ކާބުލް، އަފްގާނިސްތާން (ޖެނުއަރީ 10) - ޕާކިސްތާން ތާލިބާނުގެ އިސްވެރިޔަކު އަފްގާނިސްތާނުގައި މަރާލާފައިވާ ކަމަށް އިސް ސެކިއުރިޓީ އޮފިޝަލަކު ބުނެފި އެވެ.
ތެހްރީކޭ ތާލިބާން ޕާކިސްތާން (ޓީޓީޕީ) ގެ ތަރުޖަމާނު މުހައްމަދު ހުރަސާނީ އުޅެނީ 2014 ވަނަ އަހަރު ޓީޓީޕީއާ ދެކޮޅު އޮޕަރޭޝަނެއް ފެށި ފަހުން ފިލައިގެންނެވެ.
ޕާކިސްތާނުގެ އިސް ސެކިއުރިޓީ އޮފިޝަލަކު ބުނީ އޭނާ މަރާލީ އަފްގާނިސްތާނުގެ އިރުމަތީގައި އޮންނަ ނަންގަރްހާރް ޕްރޮވިންސްގައި ދިން ހަމަލާއެއްގައި ކަމަށެވެ.
"އަޅުގަނޑުމެން މި ދަނީ އޭނާ ހޯދައި މަރާލި ގޮތާ ގުޅޭ މައުލޫމާތު އަފްގާނިސްތާނުން ސާފު ކުރުމުގެ މަސައްކަތް ކުރަމުން،" ސެކިއުރިޓީ އޮފިޝަލް ބުންޏެވެ.
ހުރަސާނީ މަރާލަން ދިން ހަމަލާގެ ފަހަތުގައި ވަނީ ކޮން ބައެއް ކަމެއް އޭނާ ހާމައެއް ނުކުރެ އެވެ.
މީގެ ހަފުތާތަކެއް ކުރިން ޓީޓީޕީގެ އެހެން އިސްވެރިޔަކަށް އަމާޒުކޮށް ވެސް އިރުމަތީ އަފްގާނިސްތާނުގައި ޑްރޯން ހަމަލާއެއް ދިނެވެ. ނަމަވެސް ހަމަލާ އަމާޒުވި މީހާ ވަނީ އަނިޔާއެއް ނުވެ ސަލާމަތްވެފަ އެވެ.
އެ ހަމަލާގެ ފަހަތުގައި ވަނީ ކޮން ބަޔެއް ކަމެއް ވެސް ސާފެއް ނޫނެވެ. ނަމަވެސް ޑްރޯން ހަމަލާތައް ދިނުމުގެ ގާބިލްކަން ޕާކިސްތާނަށް ލިބިގެންވެ އެވެ. އަދި އެމެރިކާ އިން ވެސް ބުނެފައި ވަނީ އަފްގާނިސްތާނުން ފޭބި ނަމަވެސް ޓެރަރިސްޓުންނާ ދެކޮޅަށް ހަމަލާތައް ދިނުމަކީ އެކަށީގެންވާ ކަމެއް ކަމަށެވެ.
އަފްގާނިސްތާނުގެ ތާލިބާނާ ވަކިން އޮޕަރޭޓް ކުރި ނަމަވެސް ޓީޓީޕީ އާއި އަފްގާނިސްތާނުގެ ތާލިބާނާ ގުޅުން އޮވެ އެވެ. ޓީޓީޕީ 2007 ވަނަ އަހަރު އުފެދުނު ފަހުން ޕާކިސްތާނުގައި ބޮޑެތި ހަމަލާތައް ދިނެވެ.
ޕާކިސްތާނުގެ އޮފިޝަލުން ބުނީ ހުރަސާނީ އަސްލު ނަމަކީ ހާލިދް ބަލްތީ ކަމަށާއި ފިލުމުގެ ކުރިން އޭނާ ވަނީ އުތުރު ވަޒިރިސްތާނުގައި "ޓެރަރިސްޓު ތަމްރީން މަރުކަޒެއް" ހިންގާފައި ކަމަށެވެ.
