ލަންޑަން، އިނގިރޭސިވިލާތް (ޖެނުއަރީ 23) - އިނގިރޭސިވިލާތުގެ ކުރީގެ ޓްރާންސްޕޯޓް މިނިސްޓަރު ނުސްރަތް ގަނީ މަގާމުން ވަކިކުރީ މުސްލިމަކަށް ވާތީ ކަމަށް އޭނާ ތުހުމަތުކޮށްފި އެވެ.
ސަންޑޭ ޓައިމްސް އަށް ދެއްވި އިންޓަވިއުގައި ނުސްރަތު ވިދާޅުވީ 2020 ވަނަ އަހަރު އެކަމަނާ މަގާމުން ވަކިކުރަން ނިންމީ މުސްލިމަކަށް ވާތީ އެހެން ވެރިންނަށް "އުނދަގޫވެގެން" ކަމަށެވެ.
"ކޮންޒަވޭޓިވް ޕާޓީއަކީ އިސްލާމްދީނާ ދެކޮޅު ޕާޓީއެއް ކަމަށް ކުރަމުން ދިޔަ ތުހުމަތުތަކާ ދެކޮޅަށް އަޅުގަނޑު މަސައްކަތް ނުކުރާ ކަމަށް ބުނެ، އަޅުގަނޑަކީ ޕާޓީއަށް ވަފާތެރި ނޫން މީހެއް ކަމުގެ ކަންބޮޑުވުންތައް ހުރި،" ނުސްރަތު ވިދާޅުވި އެވެ.
އެފަދަ ތުހުމަތެއް ކުރުމާ އެކު ކޮންޒަވޭޓިވް ޕާޓީގެ ޗީފްވިޕް މާކް ސްޕެންސާ ވިދާޅުވީ އެއީ ދޮގު ވާހަކަތަކެއް ކަމަށެވެ. އަދި އެއީ އަބުރަށް އުނިކަން ލިބޭ ވާހަކަތަކެއްގެ ގޮތުގައި ސިފަކުރެއްވި އެވެ.
ނަމަވެސް ކޮންޒަވޭޓިވް ޕާޓީގެ ބައެއް ޕާލިމެންޓް މެމްބަރުން ވަނީ ނުސްރަތުގެ ދިފާއުގައި ވާހަކަ ދައްކަވާފަ އެވެ. އެގޮތުން ނުސްރަތާ މެދު އަމަލު ކުރީ "ހައިރާން ކުރަނިވި" ގޮތަކަށް ކަމަށް ބުންޏެވެ.
ޕާލިމެންޓްގައި އަންހެނުންނާއި ހަމަހަމަކަމާ ގުޅޭ ކޮމިޓީގެ ރިޔާސަތު ބަލަހައްޓަރާ ކެރޮލީން ނޯކްސް ވިދާޅުވީ އެކަމާ ދެކޮޅަށް ނުސްރަތު އަޑު އުފުއްލެވުމުން ރަމްޒުކޮށްދެނީ އެކަމަނާގެ ހިތްވަރު ކަމަށެވެ.
އެޑިއުކޭޝަން ސެކެޓްރީ ނަޒީމް ޒަހާވީ ވިދާޅުވީ ނުސްރަތު ކުރެއްވި ތުހުމަތު ފުރިހަމައަށް ތަހުގީގުކޮށް، ނަސްލީ ތަފާތުކުރުން ފޮހެލަން ޖެހޭނެ ކަމަށެވެ.
ދެހާސް ފަނަރަ ވަނަ އަހަރު ޓްރާންސްޕޯޓް މިނިސްޓަރުގެ މަގާމުގެ ނުސްރަތަށް ލިބިވަޑައިގެންނެވުމުން، ޓްރާންސްޕޯޓް ސެކެޓްރީ ކްރިސް ގެއިލިން އެކަން ސިފަކުރެއްވީ ކުރިއެރުމެއްގެ ގޮތުގަ އެވެ.
އެގޮތުން ކޮންޒަވޭޓިވް ޕާޓީއަކީ "ފުރުސަތުގެ ޕާޓީއެއް" ކަމަށް ވިދާޅުވި އެވެ. ނަމަވެސް ބޮޑު ވަޒީރު ބޮރިސް ޖޯންސަންގެ ވެރިކަމުގައި މުސްލިމުންނާ ދެކޮޅު ފިކުރު ފުޅާވަމުންދާ ކަމަށް ބައެއް މީހުން ތުހުމަތު ކުރެ އެވެ.
