ބެއިރޫތް، ލުބްނާން (ޖެނުއަރީ 22) - ސީރިއާގައި ކުރުދީންގެ ފައުޖާއި އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕާ ދެމެދު މީގެ ތިން ދުވަސް ކުރިން ފެށި ހަނގުރާމަ ވަރުގަދަ ވާން ފަށައިފި އެވެ.
އެ ހަނގުރާމަ ފެށީ އައިއެސްގެ ޓެރަރިސްޓުން ބަންދުކޮށްފައި ތިބި ޖަލަކަށް އެ ގްރޫޕުން ދިން ހަމަލާއަކަށް ފަހު އެވެ. ހަމަލާގައި 70 އަށް ވުރެ ގިނަ މީހުން މަރުވި އެވެ.
އުތުރު ހަސަކެހް ސިޓީގައި ހުންނަ ގްވައިރަން ޖަލަށް ދިން ހަމަލާއަކީ މީގެ ތިން އަހަރު ކުރިން އައިއެސްގެ ބާރު ކަނޑުވާލި ފަހުން އެ ގްރޫޕުން ދިން އެންމެ ބޮޑު އެއް ހަމަލާ އެވެ.
"ކުރުދީ ސިފައިންގެ 28 މީހުންނާއި، އާއްމުންގެ ފަސް މީހުންނާއި، އައިއެސް ގްރޫޕުގެ 45 މީހުން އެ ހަމަލާގައި މަރުވި،" ސީރިއަން އޮބްޒަވޭޓަރީ ފޯ ހިޔުމަން ރައިޓްސް އިން ބުންޏެވެ.
އައިއެސް އިން ބުރާސްފަތި ދުވަހުގެ ރޭ ހަމަލާ ދިން ޖަލުގައި އެ ގްރޫޕުގެ 3،500 މެމްބަރުން ތިއްބެވެ. އޭގެ ތެރޭގައި ގްރޫޕުގެ ބައެއް ލީޑަރުން ވެސް ހިމެނެ އެވެ.
ޖަލަށް ދިން ހަމަލާއާއެކު ބަންދުކޮށްފައި ތިބި ގިނަ ޓެރަރިސްޓުންތަކެއް ވަނީ ޖަލުން ހަތިޔާރުތައް ވަގަށް ނަގައިގެން ފިލާފަ އެވެ. އޭގެ ފަހުން އެތައް ސަތޭކަ ބަޔަކު އަނބުރާ ހައްޔަރު ކުރި ނަމަވެސް، އަދިވެސް ގިނަ ބަޔަކު ފެނިފައެއް ނުވެ އެވެ.
މިހާރު ކުރުދީންގެ ފައުޖު ވަނީ އެ ޖަލު ވަށާލާފަ އެވެ. މި ވަގުތު ހަނގުރާމަ ކުރިއަށް ދަނީ ޖަލުގެ އުތުރު ފަޅީގަ އެވެ. ހުކުރު ދުވަހު ނެރުނު ބަޔާނެއްގައި އައިއެސް އިން ބުނީ ހަމަލާގެ އަމާޒަކީ ޓެރަރިސްޓުން މިނިވަން ކުރުން ކަމަށެވެ.
