މޮސްކޯ، ރަޝިއާ (ޖެނުއަރީ 28) - ރަޝިއާއިން ހަނގުރާމަ ބޭނުން ނޫން ނަމަވެސް މަސްލަހަތު ދިފާއު ކުރަން ފިޔަވަޅު އަޅާނެ ކަމަށް ފޮރިން މިނިސްޓަރު ސާގެއި ލެވްރޯވް ވިދާޅުވެއްޖެ އެވެ.
ހުޅަނގުގެ ގައުމުތަކުން ރަޝިއާއަށް ތުހުމަތު ކުރަނީ ޔޫކްރެއިނާ ގުޅޭ ބޯޑަރު ކައިރިއަށް 100،000 ސިފައިން ޖަމާކޮށް، ޔޫކްރެއިން ހިފަން އުޅޭ ކަމަށެވެ. އެފަދަ ކަމެއް ކޮށްފި ނަމަ ފިޔަވަޅު އަޅާނެ ކަމަށް ހުޅަނގުގެ ގައުމުތައް އިންޒާރު ދީފައިވެ އެވެ.
"މިއީ ރަޝިއާއަށް ބަރޯސާވާ ކަމެއް ނަމަ ހަނގުރާމައެއް ނޯންނާނެ. އަޅުގަނޑުމެން ހަނގުރާމަ ބޭނުމެއް ނޫން،" ރަޝިއާގެ ހަތަރު ރޭޑިއޯ ސްޓޭޝަރެއްގެ ވެރިންނަށް ދެއްވި އިންޓަވިއުއެއްގައި ލެވްރޯވް ވިދާޅުވި އެވެ.
"އެކަމަކު އަޅުގަނޑުމެންގެ މަސްލަހަތަށް ސަމާލުކަން ނުދީ ކުރިއަށް ދާން ވެސް ފުރުސަތެއް ނުދޭނަން."
ޔޫކްރެއިންގެ މަޝްރަހު ހަމައަކަށް އަޅުވަން ރަޝިއާއިން ބޭނުންވާ ކަންކަމުގެ ގޮތުގައި ސެކިއުރިޓީއާ ގުޅޭ ހުށަހެޅުންތަކެއް ފޮނުވާފައި ވަނިކޮށް، އެމެރިކާ އާއި ނޭޓޯއިން ވަނީ އެ ހުށަހެޅުމަށް ރައްދު ދީފަ އެވެ.
ރަޝިއާގެ ޑިމާންޑުތަކުގެ ތެރޭގައި ނޭޓޯގެ މެމްބަރެއްގެ ގޮތުގައި ޔޫކްރެއިން ނުހިމެނުމާއި، ކުރީގެ ސޯވިއެޓް ގައުމުތަކުގައި އާ އަސްކަރީ މަރުކަޒުތައް އެޅުން ހިމެނެ އެވެ.
މިދިޔަ ބުރާސްފަތި ދުވަހު ރަޝިއާއިން ބުނީ ހުށަހެޅުމަށް ލިބުނު ރައްދުގައި އެ ގައުމުގެ ކަންބޮޑުވުންތަކާ މެދު ފުރިހަމައަށް ވިސްނާފައި ނުވާ ކަމަށެވެ. ނަމަވެސް އަދިވެސް މަޝްވަރާއަށް ފުރުސަތު އެބަ އޮތް ކަމުގެ އިޝާރާތެއް ކުރި އެވެ.
