މޮސްކޯ، ރަޝިއާ (ޖެނުއަރީ 25) - ރަޝިއާގެ އިދިކޮޅު ލީޑަރު އެލެކްސީ ނަވަލްނީ އާއި އެމަނިކުފާނުގެ ގާތް ބައެއް މީހުންގެ ނަން ޓެރަރިސްޓުންގެ ލިސްޓުގައި ހިމަނައިފި އެވެ.
ފެޑެރަލް ސާވިސް ފޯ ފައިނޭންޝަލް މޮނިޓަރިންގެ ނިންމުން އައީ އިދިކޮޅު ފިކުރާ ދެކޮޅަށް ރަޝިއާގެ ސަރުކާރުން ކުރާ މަސައްކަތްތައް ވަރުގަދަކޮށްފައިވާ ދަނޑިވަޅެއްގަ އެވެ.
ނަވަލްނީ މިހާރު ވެސް ހުންނެވީ ޖަލު ބަންދުގަ އެވެ. އެމަނިކުފާނުގެ ސިޔާސީ ޖަމިއްޔާތަކަކީ ގާނޫނާ ހިލާފު ޖަމިއްޔާތަކެއް ކަމަށް މިދިޔަ އަހަރު ކަނޑައަޅާފައިވެ އެވެ.
ނަވަލްނީގެ އެންޓި ކޮރަޕްޝަން ފައުންޑޭޝަނުން ބުނީ އެމަނިކުފާނުގެ ނަމާއި އިތުރު ނުވަ މީހެއްގެ ނަން ޓެރަރިސްޓުންގެ ލިސްޓުގައި ހިމެނި ކަމަށެވެ. މި މަހުގެ ކުރީކޮޅު ވެސް ދެ މީހެއްގެ ނަން ލިސްޓުގައި ހިމެނި އެވެ.
ޓެރަރިސްޓުންގެ ލިސްޓުގައި ހިމެނޭ އެހެން ބައެއް ފަރާތްތަކަކީ އަފްގާނިސްތާނުގެ ތާލިބާނުންނާއި އިސްލާމިކް ސްޓޭޓް (އައިއެސް) ގްރޫޕެވެ.
އިދިކޮޅު ލީޑަރުންގެ ނަން ލިސްޓުގައި ހިމެނުމާ އެކު އެ މީހުންނަށް ސިޔާސީ އެއްވެސް މަގާމަކަށް ވާދަ ނުކުރެވޭނެ އެވެ. އަދި އެ މީހުންނާ ގުޅުން ހުރި ބޭންކް އެކައުންޓްތައް ހިފަހައްޓާނެ އެވެ.
