ރާއްޖޭގެ ފޮޓޯއެއް ސޯޝަލް މީޑިއާގައި ހިއްސާކޮށްގެން ބ. މާޅޮހު ގެސްޓްހައުސްއެއްގައި ދެ ރޭ ހުރުމުގެ ފުރުސަތު ލިބޭ ގިވްއަވޭއެއް އުރީދޫ އިން ފަށައިފި އެވެ.
މިއީ އެ ކުންފުންޏާއި، އެމްއެމްޕީއާރުސީ އަދި ޓޫރިޒަމް މިނިސްޓްރީގެ އިތުރުން އޯކާ މީޑިއާ ގްރޫޕް ގުޅިގެން ކުރިޔަށްގެންދާ "ވިޒިޓް މޯލްޑިވްސް ނައު" ސޯޝަލް މީޑިއާ ކެމްޕޭންގެ ދަށުން ބާއްވާ ގިވްއަވޭއެކެވެ. ރާއްޖޭގެ ފަތުރުވެރިކަން ދުނިޔޭގައި ޕްރޮމޯޓުކުރުމުގެ ގޮތުން ހިންގާ އެ ޕްރޮމޯޝަންގައި މީގެ ކުރިންވެސް ބޮޑެތި އިނާމްތަކަކަށް ހުޅުވާލި އެވެ.
މިފަހަރުގެ ތީމެއްގެ ގޮތުގައި ކަނޑައަޅާފައިވަނީ "ތްރިލިން އެޑްވެންޗާސް އިން މޯލްޑިވްސް" އެވެ. މި ތިމާ ގުޅޭ ފޮޓޯތައް ރާއްޖޭގެ ކޮންމެ ސަރަހައްދެއްގައި ހުރެގެންވެސް ހިއްސާކޮށްގެން މި ގިވްއަވޭގައި ބައިވެރިވެވޭނެކަން ފާހަގަކުރަމުން އުރީދޫ އިން ބުނީ، ފޮޓޯ އަޕްލޯޑް ކުރާއިރު #ވިޒިޓްމޯލްޑިވްސް ޖަހަން ޖެހޭނެ ކަމަށެވެ. ފެބްރުއަރީ 14، އާ ހަމަޔަށް މި ގިވްއަވޭގައި ބައިވެރިވެވޭނެ އެވެ.
މި ގިވްއަވޭއިން ހޮވޭ މީހަކަށް ބ. މާޅޮހުގައި ހުންނަ ތުނޑި ވިލެޖު ގެސްޓްހައުސްގައި ދެ މީހަކަށް ދެ ރޭ ހުރުމުގެ ފުރުސަތު ލިބިގެންދާނެ އެވެ. މިއީ ބީޗް ފްރޮންޓަށް ވާ ގޮތަށް 18 ކޮޓަރި އާއި ރެސްޓްރޯންޓަކާއި ޑައިވް ސްކޫލެއްގެ އިތުރުން ސްޕާއެއް ހުންނަ ގެސްޓްހައުސްއެކެވެ.
މި ގިވްއަވޭއާ ބެހޭ އެންމެފަހުގެ މައުލޫމާތުތައް ވެސް އުރީދޫގެ ސޯޝަލް މީޑިއާ ޕްލެޓްފޯމްތަކުގައި އަންނަނީ ހިއްސާކުރަމުންނެވެ.
