މިލާން، އިޓަލީ (ޖެނުއަރީ 24) - އިޓާލިއަން ސެރީއާގައި އޭސީ މިލާން އާއި ޔުވެންޓަސް ވާދަކުރި މެޗު ލަނޑެއް ނުޖެހި 0-0 އިން އެއްވަރުވުމުގެ ފައިދާނަގައި ނަޕޯލީ އިން ތާވަލްގެ ދެ ވަނަ އަށް ޖެހިލައިފި އެވެ.
އިޓާލިއަން ލީގުގެ އެއް ވަނައިގައި އިންޓަ މިލާން އޮތީ 22 މެޗުން 53 ޕޮއިންޓާ އެކު އެވެ. އެންމެ ފުލުގައި އޮތް ސަލެނިޓާނާ އަތުން 4-1 އިން މޮޅުވި ނަޕޯލީ ދެ ވަނަ އަށް އެރީ 23 މެޗުން 49 ޕޮއިންޓާ އެކު އެވެ. ތިން ވަނައިގައި އޮތް މިލާނަށް ވެސް ވަނީ 23 މެޗުން 49 ޕޮއިންޓް ލިބިފަ އެވެ. އެޓަލަންޓާ ހަތަރެއްގައި އޮތީ 22 މެޗުން 43 ޕޮއިންޓާ އެކު އެވެ. އަދި ޔުވެންޓަސް ފަސް ވަނައިގައި އޮތީ 23 މެޗުން 42 ޕޮއިންޓް ހޯދައިގެންނެވެ.
މިލާނުގެ ސެން ސީރޯގައި ރޭ ކުޅުނު މެޗުގައި ދެ ޓީމަށް ވެސް ގޯލް ޖަހަން ލިބުނީ މަދު ފުރުސަތު ތަކެވެ. ނަމަވެސް މިލާން އިން ފޮނުވާލި ހަމަލާތަކުގެ ނުރައްކާ މާ ބޮޑެވެ. ޔުވެންޓަސްގެ ކީޕަރު ވޮޒްޝިއޭ ޝެޒްނީ މެޗުގައި ނުރައްކާ ތިން ހަމަލާއެއް މަތަކުރި އެވެ. ޔުވެންޓަސްގެ އެޓޭކް ރޭގެ މެޗުގައި ފެނުނީ އާދައިގެ ގޮތަކަށެވެ. ޕައޮލޯ ޑިބާލާ ފަހަކަށް އައިސް ރަނގަޅު ފޯމެއްގައި ހުރި ނަމަވެސް ރޭގެ މެޗުގައި އޭނާ ހުއްޓުވުމުގައި މިލާންގެ މެދުތެރެއިން ސަންޑްރޯ ޓޮނާލީ ފަދަ ކުޅުންތެރިން މޮޅަށް ކުޅުނެވެ.
އަމިއްލަ ދަނޑުގައި ރޭ ނަޕޯލީން ސަލެނިޓާނާ ބަލިކުރިއިރު، މި މެޗުގައި ނަޕޯލީން ލީޑުނެގީ 17 ވަނަ މިނިޓްގައި އެލްފް އެލްމާސް ދިން ބޯޅައަކުން ހުއާން ހެސޫސް އެވެ. ސަލެނިޓާނާ އިން ވަނީ މެޗުގެ 33 ވަނަ މިނިޓްގައި ފެޑެރީކޯ ބޮނަޒޮއްލީގެ ގޯލުން އެއްވަރުކޮށްފަ އެވެ. ފުރަތަމަ ހާފު ނިމުމުގެ ކުރިން ލިބުނު ޕެނަލްޓީ އަކުން ޑްރީސް މާޓެންސް ވަނީ އަލުން ނަޕޯލީ އަށް ލީޑުނަގައިދީފަ އެވެ. އަދި ދެ ވަނަ ހާފް ފެށިގެން ދެ މިނިޓް ތެރޭ މާޓެންސް ދިން ބޯޅައަކުން އަމީރް ރަހްމާނީ ވަނީ ނަޕޯލީގެ ލީޑުފުޅާކޮށްދީފަ އެވެ.
ދެ ގޯލު ފަހަތުގައި އޮއްވައި މެޗުގެ 51 ވަނަ މިނިޓްގައި ސަލެނިޓާނާގެ ފްރެޑެރިކް ވެސެލީ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. ލިބުނު ޕެނަލްޓީ ކާމިޔާބުކޮށް ނަޕޯލީގެ ލޮރެންޒޯ އިންސީނިއޭ ވަނީ އެ ޓީމަށް މެޗުގެ ތިން ޕޮއިންޓް ވެސް ކަށަވަރުކޮށްދީފަ އެވެ.
ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އިން ވަނީ ރޭ އެމްޕޮލީ ދަނޑުގައި 4-2 އިން މޮޅުވެފަ އެވެ. އެއް ކުޅުންތެރިއަކު މަދުކޮށް ފިއޮރެންޓީނާ އިން ވަނީ 1-1 އިން ކަލިއަރީ ދަނޑުގައި އެއްވަރުވެފަ އެވެ.
