ލަންޑަން، އިނގިރޭސިވިލާތް (ޖެނުއަރީ 18) - އިނގިރޭސިވިލާތް ލޮކްޑައުންކޮށްފައި ވަނިކޮށް ބޭއްވި ޕާޓީއަކާ ގުޅޭ ގޮތުން ޕާލިމެންޓަށް ދޮގު މައުލޫމާތު ދިން ކަމަށް ކުރާ ތުހުމަތުތައް ބޮޑު ވަޒީރު ބޮރިސް ޖޯންސަން ދޮގުކުރައްވައިފި އެވެ.
ކޮވިޑާ ގުޅިގެން ހަރުކަށި ފިޔަވަޅުތައް އަޅާފައި ވަނިކޮށް ބޮޑު ވަޒީރުގެ އޮފީހުގެ މުވައްޒަފުން ބޭއްވި ޕާޓީތަކެއްގެ މައްސަލަ ވަނީ ވަރަށް ބޮޑަށް ހޫނުވެފަ އެވެ. އެއާ އެކު ގިނަ ބަޔަކު އަންނަނީ ބޮރިސްގެ އިސްތިއުފާއަށް ގޮވަމުންނެވެ.
އާއްމުންނާއި ޕާލިމެންޓަށް ދޮގު މައުލޫމާތު ދިންތޯ ސުވާލުކުރުމުން ބޮރިސް ވަނީ އެއީ ހަގީގަތެއް ނޫން ކަމަށް ނޫސްވެރިންނަށް ވިދާޅުވެފަ އެވެ.
"ނޫން. އަޅުގަނޑުމެން ބޭއްވި ކަންކަމަކީ، ތިބޭފުޅުން ވިދާޅުވާ ގޮތަށް، އުސޫލާ ހިލާފަށް ބޭއްވި ކަންކަން ކަމެއް އެއްވެސް މީހަކު އަޅުގަނޑަކަށް ނާންގާ... އަޅުގަނޑު ހީކުރީ އެއީ މަސައްކަތާ ގުޅޭ ހަރަކާތެއް ކަމަށް."
އިސްތިއުފާ ދެއްވާނެ ތޯ ކުރި ސުވާލުތަކަށް ބޮރިސް ޖަވާބެއް ނުދެއްވަ އެވެ. ނަމަވެސް ބޮޑު ވަޒީރުގެ އޮފީހަށް ކުރެވިފައިވާ ކަންކަމަށް މައާފަށް އެދިވަޑައިގަންނަވާ ކަމަށް ވިދާޅުވި އެވެ.
މިދިޔަ ހަފްތާގައި ވެސް ބޮރިސް ވަނީ ބޮޑު ވަޒީރުގެ އޮފީހުގެ މުވައްޒަފުން، މޭ 20، 2020 ގައި ބޭއްވި ޕާޓީއަކާ ގުޅޭ ގޮތުން ޕާލިމެންޓުގައި މައާފަށް އެދިވަޑައިގެންފަ އެވެ. އެ ޕާޓީގައި 25 މިނެޓު ހޭދަކުރެއްވީ މުވައްޒަފުންގެ މަސައްކަތަށް ޝުކުރު އަދާކުރެއްވުމަށް ކަމަށް ބޮރިސް ވިދާޅުވި އެވެ.
ނަމަވެސް ނޮވެމްބަރު 2020 ވަނަ އަހަރު މަގާމުން ވަކިވި ސަރުކާރުގެ އެޑްވައިޒަރު، ޑޮމިނިކް ކަމިންގްސް ކުރިން ވިދާޅުވީ އެ ޕާޓީއަކީ ކޮން ގޮތަކަށް ރާވައިގެން ކިހިނެއް ކުރިއަށްދާ ޕާޓީއެއްކަން ބޮރިސްއަށް އެނގިވަޑައިގެންނެވި ކަމަށެވެ.
ކަމިންގްސް ވިދާޅުވީ އޭނާ އާއި އިތުރު އެޑްވައިޒަރަކު ލަފާދިނީ އެ ޕާޓީ ނުބޭއްވުމަށް ކަމަށެވެ. އެ ލަފާ އެރުވީ ޕްރިންސިޕަލް ޕްރައިވެޓް ސެކެޓްރީ މާޓިން ރެނޯލްޑްސް އަށެވެ. އެކަން އެންގީ އީމެއިލް މެދުވެރިކޮށް ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވި ގޮތުގައި ލަފާގެ ވާހަކަ ރެނޯލްޑްސް ބޮޑު ވަޒީރަށް ދެންނެވި ނަމަވެސް، ޕާޓީ ބޭއްވުމަށް މައްސަލައެއް ނެތް ކަމަށް ބޮރިސް އެންގެވި އެވެ. ކަމިންގްސް ވިދާޅުވީ އެކަމުން ދޭހަވަނީ ޕާޓީތަކާ ގުޅޭ ގޮތުން ބޮރިސް ޕާލިމެންޓަށް ދޮގު މައުލޫމާތު ދެއްވިކަން ކަމަށެވެ.
ޕާޓީތަކުގެ މައްސަލައިގެ މިިނިވަން ތަހުގީގެއް މިހާރު ދަނީ ކުރަމުންނެވެ. ބޮރިސް ނިސްބަތްވެވަޑައިގަންނަވާ ކޮންޒަވޭޓިވް ޕާޓީގެ ބައެއް މެމްބަރުން އެމަނިކުފާނުގެ އިސްތިއުފާއަށް ގޮވާލާފައި ވާއިރު، އިތުރު މެމްބަރުން ބުނީ ގޮތެއް ނިންމާނީ ތަހުގީގަށް ފަހު ކަމަށެވެ.
