ދިރިހުރުމަކީ އަސާސީހައްގެއް ކަމަށް ޔާމީން ރަޝީދު ދުނިޔޭގައި ހުރިއިރު ގަބޫލުކުރި ކަމަށާއި، އެހެންވެ ގިސޯސްހިފަން ބޭނުން ނޫން ކަމަށް ބުނުމުން ޔާމީން ރަޝީދު މަރައިލި ކަމަށް މިއަދު ކުށް ސާބިތުވި ދެ މީހުން މަރުގެ އަދަބުން ސަލާމަތްވެއްޖެ އެވެ.
މީގެ ފަސް އަހަރު ކުރިން ވަރަށް އަނިޔާވެރިކޮށް ވަޅިން ހަމަލާދީ ބްލޮގަރު ޔާމީން ރަޝީދު މަރާލިކަމުގެ ކުށް ސާބިތުވާ ކަމަށް ކަނޑައެޅީ މ. އަންނާރުމާގޭ، އިސްމާއީލް ހައިޝަމް ރަޝީދު އަދި މ. އިރާސްމިކުގޭ، އަހުމަދު ޒިހާން އިސްމާއީލްގެ މައްޗަށެވެ.
އަދަބު ކަނޑައަޅަން ވާރިސުން ބަސް ނެގުމަށް ކްރިމިނަލް ކޯޓުގައި އޮތް ޝަރީއަތުގައި، ޔާމީން ރަޝީދުގެ މަންމަ މަރިޔަމް ޝަފީގާ ބުނީ ދުނިޔޭގައި ހުރިއިރު ޔާމީން ރަޝީދަކީ އިންސާނީ ހައްގުތަކަށް ވަކާލާތުކުރި ކުއްޖެއް ކަމަށެވެ.
"އިންސާނަކަށްވީތީ ދިރިހުރުމަކީ އަސާސީ ހައްގެއްކަމަށް ދަރިފުޅު ދެކޭ. އެ ހައްގު އަޅުގަނޑުގެ ދަރިފުޅުގެ ކިބައިން ވަނީ ނިގުޅައި ގަނެފައި. ވީމާ ގިސޯސްހިފާކަށް ބޭނުމެއް ނޫން،" ޔާމީންގެ މަންމަ ބުންޏެވެ.
ޔާމީންގެ މަންމަ ބުނީ ގިސޯސްގެ ބަދަލުގައި ބޭނުމީ ދިޔަ ކަމަށެވެ. އެއީ އޭގެން ޔާމީންގެ ނަމުގަ ކޮންމެވެސް ކަމެއް ކުރެވޭނެ ކަމަށް ދެކޭތީކަމަށް ޝަކީލާ ބުންޏެވެ.
ގިސޯސްހިފުމާ ގުޅޭގޮތުން ޔާމީންގެ ބައްޕަ ހުސެއިން ރަޝީދު ބުނީ މަރަށް މަރު ހިފަން ދޫކޮށްލަން ދަރިން އެދިފައިވާތީ އެކަން ދަރިންނަށް ދޫކޮށްލާފައިވާ ކަމަށެވެ.
ނަމަވެސް، ގާޒީ ވިދާޅުވީ އެކަމުގައި ހުސެއިން ރަޝީދު ސީދާ ނިންމުމެއް ބޭނުންވާނެ ކަމަށެވެ.
ގާޒީ އެހެން ވިދާޅުވުމުން ހުސެއިން ރަޝީދު ބުނީ އޭނާގެ އަމިއްލަ އިހުތިޔާރުގައި ބޭނުންވަނީ ގިސޯސްހިފަން ކަމަށެވެ.
"ގަސްދުގައި މީހުން މަރަން ރާވައިގެން އެކަން ކުރާ މީހުންގެ ފަރާތުން ބޭނުންވަނީ ގިސޯސް ހިފަން،" ޔާމީންގެ ބައްޕަ ބުންޏެވެ.
އޭނާ އެހެން ބުނި ނަމަވެސް، ވާރިސުންގެ ތެރެއިން އެންމެ މީހަކު ގިސޯސް ހިފަން ބޭނުން ނުވިޔަސް، މަރުގެ އަދަބެއް ނާންނާނެ އެވެ. އެހެންކަމުން ބެލެވެނީ އުމުރު ދުވަހުގެ ޖަލު ހުކުމެއް މި މައްސަލައިގައި ހިމެނޭ ދެ މީހުންގެ މައްޗަށް އަންނާނެ ކަމަށެވެ.
