ކިޔެވް، ޔޫކްރެއިން (ޖެނުއަރީ 26) - ބޮޑު ހަމަލާއެއް ދެވޭ އަދަދުގެ ރަޝިއާ ސިފައިން ބޯޑަރު ކައިރިއަށް ޖަމާވެފައި ނުވާ ކަމަށް ޔޫކްރެއިންގެ ފޮރިން މިނިސްޓަރު ޑިމީޓްރޯ ކުލެބާ ވިދާޅުވެއްޖެ އެވެ.
ޔޫކްރެއިން ސަރުކާރާއި ހުޅަނގުގެ ގައުމުތަކުން ރަޝިއާއަށް ތުހުމަތު ކުރާ ގޮތުގައި ރަޝިއާއިން އުޅެނީ ޔޫކްރެއިން ބޯޑަރު ކައިރިއަށް ސިފައިން ޖަމާކޮށް، އެ ގައުމަށް ހަމަލާއެއް ދިނުމަށެވެ.
"ޔޫކްރެއިންގެ ބޯޑަރު ކައިރި އާއި ރަޝިއާއިން ހިފައިގެން އުޅޭ ޔޫކްރެއިންގެ ސަރަހައްދުތަކަށް ޖަމާކޮށްފައި ވަނީ ގިނަ އަދަދެއްގެ ރަޝިއާ ސިފައިން،" ކުލެބާ ވިދާޅުވި އެވެ.
ޔޫކްރެއިންގެ އިރުމަތީ ސަރަހައްދުގެ ބައެއް ހިސާބުތައް ކޮންޓްރޯލް ކުރަނީ ސަރުކާރާ ވަކިވެގަނެގެން އުޅޭ ރަޝިއާއަށް ތާއީދުކުރާ ގްރޫޕްތަކެވެ. އޭގެ އިތުރުން ޔޫކްރެއިންގެ ކްރައިމިއާގައި އޮންނަނީ ރަޝިއާގެ ބާރެވެ.
ކުލެބާ ނޫސްވެރިންނަށް ވިދާޅުވީ ޖަމާކޮށްފައިވާ ރަޝިއާ ސިފައިންގެ އަދަދުތަކުން "ޔޫކްރެއިނަށް ނުރައްކާ އެބަ އޮތް" ކަމަށެވެ. ނަމަވެސް އެއީ "ބޮޑު ހަމަލާއެއް ދެވޭ އަދަދުގެ ސިފައިން ނޫން" ކަމަށް ވިދާޅުވި އެވެ.
އެކަމަކު ކުރިއަށް އޮތް ދުވަސްތަކުގައި ސިފައިންގެ އަދަދު އިތުރު ކުރުމުގެ ގާބިލްކަން ރަޝިއާއަށް ލިބިގެންވާކަން އޭނާ ފާހަގަކުރެއްވި އެވެ.
ބޮޑު ހަމަލާއެއް ދެވޭ އަދަދުގެ ރަޝިއާ ސިފައިން ބޯޑަރު ކައިރީގައި ނެތް ކަމަށް ކުލެބާ ވިދާޅުވި އިރު، ހުޅަނގުގެ ގައުމުތަކާއި އެމެރިކާއިން ތަކުރާރުކޮށް ބުނަމުން ދަނީ ރަޝިއާއިން އޮތީ ކޮންމެ ވަގުތެއްގައި ވެސް ހަމަލާ ދޭން ތައްޔާރަށް ކަމަށެވެ.
ކުބެލާ ވިދާޅުވީ ނުރައްކާ އޮތް މިންވަރާއި ހާލަތު ދެނެގަތުމުގައި ޔޫކްރެއިނާއި އެމެރިކާ އަދި އެހެން ހުޅަނގުގެ ގައުމުތަކުގެ ވިސްނުން އެއް ގޮތް ކަމަށެވެ.
އޭނާ ތުހުމަތު ކުރެއްވި ގޮތުގައި ރަޝިއާއިން މަސައްކަތް ކުރަނީ "ބިރުވެރިކަން ފަތުރައި، ސައިބާ ހަމަލާތައް ދީގެން ޔޫކްރެއިންގައި ހަމަނުޖެހުން އުފެއްދުމަށެވެ."
މި މަހު ޔޫކްރެއިން ސަރުކާރުގެ ގިނަ ވެބްސައިޓްތަކަށް ދިން ބޮޑު ސައިބާ ހަމަލާގެ ފަހަތުގައި ވަނީ ރަޝިއާ ކަމަށް ޔޫކްރެއިނުން ބުނެ އެވެ. އަދި އިނގިރޭސިވިލާތުން ބުނީ ޔޫކްރެއިންގައި ރަޝިއާއަށް ތާއީދުކުރާ ސަރުކާރެއް ގާއިމްކުރަން ރަޝިއާއިން ރާވާ ކަމުގެ ހެކި އެބަހުރި ކަމަށެވެ.
