ޓެރަރިޒަމާއި ހަރުކަށި ފިކުރާ ދެކޮޅަށް ރާއްޖޭގައި ބޮޑު އޮޕަރޭޝަނެއް ކުރިއަށް ގެންދިއުމަށްޓަކައި، ސައުދީ އަރަބިއްޔާއިން އުފައްދާފައިވާ "އިސްލާމިކް މިލިޓަރީ ކައުންޓާ ޓެރަރިޒަމް ކޯލިޝަން" (އައިއެމްސީޓީސީ) ގެ އެހީތެރިކަމަށް އެދެފި އެވެ.
ދީނީ ގޮތުން ހައްދުފަހަނަ އަޅާ ގޮސްފައިވާ ޓެރެރިޒަމްގެ ފިކުރާ ދެކޮޅަށް އެކި ގައުމުތަކާ ގުޅިގެން މަސައްކަތް ކުރާ ސައުދީގެ އެ ކޯލިޝަންގެ ސެކްރެޓަރީ ޖެނެރަލް، މޭޖަ ޖެނެރަލް މުހައްމަދު ބިން ސައީދު އަލްމޮގައިދީ ރާއްޖެއަށް ކުރެއްވި ރަސްމީ ދަތުރުގައި އިއްޔެ ވަނީ ޑިފެންސް މިނިސްޓަރު މާރިޔާ ދީދީއާ ބައްދަލުކުރައްވާފަ އެވެ.
އިސްލާމީ ގައުމުތަކުން ގުޅިގެން ޓެރަރިޒަމާއި ހަރުކަށި ފިކުރާ ދެކޮޅަށް ސަލާމަތާއި ރައްކާތެރިކަމުގެ ފިޔަވަޅުތައް އެޅުމުގެ މަގުސަދުގައި އުފައްދާފައިވާ އެ ކޯލިޝަނުން ވަނީ ޓެރަރިސްޓު ހަމަލާތަކުން ރައްކާތެރިވުމަށް ބޭނުންވާ އާލާތްތައް ރާއްޖެއަށް ފޮނުވައިގެން އެ މަސައްކަތް އިތުރަށް ވަރުގަދަ ކުރުމާ ގުޅޭ ގޮތުން މަޝްވަރާކޮށްފަ އެވެ.
އަދި އިސްލާމްދީނުގައި ކަން އޮންނަ ގޮތް އާންމުންނަށް ރަނގަޅަށް އޮޅުންފިލުވައިދޭނެ ދީނީ އިލްމުވެރިން ފޮނުވާނެ ކަމަ ށްވެސް އެމީހުން ބުންޏެވެ.
ޓެރަރިޒަމާއި ހަރުކަށި ފިކުރާ ދެކޮޅަށް މި ސަރުކާރުން ގެންގުޅެނީ "ޒީރޯ ޓޮލަރެންސް" ސިޔާސަތެއްކަން ފާހަގަކުރައްވައި، އެ ބައްދަލުވުމުގައި ޑިފެންސް މިނިސްޓަރު މާރިޔާ ދީދީ ވަނީ އެ ފިކުރާ ދެކޮޅަށް ގައުމީ އަދި ބައިނަލްއަގްވާމީ ފެންވަރުގައި މަސައްކަތް ކުރައްވާނެ ކަމަށް ވިދާޅުވެފަ އެވެ.
އެ ވާހަކައާ ގުޅިގެން އައިއެމްސީޓީސީގެ ސެކްރެޓަރީ ޖެނެރަލް ވަނީ، ޓެރަރިޒަމާއި ހަރުކަށި ފިކުރާ ދެކޮޅަށް ރާއްޖޭގައި ކުރަމުން ގެންދާ މަސައްކަތުގައި، އެ ކޯލިޝަންގެ ފުރިހަމަ އެއްބާރުލުމާއި އެހީތެރިކަން ލިބޭނެ ކަމުގެ ޔަގީންކަން ދީފަ އެވެ.
އެމްއެންޑީއެފުން ބުނާ ގޮތުގައި ސައުދީ އަރަބިއްޔާގެ ވެރިރަށް ރިއާދުގައި ގާއިމްކޮށްފައިވާ އައިއެމްސީޓީސީގެ ކައުންޓާ ޓެރަރިޒަމް ސެންޓަރުގައި 2020 ވަނަ އަހަރުން ފެށިގެން ދިވެހި ސިފައިންގެ ޓީމެއް އަންނަނީ ހަރަކާތްތެރިވަމުންނެވެ. އިއްޔެ ހެނދުނު ބޭއްވި އެ ބައްދަލުވުމުގައި އެއް އަހަރު ދުވަހަށް ވެފައިވާ އެ އެއްބަސްވުމުގެ މުއްދަތު އިތުރުކޮށްފައިވާކަން އެ އިދާރާއިން ފާހަގަކުރެ އެވެ.
އިސްލާމީ ގައުމުތަކުން ގުޅިގެން ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތްކުރުމަށްޓަކައި 2015 ވަނަ އަހަރު އުފެއްދި އެ ކޯލިޝަންގައި 41 ގައުމެއް މެމްބަރުންގެ ގޮތުގައި ތިބިއިރު، ހަރުކަށި ފިކުރުގެ ނުރައްކާތެރިކަން ރާއްޖެއަށް އިންތިހާއަށް އެބައޮތް ކަމަށް ދިވެހި ސަރުކާރުން ދެކެ އެވެ.
