މެނީލާ، ފިލިޕީންސް (ޖެނުއަރީ 6) - ފިލިޕީންސްގައި އުމުރުން 18 އަހަރުން ދަށުގެ ކުދިން ކައިވެނި ކުރުމަކީ ގާނޫނީ ކުށަކަށް ހަދައިފި އެވެ.
ތަފާސްހިސާބުތައް ދައްކާ ގޮތުން ފިލިޕީންސްގައި އުމުރުން 18 އަހަރު ފުރުމުގެ ކުރިން ކޮންމެ ހަ ކުއްޖަކުން އެކެއް ކައިވެނި ކުރެ އެވެ.
ދުނިޔޭގެ ނިސްބަތުން ބަލާއިރު 12 ވަނަ އަށް އެންމެ ގިނައިން ކުޑަކުދިންގެ ކައިވެނި ކުރާ ގައުމަކީ ފިލިޕީންސް ކަމަށް ވެސް ތަފާސްހިސާބުން ދައްކަ އެވެ.
ރައީސް ރޮޑްރިގޯ ޑުޓާޓޭ ސޮއިކުރައްވައި، ބުރާސްފަތި ދުވަހު އަމަލު ކުރަން ފެށި ގާނޫނުގެ ދަށުން ކުޑަކުދިންނާ ކައިވެނި ކުރުމަކީ 12 އަހަރުގެ ޖަލު ހުކުމެއް އަންނާނެ ކުށެކެވެ.
ކުޑަކުދިންގެ ކައިވެނިތައް ހަމަޖައްސައިދީ، އެފަދަ ކައިވެނިކޮށްދޭ ފަރާތްތަކަށް ވެސް އަންނާނީ 12 އަހަރުގެ ޖަލު ހުކުމެކެވެ.
ފިލިޕީންސް ސަރުކާރުން ބުނީ ކުޑަކުދިންގެ ހައްގުތައް ހިމާޔަތް ކުރުމުގެ މަގުސަދުގައި އާ ގާނޫނު ތައްޔާރު ކުރީ ބައިނަލްއަގްވާމީ ހަމަތަކާ އެއް ގޮތަށް ކަމަށެވެ.
ނަމަވެސް ގާނޫނުގެ ބައެއް ބައިތަކަށް އަމަލު ކުރަން ފަށާނީ އެއް އަހަރު ފަހުންނެވެ. އެއީ ކުޑަކުދިންގެ ކައިވެނި ގިނަ ކޮމިއުނިޓީތަކުން ގާނޫނަށް އަހުލުވެރިވެ، ތައްޔާރުވުމުގެ ގޮތުންނެވެ.
މިދިޔަ އަހަރު ޔުނިސެފުން ނެރުނު ރިޕޯޓެއްގައިވާ ގޮތުން ބައި ބިލިއަނަށް ވުރެ ގިނަ މީހުން ކައިވެނިކޮށްފައި ވަނީ ކުޑަކުދިންގެ ގޮތުގައި ތިބެގެންނެވެ. އޭގެ ތެރެއިން އެންމެ ގިނަ ކައިވެނި ކުރީ ސަބް-ސަހާރަން އެފްރިކާ އާއި ދެކުނު އޭޝިއާގެ ގައުމުތަކުގަ އެވެ.
