ލޯކަލް ޓޫރިޒަމްއާ އެކު ރާއްޖޭގެ އިގްތިސާދަށް ކުރިއެރުން ލިބިފައިވާ ކަމަށާއި އެކަން ތައާރަފްކުރެއްވީތީ ކުރީގެ ރައީސް މުހައްމަދު ނަޝީދަށް އަދި އެކަން ތަރައްގީކުރީތީ މާފުށީ ރައްޔިތުންނަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޝުކުރުއަދާކުރައްވައިފި އެވެ.
މާފުށްޓަށް އިތުރުކުރި ބިމާއި ޕިކްނިކް އައިލެންޑް ރަށު ކައުންސިލާ ހަވާލުކުރަން މިއަދު ހަވީރު އެ ރަށުގައި ބޭއްވި ރަސްމިއްޔާތެއްގައި ރައީސް ވިދާޅުވީ އެ ރަށަކީ ލޯކަލް ޓުއަރިޒަމްގެ ނަމޫނާ ރަށެއް ކަމަށެވެ.
"ލޯކަލް ޓުއަރިޒަމް ރާއްޖެއަށް ތައާރުފްވެގެން މިއައީ، ކުރީގެ އަޅުގަނޑުމެންގެ ވެރިކަމުގެ ދުވަސްވަރު. އެކަމަށްޓަކައި އޭރުގެ ސަރުކާރަށާއި އަދި ހާއްސަކޮށް، ރައީސް ނަޝީދަށް މިކަމުގައި އަޅުގަނޑުމެން ޝުކުރު އަދާކުރަންޖެހޭ،" ރައީސް ވިދާޅުވި އެވެ.
ރައީސް ވިދާޅުވީ އަންނަ އަހަރު ބައިގަރުނު ފުރޭ ރާއްޖޭގެ ޓުއަރިޒަމަކީ، ދުނިޔެއަށް ނަމޫނާ ޓުއަރިޒަމެއް ކަމަށާއި އެންމެ ފުރަތަމަ ތައާރަފްވި ވަން އައިލެންޑް، ވަން ރިޒޯޓް ކޮންސެޕްޓަކީ މުޅި ދުނިޔެ ގަބޫލުކުރި ނަމޫނާ ޓުއަރިޒަމެއް ކަމަށެވެ.
"އެއަށް ފަހުގައި، ދެން މިއައީ ލޯކަލް ޓުއަރިޒަމް، ގެސްޓްހައުސް ޓުއަރިޒަމް. ރާއްޖޭގެ ގެސްޓްހައުސް ޓުއަރިޒަމް މިއަދު މިވަނީ ދުނިޔޭގެ ނަމޫނާ ޓުއަރިޒަމަކަށް ވެގެންގޮސްފައި. އެހެން ގައުމުތަކުގައި އެ ފެންނަފަދަ ގެސްޓްހައުސްތަކެއް ނޫން ރާއްޖޭގައި ހުރީކީ. މާ ފުރިހަމަ، މާ ފައްކާ، ހުރިހާ ވަސީލަތްތަކެއް ފުރިހަމަވެފައި ހުރި ގެސްޓްހައުސްތަކެއް،" ރައީސް ވިދާޅުވި އެވެ.
ރައީސް ވިދާޅުވީ މިކަން ފެށިގެން އައީ މާފުށިން ކަމަށާއި މާފުށީގެ ރައްޔިތުންގެ ދުރު ވިސްނުމާއި، މިކަމަށް ހުރި ޝައުޤު އެކަމުން ފާޅުވެގެން ހިނގައްޖެ ކަމަށެވެ. އަދި މީގެ ސަބަބުން ރާއްޖޭގެ އިގްތިސާދަށާއި، ހާއްސަކޮށް، މި ރަށުގެ އިގްތިސާދަށް ބޮޑު ބަދަލުތަކެއް އައިސް، ކުރިއެރުންތަކެއް އަތުވެއްޖެ ކަމަށް ރައީސް ވިދާޅުވި އެވެ.
"އެކަމަށްޓަކައި މާފުށީގެ ރައްޔިތުންގެ ވިސްނުން އެހުރިގޮތުން، ރާއްޖެއަށް މިކުރި ފައިދާއަށްޓަކައި، މާފުށީގެ ހުރިހާ ރައްޔިތުންނަށް ސަރުކާރުގެ ނަމުގައި، އަޅުގަނޑުގެ އަމިއްލަ ނަމުގައި އަދި ރާއްޖޭގެ ހުރިހާ ރައްޔިތުންގެ ނަމުގައި އިހްލާސްތެރިކަމާ އެކުގައި އަޅުގަނޑު ޝުކުރު ދަންނަވަން،" ރައީސް ވިދާޅުވި އެވެ.
