އޭޑީކޭ ހޮސްޕިޓަލްގެ 35 ވަނަ އަހަރީ ދުވަހާ ގުޅިގެން އިންތިޒާމް ކުރި 35 ގަޑިއިރުގެ ދުވުމުގެ ހަރަކާތް ރައިސުލްޖުމްހޫރިއްޔާގެ އަނބިކަބަލުން ފަޒްނާ އަހްމަދު ފައްޓަވައިދެއްވައިފި އެވެ.
އެކުވެނި ދުވާ ޓްރެކްގައި ކުރިއަށްދާ މި ޗެރިޓީ ރަން އަކީ "ދުވާހިތުން"، މި ޝިއާރުގެ ދަށުން 35 ގަޑިއިރު މެދުނުކެނޑި ކުރިއަށްދިއުމަށް ހަމަޖެހިފައިވާ ދުވުމެކެވެ. އެގޮތުން މިއަދު ހެނދުނު 9:00 އިރު ފެށި މި ދުވުން ނިމޭނީ މާދާމާ ރޭގެ 20:00 އިރު އެވެ.
މި ދުވުމުގައި ބައިވެރިވާ ކޮންމެ ފަރާތަކުން ދުވާ ކޮންމެ ކިލޯމީޓަރަކަށް 35 ރުފިޔާގެ ރޭޓުން ޗެރިޓީއަށް ހަދިޔާ ކުރަން ޖެހެ އެވެ. އެ ފައިސާ ހިތާ ގުޅުންހުރި ބަލިތަކުގެ ޖަމިއްޔާއެއް ކަމަށްވާ ޓައިނީ ހާޓްސް އޮފް މޯލްޑިވްސްއަށް އޭޑީކޭއިން ހަދިޔާ ކުރާނެ އެވެ.
މި ދުވުން ކުރިއަށްދާ ވަގުތުތަކުގައި ހާއްސަ ލަކީ ޑްރޯއެއް ކޮންމެ ފަސް ގަޑިއިރަކުން ނެނގުމަށް ވަނީ ހަމަޖެހިފަ އެވެ. އެގޮތުން ދުވުން ކުރިއަށްދާ 35 ގަޑިއިރު ތެރޭގައި ހަތް ފަރާތަކަށް ލަކީ ޑްރޯގެ ނަސީބު ލިބިގެންދާނެ އެވެ. މިއިން ކޮންމެ ފަރާތަކަށް އޭޑީކޭ ސްޕޯޓްސް ޕެކޭޖެއް ހިލޭ ލިބޭނެ އެވެ.
އޭޑީކޭއިން ބުނީ މި ދުވުމުގައި ބައިވެރިވުމަށްޓަކައި، ކޮންމެ ފަރާތަކުން ރަޖިސްޓްރީ ވާންޖެހޭނެ ކަމަށާއި، ރަޖިސްޓްރީ ވުމާއެކު ކޮންމެ ބައިވެރިއަކަށްވެސް، ދުވާ މީހުން ފާހަގަކުރުމަށްޓަކައި އަތުގަ އަޅާ ބޭންޑެއް ލިބޭނެ ކަމަށެވެ. އަދި ދުވެ ނިމުމާއެކު ކޮންމެ ބައިވެރިއަކުވެސް ދުވި ވަރު ޔަގީން ކުރުމަށްޓަކައި ކައުންޓަރަށް އައިސް ބެލުމުގެ އިންތިޒާމްވެސް ހަމަޖެހިފައިވާ ކަމަށެވެ.
މިދުވުމުގައި ބައިވެރިވާ ކޮންމެ ފަރާތަކުން ވެސް މަދުވެގެން އެއް ކިލޯމީޓަރު ދުވަން ޖެހެ އެވެ. އެއީ އެކުވެނި ޓްރެކް ވަށާ ތިން ވަރަށް ބުރެވެ.
