ލަންޑަން، އިނގިރޭސިވިލާތް (ޑިސެމްބަރު 28) - އިނގިރޭސި ރާނީ އެލިޒަބަތު ދެވަނަ އަވަހާރަކޮށްލާނެ ކަމަށް ބުނެ ހަދާފައިވާ ވީޑިއޯއެއްގެ މައްސަލަ ފުލުހުން ތަހުގީގު ކުރަން ފަށައިފި އެވެ.
ފުލުހުން ބުނީ އެއީ ކްރިސްމަސްއާ ދިމާކޮށް ރާނީ ހުންނެވި ވިންޑްސާ ކާސްލްގެ ބިމުގެ ސަރަހައްދަށް ގަވާއިދާ ހިލާފަށް ހަތިޔާރާ އެކު ވަތް މީހާ ހެދި ވީޑިއޯއެއް ކަމަށެވެ.
ދުންޏާއި ތީރު ހިފައިގެން ވިންޑްސާ ކާސްލްގެ ބިމުގެ ސަރަހައްދުގައި އުޅުނު އެ މީހާ ވަނީ ހައްޔަރުކޮށްފަ އެވެ. އޭނާ ހެދި ކަމަށް ބުނާ ވީޑިއޯގައި ވަނީ ރާނީ އަވަހާރަކޮށްލަން މަސައްކަތް ކުރަން ވައުދުވެފަ އެވެ.
ޓެބްލޮއިޑް ނޫސް ސަން އަށް ލިބިފައިވާ އެ ވީޑިއޯގައި އޭނާ ހުންނަނީ މާސްކެއް އަޅައިގެން ކަޅު ކުލައިގެ ހުޑީއެއް ލައިގެންނެވެ. ވީޑިއޯގައި ވެސް އޭނާ ހުންނަނީ ދުންޏާއި ތީރު ހިފައިގެންނެވެ.
ވީޑިއޯގައި އޭނާގެ އަޑު ބަދަލުކޮށްފައި ވާއިރު، އޭނާ ބުނީ އެއީ އިންޑިއާގެ ސިކް ދަރިކޮޅުގެ މީހެއް ކަމަށާއި ބޭނުން ވަނީ 1919 ވަނަ އަހަރު އިނގިރޭސިވިލާތުން އިންޑިއާ ހިފައިގެން އުޅުނު އިރު ސިކް މީހުންނާ ދެކޮޅަށް ހިންގި ގަތުލުއާއްމުގެ ބަދަލު ހިފަން ކަމަށެވެ.
އެ ވީޑިއޯ ޕޯސްޓުކޮށްފައި ވަނީ ސްނެޕްޗެޓުގަ އެވެ. އެއީ އޭނާ ހައްޔަރު ކުރުމުގެ 24 މިނެޓު ކުރިން ޕޯސްޓުކޮށްފައިވާ ވީޑިއޯ އެކެވެ. ލަންޑަންގެ މެޓްރޮޕޮލިޓަން ފުލުހުން ހައްޔަރު ކުރި 19 އަހަރުގެ މީހާ ނަފްސާނީ އެހީ ފޯރުކޮށްދެމުންދާ ކަމަށެވެ.
