ލާގޯސް، ނައިޖީރިއާ (ޖެނުއަރީ 27) - ނައިޖީރިއާގައި ފެތުރެމުންދާ ލަސާ ހުމުގެ ސަބަބުން ތިން ހަފުތާ ތެރޭގައި 26 މީހުން މަރުވެފައި ވަނިކޮށް، ބަލި ކޮންޓްރޯލް ކުރަން ހާއްސަ އެމެޖެންސީ ސެންޓަރެއް ގާއިމްކޮށްފި އެވެ.
ލަސާ ހުމަކީ އެބޯލާ އާއި މާބާގް ވައިރަހުގެ އާއިލާއަށް ނިސްބަތްވާ ހުމެކެވެ. ނަމަވެސް މިއީ އެ ދެ ބައްޔަށް ވުރެ ނުރައްކާ ކުޑަ އަދި ދޭތެރެ ދޭތެރެއިން ނައިޖީރިއާއިން ފެންނަ ހުމެކެވެ.
ނައިޖީރިއާ ސެންޓާ ފޯ ޑިޒީޒް ކޮންޓްރޯލް (އެންސީޑީސީ) އިން ބުނީ ގައުމުގެ ބައެއް ހިސާބުތަކުގައި ހުން ފެތުރެމުން ދާތީ ލަސާ ހުމަށް ހާއްސަ އެމެޖެންސީ އޮޕަރޭޝަންސް ސެންޓަރެއް ގާއިމްކޮށްފައިވާ ކަމަށެވެ.
"ޖެނުއަރީ 23 2022 ވަނަ އަހަރުގެ ނިޔަލަށް، ޖުމްލަ 115 ކޭސް ޔަގީންވެ، 26 މީހުން މަރުވެފައިވޭ. އެއީ ކޭސްތަކުގެ 22.6 ޕަސެންޓް،" އެންސީޑީސީން ބުންޏެވެ.
"ކޭސްތައް ރިޕޯޓު ކުރީ 11 ސްޓޭޓެއްގެ 30 ސަރަހައްދަކުން."
ލަސާ ހުން ފެތުރެނީ މީދަލުގެ ނަޖިހުގެ ސަބަބުންނާއި ބަލި ޖެހިފައިވާ މީހެއްގެ ގައިންނެވެ.
ބަލި ޖެހޭ ގިނަ މީހުންގެ އެއްވެސް އަލާމާތެއް ނުފެނުނު ނަމަވެސް ފަސްބައިކޮށްފައި އެއްބައި ކޭސްތަކުގައި ބަލި ޖެހޭ މީހުންގެ ގައިން އާދަޔާ ހިލާފަށް ގިނައިން ލޭ އައިސް، ގުނަވަންތައް ފެއިލްވެ އެވެ.
ކޮންމެ އަހަރަކު ވެސް ކުރީކޮޅު މި ހުން ނައިޖީރިއާއިން ފެނެ އެވެ. ސައިންޓިސްޓުން ބުނާ ގޮތުގައި އެކަން ގުޅިފައި ވަނީ ވާރޭ ނުވެހި ގިނަ ދުވަސްވުމާ އެވެ.
ބަލި ފަތުރާ ވައިރަހަށް ލަސާގެ ނަން ދިނީ އެ ވައިރަސް އެންމެ ފުރަތަމަ ފެނުނީ 1969 ވަނަ އަހަރު އުތުރު ނައިޖީރިއާގެ ލަސާ އަވަށުން ކަމަށް ވާތީ އެވެ.
ލަސާ ފެތުރެން ފަށާފައިވާ އިރު، 210 މިލިއަން އާބާދީއެއް އޮންނަ ނައިޖީރިއާގައި ކޮވިޑް ވެސް ދަނީ ފެތުރެމުންނެވެ. އެ ގައުމުން މިހާތަނަށް 252،753 ކޭސް ރިޕޯޓުކޮށްފައިވާ އިރު، މަރުވެފައި ވަނީ 3،134 މީހުންނެވެ.
