ށ. ކޮމަންޑޫ އާއި އެ ރަށާ ޖެހިގެން އޮންނަ ފަޅު ރަށް، މަތިކޮމަންޑޫ ގުޅައިލުމާއެކު ކޮމަންޑޫގެ ގޮނޑުދޮށް ހިމާޔަތްކުރަން ގާތްގަނޑަކަށް 250 މިލިޔަން ރުފިޔާއަށް ސަރުކާރުން މިއަދު އެމްޓީސީސީއާ ހަވާލުކޮށްފި އެވެ.
ޕްލޭނިން މިނިސްޓްރީން މިއަދު ބުނީ ދެ ކޮމަންޑޫ ގުޅައިލުމާއި ގޮނޑުދޮށް ހިމާޔަތްކުރުމުގެ މަސަައްކަތް އެމްޓީސީސީއާ ހަވާލުކުރީ 730 ދުވަހުގެ (2 އަހަރާއި 10 ދުވަހުގެ) ތެރޭގައި މަސައްކަތް ނިންމާ ގޮތަށް ކަމަށެވެ. ޕްރޮޖެކްޓުގެ އަގަކީ 249.9 މިލިއަން ރުފިޔާ އެވެ.
އެމްޓީސީސީއާ އެކު ސަރުކާރުން މިއަދު ސޮއިކުރި އެއްބަސްވުމުގެ ދަށުން ކުރާނެ އެއް މަސައްކަތަކީ 16.7 ހެކްޓަރުގެ ބިން ހިއްކުމެވެ. އެއާއެކު ދެކޮމަންޑޫ ގުޅައިލާ ލިންކްގެ ދިގުމިނަކީ 200 މީޓަރެވެ. ގުޅައިލާ ސަރަހައްދާއި ހިއްކާ ސަރަހައްދު ހިމާޔަތްކުރަން 1520 މީޓަރުގެ ބޮޑުހިލައިގެ ތޮށްޓަކާއި 353 މީޓަރުގެ ބޮޑުހިލައިގެ ފައިކަށި ޖެހުން ވެސް އެ މަޝްރޫއުގައި ހިމެނެ އެވެ. މަތިކޮމަންޑޫގެ ގޮނޑުދޮށް ހިމާޔަތްކުރަން ޖަހާނީ 112 މީޓަރުގެ ޖިއޯ ބޭގް ތޮށްޓެކެވެ.
ބިމުގެ ދަތިކަން ވަރަށް ބޮޑަށް އޮންނަ ކޮމަންޑޫ މަތިކޮމަންޑުއާ ގުޅައިލުމަކީ އެރަށު ރައްޔިތުންނާއި ކައުންސިލްތަކުން ވަރަށް ކުރިއްސުރެ ގެންގުޅޭ ތަސައްވުރެކެވެ. އެ މަސައްކަތް އަވަސް ކުރައްވަން ރައީސް އިބްރާހީމް މުހައްމަދު ސޯލިހު ވައުދުވެވަޑައިގެންނެވީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ގޮނޑިއަށް އެމްޑީޕީގެ ފަރާތުން ވާދަކުރައްވާ މުހައްމަދު ރާޝިދުގެ ކެމްޕެއިން ފަށަން ބޭއްވި ޖަލްސާގަ އެވެ.
މިދިޔަ ހުކުރުދުވަހުގެ ރޭ ކޮމަންޑޫގައި ބޭއްވި އެ ޖަލްސާގައި ރައީސް ސޯލިހު ވިދާޅުވީ، އެ ރަށް އިތުރަށް ހިއްކި ނަމަވެސް ބޯހިޔާވަހި ކަމަށް ދާއިމީ ހައްލެއް ނާންނާނެ ކަމަށާއި އެކަމަށް އޮތް ހައްލަކީ ދެ ކޮމަންޑޫ ގުޅުވާލުން ކަމަށެވެ.
"މިއީ އަޅުގަނޑުމެން ވީ ވައުދެއް، މިއީ އަޅުގަނޑުމެން ކޮށްދޭން ޖެހޭ ކަމެއް. މިއަކާ ކެމްޕޭނަކާ ގުޅުމެއް ނެތް،" އެ މަނިކުފާނު ވިދާޅުވި އެވެ.
ދެ ކޮމަންޑޫ ގުޅުވާލުމުގެ މަސައްކަތަކީ "ފުލް ސްޕީޑް" ގައި އަވަހަށް ނިންމަން ޖެހޭ މަސައްކަތެއް ކަމަށާއި އެ މަޝްރޫއުގެ ޕްލޭން އޮތީ ނިމިފައި ކަމަށާއި އެ މަސައްކަތުގެ [އަމަލީ މަސައްކަތް ހިނގާ މަންޒަރު] ކުރިއަށް އޮތް ހަފްތާއެއްހާ ދުވަހުގެ ތެރޭގައި ފެންނާނެ ކަމަށް ވެސް ވިދާޅުވި އެވެ.
ބޯހިޔާވަހިކަން ލިބުމުގެ ދަތިކަން ހައްލުކުރުމަށްޓަކައި އެރަށުގެ ހިއްކި ބިމުން ގޯތި ދޫކުރުމަކީ ވެސް ރައީސް ވިދާޅުވި ގޮތުގައި ދެން ލަހެއްނުވެ ކުރިއަށްދާނެ ކަމެކެވެ. އެއީ ގާނޫނީ ގޮތުން މިހާރު އެެރަށު ކައުންސިލްގެ އަތްމަތީގައި އޮތް އިހްތިޔާރެއް ކަމަށް ވެސް އެމަނިކުފާނު ވިދާޅުވި އެވެ.
