ލަންޑަން، އިނގިރޭސިވިލާތް (ޖެނުއަރީ 25) - ކޮވިޑާ ގުޅިގެން އަޅާފައިވާ އުސޫލުތަކާ ހިލާފަށް އިނގިރޭސި ބޮޑު ވަޒީރު އޮފީހުގައި ބޭއްވި ޕާޓީތަކުގެ ޖިނާއީ ތަހުގީގެއް ފުލުހުން ފަށައިފި އެވެ.
ގައުމު ލޮކްޑައުންކޮށްފައި ވަނިކޮށް ބޭއްވި ޕާޓީތަކުގެ މައްސަލައާ ހެދި ބޮޑު ވަޒީރު ބޮރިސް ޖޯންސަން އަށް ދަނީ ގިން ފިއްތުންތަކާ ކުރިމަތިވެ، އިސްތިއުފާ ދިނުމަށް މަޖުބޫރުވަމުންނެވެ.
އިނގިރޭސި ނޫސްތަކުން އެންމެ ފަހުން ފަޅާ އަރުވާލި މައްސަލައިގައިވާ ގޮތުން ޖޫން 19، 2020 ވަނަ އަހަރު ޖޯންސަން ވަނީ އެމަނިކުފާނުގެ އުފަން ދުވަހުގެ ޕާޓީ ވެސް އޮފީހުގައި ބާއްވާފަ އެވެ.
އައިޓީވީ ނިއުސް އިން ހަބަރު ފެތުރި ގޮތުގައި އެ ޕާޓީ އަށް 30 މީހުން ޖަމާވި އެވެ. ނަމަވެސް އޭރު އަޅާފައިވާ ފިޔަވަޅުތަކުގެ ދަށުން އެއް ތަނެއްގައި ތިބެވޭނީ ގިނަވެގެން ހަ މީހުންނަށެވެ.
ފާއިތުވި ދެ އަހަރު ތެރޭގައި ބޮޑު ވަޒީރުގެ އޮފީހުން ކޮވިޑް އުސޫލާ ހިލާފަށް ބޭއްވި ގިނަ ޕާޓީތަކެއްގެ ވާހަކަ ހާމަވެފައިވާ އިރު، ޖިނާއީ ތަހުގީގެއް ނުކުރާތީ ފުލުހުންނަށް ވެސް ޕްރެޝަރާ ކުރިމަތިވި އެވެ.
ފުލުހުންގެ ކޮމިޝަނަރު ކްރެސިޑާ ޑިކް އަންގާރަ ދުވަހު ވިދާޅުވީ ޖިނާއީ ތަހުގީގެއް ފަށާފައިވާ ކަމަށާއި މައްސަލައާ ގުޅޭ ފަރާތްތަކާ ރަސްމީކޮށް ސުވާލުކުރަމުންދާ ކަމަށެވެ.
ޖިނާއީ ތަހުގީގުގެ އިތުރުން، ސަރުކާރުގެ ތެރެއިން ވެސް ޕާޓީތަކާ ގުޅޭ ވަކި ތަހުގީގެއް ކުރިއަށް އެބަދެ އެވެ. އެ ތަހުގީގު ރިޕޯޓު ވަރަށް އަވަހަށް އާއްމުކުރާނެ ކަމަށް ބެލެވެ އެވެ.
ފުލުހުންގެ ތަހުގީގު ފަށައިފި ނަމަ ސަރުކާރުގެ ތަހުގީގު ހުއްޓާލަން ޖެހޭނެ ކަމަށް އޮތީ ބެލެވިފަ އެވެ. ނަމަވެސް ކެބިނެޓް އޮފީހުގެ ތަރުޖަމާނު ވިދާޅުވީ ތަހުގީގު ނުހުއްޓޭ ކަމަށެވެ.
މީގެ ކުރިން 2007 ވަނަ އަހަރު ލޭބާ ޕާޓީގެ ބޮޑު ވަޒީރު ޓޯނީ ބްލެއާއާ ފުލުހުންގެ ޖިނާއީ ތަހުގީގަކަށް އިންޓަވިއު ކުރެއްވި އެވެ. ނަމަވެސް އެއްވެސް ދައުވާއެއް އުފުލާފައެއް ނުވެ އެވެ.
