މަސް ދޯނި ފަހަރުގައި ހަރުކޮށްފައިވާ ވެސެލް ލޮކޭޝަން ޑިވައިސް (ވީއެލްޑީ) އިން ވޮއިސް ކޯލް އެޑްއޮން ނަންގަވައި ފޯން ކޯލް ހިދުމަތް ހޯދޭނެ ގޮތް ހަދައިފި އެވެ.
ވީއެލްޑީ އަކީ އޮޑިވެރިޔާ އަށް ދޯނި އޮތް ސަރަހައްދު ފަސޭހަ ކަމާއެކު ހޭދޯ، ދޯނިން އެމަޖެންސީ ކޯލް ކުރުމާއި މަސް ބޭނި މިންވަރު މިނިސްޓްރީ އަށް ރިޕޯޓްކުރެވޭނެ ޑިވައިސްއެކެވެ.
އެ ޑިވައިސްއަށް އަލަށް ތައާރަފުކުރި ވޮއިސް ކޯލް ހިދުމަތުން ރާއްޖޭގެ ކޮންމެ ނަންބަރަކަށް އަދި ޑިވައިސް ހަރުކޮށްފައިވާ ކޮންމެ އުޅަނދަކަށް ވެސް ގުޅާލެވޭނެ އެވެ.
ދޯނިފަހަރުގައި ވީއެލްޑީ ހަރުކުރަން ސަރުކާރުން 2019 ވަނަ އަހަރު ހުޅުވާލި ބީލަން ކާމިޔާބުކުރީ އުރީދޫ މޯލްޑިވްސްއިނެވެ.
އެ ޑިވައިސް ގެންގުޅުއްވާ ފަރާތްތަކަށް ވޮއިސް އެޑް އޮންގެ ހިދުމަތް ތައާރަފުކުރީ އެއީ މުހިންމު އަދި މަސްވެރިން އެދޭ ހިދުމަތަކަށް ވުމުންނެވެ. އެ ޕެކޭޖް އެކްޓިވޭޓް ކުރުމަށް ގުޅަންޖެހޭނީ ފިޝަރީޒް މިނިސްޓްރީގެ ހޮޓްލައިން 3033444 އަށެވެ.
ވީއެލްޑީގެ މަޝްރޫއުގެ ދަށުން 732 ޑިވައިސް ހަރުކުރަން ޖެހޭއިރު، ކޮވިޑްގެ ބަލިމަޑުކަމާއެކު އެ މަސައްކަތް ކުރިއަށް ގެންދިއުމަށް ދަތިތަކެއް ކުރިމަތިވި ނަމަވެސް، މިހާތަނަށް 326 ދޯންޏެއްގައި ޑިވައިސް ވަނީ ހަރުކޮށްފަ އެވެ.
