ތިން މީހުންނާއެކު ދަތުރު ކުރަމުންދިޔަ މަސް ދޯންޏެއް ރޭ ވ. ފުއްސަރު ކައިރިން ގެއްލިގެން ސިފައިންގެ ކޯސްޓްގާޑުން ނިކުމެ ހޯދަން ފަށައިފި އެވެ.
ގެއްލިގެން ހޯދަނީ ދ. މީދޫއަށް ނިސްބަތްވާ 65 ފޫޓުގެ އަލަމާ-5 ކިޔާ ދޯންޏެވެ. ގެއްލުނު އިރު ތިބީ ދިވެހި ކައްޕިއަކާއި ބަންގްލަދޭޝްގެ ދެ ފަޅުވެރިއެކެވެ. ކައްޕިއަކީ ކ. ގުރައިދޫއަށް ނިސްބަތްވާ އާދަމް ޝަފީގް ކިޔާ މީހެވެ.
"ރޭ 9:45 އަޅުގަނޑުމެންގެ އެހެން ދޯންޏެއްގެ ކައްޕިއަކަށް ގުޅާފަ ބުނީ ދޯނި އަޑިއަށް ދަނީއޭ. ހަމައެކަނި އެހެން ބުނީ. ދެން ފޯނު ކެނޑިިއްޖެ،" އަލަމާ-5 ކުއްޔަށް ނަގައިގެން އުޅޭ ހަސަން ފައުޒީ ބުންޏެވެ.
ފައުޒީ ބުނީ ދޯނީގެ ކައްޕި ޝަފީގްގެ ފޯނު ކޯލު ލިބުނު ހިސާބުން ފެށިގެން ގުޅުން މަސައްކަތް ކުރުމަށްފަހު ހަބަރެއް ނުވުމުން އެކަން ކޯސްޓްގާޑަށް އަންގާފައިވާ ކަމަށެވެ. އަދި އެ ހިސާބަކީ އާންމުކޮށް ވެސް ރޭންޖު ގެއްލޭ ހިސާބެއް ކަމަށް އޭނާ ބުންޏެވެ.
ކޯސްޓްގާޑުން ބުނެފައި ވަނީ އަލަމާ-5 ގެއްލިގެން އުޅޭކަމުގެ މައުލޫމާތު ލިބުމާއެކު ދޯނި ހޯދުމުގެ މަސައްކަތް ކުރަމުންދާ ކަމަށެވެ. ނަމަވެސް މިހާތަނަށް ދޯނީގެ އެއްވެސް ހަބަރެއްވެފައިނުވާ ކަމަށް ކޯސްޓްގާޑުން ބުނެ އެވެ.
