ޖެނީވާ، ސްވިޓްޒަލޭންޑް (ޖެނުއަރީ 25) - ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ވެރިޔަކަށް ދެ ވަނަ ދައުރަކަށް ޓެޑްރޯސް އަދަނޮމް ހަމަޖައްސަން ނޮމިނޭޓްކޮށްފި އެވެ.
އަންގާރަ ދުވަހު އޮތް އިޖުރާއީ ވޯޓުން ނިންމީ އެ މަގާމަށް ނޮމިނޭޓް ކުރާނީ ހަމައެކަނި ޓެޑްރޯސްގެ ނަން ކަމަށެވެ. އެހެންކަމުން އަންނަ މޭ މަހު އޮންނަ އިންތިހާބުގެ ކުރިން މަގާމު ކަށަވަރުވީ އެވެ.
ޓެޑްރޯސް އަކީ އދ. ގެ ސިއްހަތާ ބެހޭ އެޖެންސީގެ ވެރިޔަކަށް ހޮވުނު އެފްރިކާގެ ފުރަތަމަ މީހާ އެވެ. އޭނާ ވިދާޅުވީ "ސަޕޯޓް އާ ކުރެއްވުމުން" ޝުކުރު އަދާ ކުރާ ކަމަށެވެ.
ކޮވިޑް ބަލިމަޑުކަމާ ދެކޮޅަށް ދުނިޔޭގެ ފެންވަރުގައި ކުރާ މަސައްކަތުގައި އެންމެ ފާހަގަކުރެވޭ އެއް ޝަހުސިއްޔަތަކީ ޓެޑްރޯސް އެވެ.
އޭނާ ވިދާޅުވީ ފަސް އަހަރުގެ ފުރަތަމަ ދައުރަކީ "އުނދަގޫ އަދި ގޮންޖެހުންތައް ގިނަ" ދައުރެއް ކަމަށެވެ. އެ މަސައްކަތް ކުރިއަށް ގެންދަން ފުރުސަތު ލިބުމަކީ "ބޮޑު ފަހުރެއް" ކަމަށް ވިދާޅުވި އެވެ.
އާ ޑިރެކްޓަރު ޖެނެރަލް ހޮވަން އަންނަ މޭ މަހު ޑަބްލިއުއެޗްއޯގެ މެމްބަރު 194 ގައުމުން ވޯޓުލާ އިރު، އިތިއޮޕިއާގެ ކުރީގެ ހެލްތު އަދި ފޮރިން މިނިސްޓަރަށް ދެ ވަނަ ދައުރެއް ލިބިވަޑައިގަންނަވާނެ އެވެ.
މީގެ ދެ އަހަރު ކުރިން ކޮވިޑް ބަލިމަޑުކަން ކުރިމަތިވުމާ އެކު އުމުރުން 56 އަހަރުގެ މެލޭރިއާ ސްޕެޝަލިސްޓް އެޅުއްވި ފިޔަވަޅުތަކަށް ތައުރީފު ލިބިފައިވެ އެވެ.
ވަކިން ހާއްސަކޮށް އެފްރިކާ ބައްރަށް ދެއްވާ ސަމާލުކަން އިތުރުވެ، އެފްރިކާގެ ފަގީރު ގައުމުތަކަށް ކޮވިޑް ވެކްސިން ހޯދަން ކުރައްވާ މަސައްކަތާ މެދު އެ ގައުމުތަކުން އުފާކުރެ އެވެ.
ޓެޑްރޯސްއާ ދެކޮޅަށް އެންމެ ބޮޑު ފާޑުކިޔުމެއް އަމާޒުވީ އަމިއްލަ ގައުމު އިތިއޮޕިއާ އިންނެވެ.
އެގޮތުން އެ ގައުމުގައި އޭނާ ނިސްބަތްވާ ޓިގްރޭ ސަރަހައްދުގެ 14 މަސްވީ ހަނގުރާމައާ ދެކޮޅަށް ވާހަކަ ދެއްކެވުމުން އިތިއޮޕިއާގެ ސަރުކާރުން ހިތްހަމަނުޖެހުނެވެ.
މި މަހުގެ ކުރީކޮޅު ޓެޑްރޯސް ވިދާޅުވީ ޓިގްރޭ ސަރަހައްދުގެ ހާލަތު ވަރަށް ގޯސް ކަމަށާއި ސަރުކާރުން ދަނީ ބޭހާއި ފުރާނަ ސަލާމަތް ކުރަން ބޭނުންވާ ސާމާނު ފޯރުކޮށްދިނުމަށް ހުރަސް އަޅަމުން ކަމަށެވެ.
އިތިއޮޕިއާ ސަރުކާރުން ޑަބްލިއުއެޗްއޯގައި އެދުނީ ޓެޑްރޯސްއާ ދެކޮޅަށް ރަސްމީ ތަހުގީގެއް ހިންގުމަށެވެ. ނަމަވެސް އިތިއޮޕިއާ ސަރުކާރުގެ ފާޑުކިޔުމަށް އެހެން ގައުމުތަކުން އެއްބާރުލުމެއް ނުދެ އެވެ.
އެކަމަކު އެ ގައުމުގެ ސަރުކާރުން ވަނީ އެފްރިކާ ގައުމުތައް ހިމެނޭ އެފްރިކަން ޔޫނިއަން ޖަމިއްޔާއިން އެކުގައި ޓެޑްރޯސް އަށް ތާއީދުކުރާކަން ހާމަކުރަން އުޅުމުން އެކަމަށް ހުރަސް އަޅާފަ އެވެ.
އެކަމަކު އެފްރިކާގެ ގިނަ ގައުމުތަކުން ވެސް ނޮމިނޭޓް ކުރީ ޓެޑްރޯސްގެ ނަމެވެ. އެގޮތުން ޔޫރަޕްގެ ގިނަ ގައުމުތަކާ އެކު ޓެޑްރޯސްގެ ނަން ނޮމިނޭޓް ކުރި 28 ގައުމުގެ ތެރޭގައި ކެންޔާ އާއި ރްވާންޑާ ހިމެނެ އެވެ.
ޓެޑްރޯސް އަކީ އެމެރިކާގެ ތާއީދު ވެސް ވަރަށް ބޮޑަށް އޮތް ލީޑަރެކެވެ. ޓެޑްރޯސްގެ ބައެއް ވާހަކަތަކާ މެދު ޗައިނާއިން ހިތްހަމަނުޖެހުނު ނަމަވެސް، އެ ގައުމުން ވެސް ބޭނުންވީ އޭނާ ނޮމިނޭޓް ކުރުމަށެވެ.
ޓެޑްރޯސްގެ ދެ ވަނަ ދައުރުގެ އެންމެ ބޮޑު މަސައްކަތަކަށް ވާނީ ޑަބްލިއުއެޗްއޯ ވަރުގަދަކޮށް، އިސްލާހީ ބަދަލު ގެނައުން ކަމުގައި ބެލެވެ އެވެ.