އެ މައްސަލައިގައި ދައުލަތުން ދައުވާ ކުރި އަނެއް ހަތަރު މީހުންގެ މައްޗަށް ކުށް ސާބިތެއް ނުވާކަމަށް ކޯޓުން މިއަދު ވަނީ ކަނޑައަޅައިފަ އެވެ.
އެއީ، މ. ތާއިފް، އިސްމާއީލް ރަޝީދާއި މ. ކޮޅުފުށީ އީސްޓް، ހުސައިން ޒިޔާދާއި މ. ކުދެހިގޭ، ހަސަން ޝިފާޒާއި ގދ. ގައްދޫ، ސިންދުބާދުގޭ، މުހައްމަދު ދިފްރާނެވެ.
މީގެ ތެރެއިން ޝިފާޒާއި ދިފްރާންގެ މައްޗަށް ކުރީ ޔާމީން ރަޝީދަށް ފާރަލުމާއި އެ ކުށުގައި ބައިވެރިވުމުގެ ދައުވާ އެވެ.
ޝިފާޒް ސަލާމަތްވީ ޔާމީނަށް ފާރަލީ އޭނާ މަރާލަންކަން ސާބިތުވާ މިންވަރަށް ދައުލަތުން ހެކި ހުށަހަޅާފައިނުވާތީ އެވެ. ދިފްރާންގެ މައްޗަށް ކުށް ސާބިތުކުރަން ޔާމީނަށް ފާރަލާކަމުގެ ފޮޓޯގެ އިތުރުން ސިއްރު ހެކިވެރިއެއްގެ ހެކިބަސް ދައުލަތުން ހުށަހެޅި ނަމަވެސް، ދައުވާ ސާބިތުނުވާކަމަށް ކަނޑައެޅީ ގަތުލުގެ ނިޔަތްއޮތް ކަމަށް ސާބިތުކޮށްދެވިފައިނުވާތީ އެވެ.
ދެން މި މައްސަލައިގައި ތުހުމަތުކުރާ އިސްމާއިލް ރަޝީދުގެ މައްޗަށް އުފުލީ ޔާމީން ރަޝީދު މަރާލުމުގައި ބައިވެރިވިކަމުގެ ދައުވާ އެވެ. އެ ދައުވާ ސާބިތުކުރަން ދައުލަތުން ޙުށަހެޅި ވީޑިއޯ އެނެލިސް ރިޕޯޓުގެ ޗެއިން އޮފް ކަސްޓަޑީގެ އިތުރުން ފޮރެންސިކް ރިޕޯޓުގައި އެހެން މީހެއްގެ ނަން ބޭނުންކޮށްފައިވާތީ އެ ދެ ހެއްކަށް ބުރަދަން ނުދެވޭނެ ކަމަށް ގާޒީ ވިދާޅުވި އެވެ.
ޔާމީން ރަޝީދު މަރައިލީ އޭނާގެ ރަހުމަތްތެރިޔާ އަދި ނޫސްވެރިޔާ ރިލްވާން އަބްދުﷲ ވަގަށް ނަގައި، ގެއްލުވާލާފައިވާ މައްސަލައިގައި އިންސާފު ހޯދުމަށް ވާހަކަ ދައްކަމުން ގެންދަނިކޮށް އޭޕްރީލް 23، 2017 ގަ އެވެ.
ޔާމީން މަރައިލީ، އޭނާ ވަރަށް ލަސްވަންދެން އޮފީހުގައި މަސައްކަތް ކުރުމަށްފަހު ގެއަށް ގޮަސް، ލިފްޓުން އަރަން އުޅެނިކޮށް ގޭ ތެރޭގަ އެވެ. ޔާމީންގެ ހަށިގަނޑު ފެނުނީ އެ ގޭގައި ދިރިއުޅެމުންދިޔަ މީހަކަށެވެ. ޔާމީން ރަޝީދު މަރައިލީ، ދުރާލާ ރާވައި، އޭނާއަށް އެކި ދުވަހުގެ މަތިން ފާރަލުމަށްފަހު އެވެ.
