމްބަރު މަހު އެވެ. ނެޓްފްލިކްސް އިން ނެރުނު ސީރީޒްގެ ދެ ވަނަ ބަޔަށް ވެސް ބޮޑު މަގްބޫލުކަމެއް ލިބުނެވެ.
