ނިއު ދިއްލީ، އިންޑިއާ (ޖެނުއަރީ 4) - ހަލުވިކަމާ އެކު ފެތުރޭ ކޮވިޑް ވޭރިއެންޓާ ހެދި ނިއު ދިއްލީގައި ކޭސްތައް އިތުރުވާން ފަށާފައި ވާތީ ހަފުތާ ބަންދުގައި ލޮކްޑައުނަކަށް ދާން ނިންމައިފި އެވެ.
މިދިޔަ އަހަރު އިންޑިއާ އަށް ކުރިމަތިވި ކޮވިޑުގެ ރާޅެއްގައި ހޮސްޕިޓަލުތައް ފުރި، މަރުވާ މީހުންގެ ހަށިތައް ފުނި ޖެހުނެވެ. އޭގެ ފަހުން މިދިޔަ ހަފުތާއާ ހަމައަށް ދުވާލަކު ފެންނަ އެވްރެޖު ކޭސްތަކުގެ އަދަދު ހުރީ އެއް ވަރެއްގަ އެވެ.
ކޭސްތައް އިތުރު ވާން ފެށުމުން ފިޔަވަޅުތައް އަޅާނެކަން އިއުލާނު ކުރި އިރު، ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވެސް ވަނީ ކޮވިޑަށް ޕޮޒިޓިވްވެފަ އެވެ.
މިދިޔަ ހަފުތާގައި ދިއްލީގެ ޖިމްތަކާއި ސިނަމާތައް ބަންދުކޮށް، ރޭގަނޑު ކާފިއު ހިންގަން ފެށި އެވެ.
އަންނަ ހުކުރު ދުވަހުގެ ރެއިން ފެށިގެން ހޯމަ ދުވަހުގެ ހެނދުނާ ހަމައަށް ހުރިހާ އެންމެން ގެތަކުން ނުނިކުމެ ލޮކްޑައުންގައި ތިބެން މިހާރު ވަނީ އަންގާފަ އެވެ.
ޑެލްޓާ ވޭރިއެންޓާ އެކު އިންޑިއާގެ ހާލަތު އެންމެ ގޯސްވި އިރު، 200،000 އަށް ވުރެ ގިނަ މީހުން މަރުވި އެވެ. މިހާތަނަށް އެ ގައުމުން މަރުވެފައި ވަނީ ޖުމްލަ 481،000 މީހުންނެވެ. އެމެރިކާ އާއި ބްރެޒިލް އަށް ފަހު އެންމެ ގިނަ މީހުން މަރުވެފައި ވަނީ އިންޑިއާ އިންނެވެ.
