އިސްލާމްއާބާދް، ޕާކިސްތާން (ޖެނުއަރީ 24) - ޕާކިސްތާނުގެ ސުޕްރީމް ކޯޓަށް ފުރަތަމަ ފަހަރަށް އަންހެން ފަނޑިޔާރަކު ހަމަޖައްސައިފި އެވެ.
ފަނޑިޔާރު އައިޝާ މާލިކް އަށް މަގާމުގެ ހުވާލައްދެއްވީ ހޯމަ ދުވަހު ކުރިއަށް ދިޔަ ރަސްމިއްޔާތެއްގައި އުއްތަމަ ފަނޑިޔާރު ގުލްޒަރް އަހްމަދް އެވެ.
ޕާކިސްތާނުގެ އެންމެ މަތީ ކޯޓުގެ ފަނޑިޔާރުންގެ ގޮތުގައި ދެން ތިއްބަވާނީ އެކަމަނާއާ އެކު 16 ފިރިހެން ބޭފުޅުންނެވެ. އެއީ އަންހެނުންގެ ހައްގުތަކާއި ޖިންސުގެ ހަމަހަމަކަން ގާއިމްކުރުމުގައި ލިބުނު ކުރިއެރުމެއްގެ ގޮތުގައި އެކްޓިވިސްޓުން ދަނީ ސިފަކުރަމުންނެވެ.
"މިއީ ކުރިއަށް އެޅުނު ވަރަށް ބޮޑު ފިޔަވަޅެއް. މިއީ ޕާކިސްތާނުގެ ޖުޑިޝަރީއަށް ތާރީހީ ދުވަހެއް،" ގާނޫނީ ވަކީލް އަދި އަންހެނުންގެ ހައްގުތަކަށް ވަކާލާތު ކުރާ އެކްޓިވިސްޓް ނިގްހަތް ދާދް އޭއެފްޕީއަށް ވިދާޅުވި އެވެ.
ފަނޑިޔާރު އައިޝާ މާލިކް ތައުލީމް ހާސިލް ކުރެއްވީ ހާވާޑް ޔުނިވާސިޓީންނެވެ. ފާއިތުވި 20 އަހަރު އެކަމަނާއަކީ އިރުމަތީގައި އޮންނަ ލާހޯރް ސިޓީގެ ހައި ކޯޓުގެ ފަނޑިޔާރެކެވެ.
އާދަކާދަ އޮންނަ ގޮތުގެ ސަބަބުން އަންހެނުންގެ މައްޗަށް ފިރިހެނުންގެ ބާރު ހިންގަން މަގުފަހިވާ ގޮތަށް ހުންނަ ކަންކަން ބަދަލު ކުރުމުގައި އެކަމަނާ ގިނަ މަސައްކަތްތަކެއް ކުރައްވާފައިވެ އެވެ.
މިދިޔަ އަހަރު އެކަމަނާ ވަނީ ރޭޕް އާއި ޖިންސީ އަނިޔާއާ ގުޅިގެން ޕާކިސްތާނުގައި އަންހެނުން ހަދަން މަޖުބޫރުވި ޕްރޮސީޖާއެއް ގާނޫނާ ހިލާފު ކަމަށް ކަނޑައަޅުއްވާފަ އެވެ. އެއީ ސިއްހީ ގޮތުން ވެސް ހެދުން ރަނގަޅު ނޫން ޕްރޮސީޖާއެއް ކަމަށް ޑޮކްޓަރުން ބުނެފައިވެ އެވެ.
ރޭޕް އާއި ޖިންސީ ގޯނާގެ މައްސަލަތަކުގައި ޕާކިސްތާނުގެ އަންހެނުންނަށް އިންސާފު ހޯދުން އުނދަގުލެވެ. އެފަދަ އަނިޔާއާ ކުރިމަތިވާ އަންހެނުން ހަދަން މަޖުބޫރު ކުރުވި ޕްރޮސީޖާއަކީ އެ މީހުންގެ ތުހުމަތު ދޮގުކޮށް، ގޯސް އުޅުމެއް އުޅޭ ކަމަށް ދެއްކުމަށް ހަދާ ޕްރޮސީޖާ އެކެވެ.
ތާރީހީ ގޮތުން ޕާކިސްތާނުގެ ޖުޑިޝަރީގެ ކޮންޓްރޯލް އޮންނަނީ ފިރިހެނުންގެ އަތުގަ އެވެ. އެހެންކަމުން ފަނޑިޔާރު އައިޝާއަށް ލިބިވަޑައިގެންނެވި ކުރިއެރުމަކީ އެ ދާއިރާއަށް އިތުރު އަންހެނުން ވަނުމަށް ހިތްވަރު ލިބޭނެ ކަމެކެވެ.
"އެކަމަނާ ވަނީ ގާނޫނީ ނިޒާމުގައި ހުރި ހުރިހާ ގޮންޖެހުންތަކެއް ގިރާކޮށްފައި. އޭގެ ސަބަބުން މި ނިޒާމުގެ ތެރޭގައި އުޅޭ އެހެން އަންހެނުންނަށް ކުރިއަށް ދާން މަގުފަހިވާނެ،" ގާނުނީ ވަކީލް އަދި އަންހެނުންގެ ހައްގުތަކަށް ވަކާލާތު ކުރާ އެކްޓިވިސްޓް ހަދީޖާ ސިއްދީގީ ވިދާޅުވި އެވެ.
"އަޅުގަނޑުގެ އުއްމީދަކީ މީގެ ސަބަބުން މުސްތަގްބަލުގައި ބޮޑަށް އަންހެނުންގެ ބައިވެރިވުން ހިމެނޭ ނިންމުންތަކެއް ޖުޑިޝަރީއިން އައުން."
ނަމަވެސް އެ މަގާމަށް އެކަމަނާ ހަމަޖައްސަން ނިންމުމާ އެކު ފާއިތުވި ހަތަރު މަސް ތެރޭގައި ބޮޑެތި ފާޑުކިޔުންތައް އައެވެ. އެގޮތުން އެ މަގާމަށް ޝަރުތު ހަމަވާ އަދި ގިނަ އަހަރު މަސައްކަތުގައި ހޭދަކޮށްފައިވާ ފިރިހެން ކެންޑިޑޭޓުން ކިޔު ފަޅާލީ ކަމަށް ތުހުމަތު ކުރަން ފެށި އެވެ.
މި މަހުގެ ކުރީކޮޅު ޕާކިސްތާން ބާ ކައުންސިލުން ވެސް އެކަމަނާ އެ މަގާމަށް އައްޔަނު ކުރުމާ ދެކޮޅަށް މުޒާހަރާ ކުރި އެވެ.
