ބެއިޖިން، ޗައިނާ (ޑިސެމްބަރު 28) - ޗައިނާގެ ޖައްވީ ސްޓޭޝަނާއި ސްޕޭސް އެކްސްގެ ދެ ސެޓެލައިޓް އެކްސިޑެންޓުވާން އުޅުނުކަން އެނގުމުން ޗައިނާ މީހުން އެލޮން މަސްކްއަށް ފާޑުކިޔަން ފަށައިފި އެވެ.
ސްޕޭސް އެކްސްގެ ވެރިޔާ އަކީ ޗައިނާގައި މަގްބޫލު ކަރަންޓު ކާރު އުފައްދާ ޓެސްލާ ކުންފުނީގެ ބިލިއަނަރު އެލޮން މަސްކް އެވެ.
މި މަހު ޗައިނާ އިން އދ. ގެ ސްޕޭސް އެޖެންސީ އަށް ހުށަހެޅި ލިޔުންތަކުން އެނގޭ ގޮތުގައި ސްޕޭސް އެކްސްގެ ސްޓާލިންކް ސެޓެލައިޓްތަކާ އެކްސިޑެންޓު ވާން އުޅުމުން މިދިޔަ ޖުލައި އަދި އޮކްޓޯބަރުމަހު ވެސް ޗައިނާގެ ޓިއަންގޮންގް ޖައްވީ ސްޓޭޝަނުން "ހާއްސަ، އަވަސް ފިޔަވަޅުތަކެއް" އަޅަން ޖެހުނެވެ.
ލިޔުންތަކުގައިވާ ގޮތުން ދެ ފަހަރު ވެސް ސެޓެލައިޓްތައް ކުއްލިއަކަށް އޯބިޓް ބަދަލުވުމުން، ޖައްވީ ސްޓޭޝަނުގެ އޮޕަރޭޓަރުންނަށް ޖެހުނީ ދަތުރު ކުރާ ގޮތް ބަދަލު ކުރާށެވެ.
ސްޓާލިންކް 60 ސެޓެލައިޓް ހިފައިގެން 2019 ވަނަ އަހަރު ޖައްވަށް ދަތުރު ކުރި ސްޕޭސްއެކްސްގެ ރޮކެޓެއް. -- ފޮޓޯ: އޭއެފްޕީ
"ސެޓެލައިޓް ދަތުރު ކުރި ސްޓްރެޓެޖީ ސާފެއް ނޫނެ އަދި އޯބިޓުގައި ކުއްލިއަކަށް މައްސަލައެއް ދިމާވާނެކަން ދެނެގަތުމަކީ އުނދަގޫ ކަމެއް،" އޮކްޓޯބަރު މަހު ހިނގި ހާދިސާއާ ގުޅޭ ގޮތުން ޗައިނާ އިން ބުންޏެވެ.
ޗައިނާ އިން ބުނީ އެ ވަގުތު ޖައްވީ ސްޓޭޝަނުގައި ތިބި އެސްޓްރޮނޯޓުންގެ ފުރާނަ ހިމާޔަތް ކުރަން އަޅަން ޖެހޭ ހުރިހާ ފިޔަވަޅެއް އެޅި ކަމަށެވެ.
ޓިއަންގޮންގްގެ މާނައަކީ ސުވަރުގެޔެއް ފަދަ ގަނޑުވަރެވެ. އެ ސްޓޭޝަނަކީ ބޮޑު ޖައްވީ ބާރަކަށް ވާން ޗައިނާ އިން ކުރަމުންދާ މަސައްކަތުގައި އެންމެ ފަހުން ހޯދި ކާމިޔާބީ އެވެ. އޭގެ ކުރިން ޗައިނާ އިން ވަނީ މާސް އަށާއި ހަނދަށް ވެސް ތަހުލީލު ކުރަން އުޅަނދުތައް ފޮނުވާފަ އެވެ.
ޓިއަންގޮންގް ޖައްވީ ސްޓޭޝަނުގެ މައި މޮޑިއުލް ޖައްވަށް ފޮނުވީ މި އަހަރު އެވެ. ދެހާސް ބާވީސް ވަނަ އަހަރުގެ ތެރޭގައި އެ ސްޓޭޝަން ފުރިހަމަ ކެޕޭސިޓީގައި ބޭނުންކުރަން ފަށާނެ އެވެ.
ޖައްވީ ސްޓޭޝަނާއި ސެޓެލައިޓުތައް ޖެހެން އުޅުނުކަން އެނގުމާ އެކު ޗައިނާގެ ސޯޝަލް މީޑިއާގައި އަންނަނީ މަސްކް އާއި އޭނާގެ ކުންފުނިތަކަށް ވަރަށް ބޮޑަށް ފާޑުކިޔަމުންނެވެ. އެގޮތުން އަންގާރަ ދުވަހުގެ ހެނދުނު އެއް ހޭޝްޓެގް 87 މިލިއަން ފަހަރު ވިޔުކޮށްފައި ވެ އެވެ.
އެއް ބަޔަކު ބުނީ ޗައިނާ މީހުން ޓެސްލާގެ ކާރުތައް ގަނެ، މަސްކް އަށް ފައިސާ ހޯދައި ދިނުމުން ލޯންޗު ކުރި ސްޓާލިންކު ސެޓެލައިޓްތަކުން ޗައިނާގެ ޖައްވީ ސްޓޭޝަނުގައި ޖެހުމަކީ ހެއްވާ ކަމެއް ކަމަށެވެ.
އެލޮން މަސްކް ޗައިނާގައި. އޭނާގެ ޓެސްލާ ކާރުތަކަށް ޗައިނާގައޮ މަގްބޫލުކަން ބޮޑު. -- ފޮޓޯ: އޭއެފްޕީ
ޓެސްލާ ބޮއިކޮޓް ކުރަން ބައެއް މީހުން ގޮވާލާފައި ވާއިރު، ޗައިނާގެ ގައުމީ މަސްލަހަތަށް ގެއްލުންވާ ނަމަ ބައިނަލްއަގްވާމީ ބްރޭންޑުތައް ބޮއިކޮޓް ކުރުމަކީ އެ ގައުމުގެ މީހުން އާއްމުކޮށް ކުރާ ކަމެއްކަން ފާހަގަކުރެވެ އެވެ.
އެހެން ބައެއް މީހުން ބުނީ މިއީ އެމެރިކާ ހިމެނޭ ކަމެއް ނަމަ، ވަގުތުން ދަތި ކުރުމުގެ ފިޔަވަޅު އަޅާނެ ކަމަށެވެ. ޗައިނާ އިން އދ. އަށް ހުށަހެޅި ލިޔުންތަކާ ގުޅޭ ގޮތުން ސްޕޭސް އެކްސް އިން އަދި ވަކި އެއްޗެއް ނުބުނެ އެވެ.
