ހަސަކެހް، ސީރިއާ (ޖެނުއަރީ 26) - ސީރިއާގެ އިރު އުތުރުގެ ޖަލަކުން މީގެ ހަ ދުވަސް ކުރިން ފެށި ހަނގުރާމައިގައި ކުރުދީންގެ ފައުޖުން އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕް ބަލިކޮށްފި އެވެ.
އައިއެސްގެ ހަނގުރާމަވެރިން ޖަލަށް ދިން ހަމަލާއަކާ އެކު ފެށި ހަނގުރާމައިގައި ޓެރަރިސްޓުންގެ 180 މީހުން ވަނީ މަރުވެފަ އެވެ. އެއީ މީގެ ތިން އަހަރު ކުރިން އައިއެސް ގްރޫޕް ބަލިކަށިކޮށްލި ފަހުން ދިން އެންމެ ބޮޑު ހަމަލާ އެވެ.
ހަސަކެހް ސިޓީގައި ހުންނަ ގްވައިރަން ޖަލުގައި 3،500 އަށް ވުރެ ގިނަ އައިއެސް ޓެރަރިސްޓުން ބަންދުކޮށްފައި ތިއްބެވެ. އެ ތަނަށް އެންމެ ފުރަތަމަ ހަމަލާ ދިނީ ޖެނުއަރީ 20 ވަނަ ދުވަހު ގޮވާ ޒާތުގެ ތަކެތި ހަރުކޮށްފައި ހުރި އުޅަނދުތަކެއް ފޮނުވައިގެންނެވެ.
ސީރިއާގެ ކުރުދީންގެ ފައުޖުން ބުނީ ޖަލުން އެއްވެސް މީހަކު ނުފިލާ ކަމަށެވެ. ނަމަވެސް ސީރިއަން އޮބްޒަވޭޓަރީ ފޯ ހިޔުމަން ރައިޓްސް އިން ބުނީ ގިނަ އަދަދެއްގެ ގައިދީން ފިލި ކަމަށެވެ.
ކުރުދީން އިސްކޮށް އުޅޭ ސީރިއަން ޑިމޮކްރެޓިކް ފޯސާޒް (އެސްޑީއެފް) ފައުޖުގެ ފަރާތުން ފަރްހާދް ޝާމީ ނެރުނު ބަޔާނެއްގައި ބުނީ ހަ ދުވަހުގެ ހަނގުރާމައަށް ފަހު "ފުރިހަމަ ކޮންޓްރޯލް" ހޯދާފައިވާ ކަމަށެވެ.
ޖަލުގެ ފުރިހަމަ ކޮންޓްރޯލް ލިބުނީ އައިއެސްގެ ޓެރަރިސްޓުން އަމާން ދިނުމުންނެވެ. ކުރުދީންގެ ފައުޖަށް އެހީވާން އެމެރިކާ އާއި ބޭރުގެ އެހެން ފައުޖުތައް ވެސް ހަނގުރާމައިގައި ބައިވެރިވި އެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސް އިން ބުނީ ސީރިއާގެ އިރު އުތުރުގައި އޮންނަ އެންމެ ބޮޑު ސިޓީ އޮތީ ހަނގުރާމައިގެ މައިދާނަކަށް ބަދަލުވެފައި ކަމަށާއި ނަމަވެސް މިހާރު ހަމަލާތައް ހުއްޓިފައިވާ ކަމަށެވެ.
ހަނގުރާމަ ފެށުމާ އެކު އެ ސިޓީގައި ދިރިއުޅޭ އެތައް ހާސް ބަޔަކު ވަނީ ރައްކާތެރިވުމުގެ ގޮތުން އެހެން ހިސާބުތަކަށް ބަދަލުވެފަ އެވެ. އެގޮތުން ގިނަ ބަޔަކު ރައްކާތެރިކަން ހޯދަން ވަނީ މިސްކިތްތަކަށެވެ.
އައިއެސްގެ ޓެރަރިސްޓުންނަށް އަމާން ދިނުމަށް މަޖުބޫރު ކުރުމުގެ ގޮތުން ކުރުދީންގެ ފައުޖުން ވަނީ ފާއިތުވި ދެ ދުވަހު ޖަލަށް ފެނާއި ކާބޯތަކެތި އެތެރެ ކުރުން ހުއްޓުވާފަ އެވެ.
ޖަލަށް ހަމަލާ ދިނުމަށް ފަހު އެ ތަނުގެ މުވައްޒަފުން ރަހީނުކޮށް، އެ މަންޒަރު ފެންނަ ވީޑިއޯ އައިއެސް އިން އާއްމުކުރި އެވެ. ނަމަވެސް ރަހީނު ކުރި 32 މީހުން ވަނީ މިނިވަންކޮށްފަ އެވެ.
ސީރިއާގައި އެންމެ ގިނަ އަދަދެއްގެ އައިއެސްގެ ޓެރަރިސްޓުން ބަންދުކޮށްފައި ތިބެނީ ގްވައިރަން ޖަލުގަ އެވެ. ކުރުދީން ހިންގާ ޖަލުތަކުގައި ޖުމްލަ 12،000 އަށް ވުރެ ގިނަ އައިއެސް ޓެރަރިސްޓިން ތިބި ކަމަށް ވެ އެވެ. އެއީ 50 ގައުމަކަށް ނިސްބަތްވާ މީހުންނެވެ.
އެހާ ގިނަ އަދަދެއްގެ އައިއެސް ހަނގުރާމަވެރިން ބަންދުކޮށްގެން ގެންގުޅެ، ޝަރީއަތް ހިންގުމުގެ ގާބިލްކަން ނެތް ކަމަށް ކުރުދީން ވަނީ ކުރިން ބުނެފަ އެވެ.
އައިއެސް މައްސަލައަކީ ބައިނަލްއަގްވާމީ މައްސަލައެއްކަން ފާހަގަކޮށް، ކުރުދީން ބާރު އަޅަމުން ދަނީ ޖަލުތަކުގެ ސެކިއުރިޓީ އާއި އިންސާނީ ހާލަތު ރަނގަޅު ކުރަން އެހީ ދިނުމަށެވެ.
އައިއެސްގެ ޓެރަރިސްޓުން 2014 ވަނަ އަހަރު ދައުލަތެއް ގާއިމްކޮށްގެން އުޅުނީ އިރާގާއި ސީރިއާގެ ބޮޑު ބަޔެއް ހިފައިގެންނެވެ. ފަސް އަހަރުގެ ހަނގުރާމަ އަށް ފަހު އައިއެސް ބަލިކުރީ އިރުމަތީ ސީރިއާގައި މާޗް 2019 ވަނަ އަހަރު އެވެ.
