ޝާހް އަލަމް، މެލޭޝިއާ (ޑިސެމްބަރު 27) - މެލޭޝިއާ އަށް ބޯކޮށް ވާރޭވެހި ފެންބޮޑުވި ހިސާބުތަކުގެ މީހުންނަށް އެހީވެ، ސާފު ކުރުމުގެ މަސައްކަތް ލަސްވާތީ ސަރުކާރަށް ފާޑުކިޔުން އަމާޒުވެއްޖެ އެވެ.
މިދިޔަ ހަފުތާގައި މެދުނުކެނޑި ގިނަ ދުވަސްތަކެއް ވަންދެން ވެހުނު ވާރޭގެ ސަބަބުން ކޯރުތައް ބަންޑުންވެ، ސިޓީތަކުގައި ފެންބޮޑުވެ، އެތައް ހާސް ބަޔަކު ގެދޮރު ދޫކޮށް ރައްކާތެރި ހިސާބުތަކަށް ބަދަލުވި އެވެ.
ފެންބޮޑުވުމަށް ފަހު ސާފު ކުރުމުގެ މަސައްކަތަށް އާއްމުންނާއި ވޮލަންޓިއަރުން ނުކުތް އިރު، ހަލާކުވެފައިވާ ހިފާގެންގުޅޭ ސާމާނާއި، ފަރުނީޗަރު ހުރީ މަގުތަކަށް ޖަމާވެފަ އެވެ. އެ މަސައްކަތަށް ނުކުތް ގިނަ މީހުން ވަނީ ސަރުކާރާ މެދު ހިތްހަމަނުޖެހުން ފާޅުކޮށްފަ އެވެ.
"އަހަރެން މި ހުރީ ރުޅި އައިސްފައި. ސަރުކާރުން އެއްވެސް އެހީއެއް ނުވޭ... އަހަރުމެންގެ ދިރިއުޅުން އަލުން ބިނާކުރަން ފައިސާ ބޭނުންވޭ،" ސެލަންގޯ ސްޓޭޓުގެ ވެރިރަށް ޝާހް އަލަމްގައި ދިރިއުޅޭ އަސްނިޔާތީ އިސްމާއިލް އޭއެފްޕީ އަށް ބުންޏެވެ.
"މުޅި ތަނުގައި މި އޮތީ ކިލާ. ހުރިހާ އެއްޗެއް މި ވަނީ ހަލާކުވެފައި،" ދެ ދަރިންނާ އެކު ސާފު ކުރުމުގެ މަސައްކަތުގައި އުޅެމުން އޭނާ ބުންޏެވެ.
ފެންބޮޑުވުމަށް ފަހު ބައެއް ހިސާބުތަކަށް ކުނިތައް ފުނިޖެހިފައި ވާތީ ބަލިތައް ފެތުރުމުގެ ބިރު ވެސް އެބަ އޮތެވެ.
މެލޭޝިއާގެ ވެރިރަށް ކުއަލަ ލަމްޕޫރް ވަށައިގެން އޮންނަ ސެލަންގޯ ސްޓޭޓަށް ފެންބޮޑުވުމުގައި ވަރަށް ބޮޑުވަރު ވި އެވެ. ޝާހް އަލަމްގައި ދިރިއުޅޭ ގިނަ ބަޔަކު ކާބޯތަކެތި ނެތި ގެތަކުގައި ތާށިވި އެވެ.
މީހުން ސަލާމަތް ކުރުމުގެ އޮޕަރޭޝަންތަކުގައި އައި ބޯޓުތަކުން ފަހުން ވަނީ އެ މީހުން ވަގުތީ ހިޔާތަކަށް ގެންގޮސްފަ އެވެ.
"މީހުން ސަލާމަތް ކުރުމުގެ އޮޕަރޭޝަން ސަރުކާރުން ހިންގީ ވަރަށް ލަހުން،" ކަރްތިކް ރާއޯ އޭއެފްޕީ އަށް ބުންޏެވެ.
"ސާފު ކުރުމުގެ އޮޕަރޭޝަން ވެސް އެ ގެންދަނީ ހަމަ އެހާ ލަހުން. ހަފުތާއެއް ވެގެން ދިޔަ އިރު ވެސް މި ސަރަހައްދުގައި ހުރި ކުނިތައް ސާފެއް ނުކުރެވުނު."
ބޮޑު ވަޒީރު އިސްމާއިލް ސަބްރީ ޔައުގޫބް ވެސް ވިދާޅުވީ ސަރުކާރުގެ މަސައްކަތުގައި "މައްސަލައެއް އުޅޭ" ކަމަށެވެ. ނަމަވެސް އެކަން ހައްލުކޮށް، ރަނގަޅު ކުރާނެ ކަމަށް ވައުދުވެވަޑައިގެންނެވި އެވެ.
އަހަރުގެ ފަހުކޮޅު އާއްމުކޮށް މެލޭޝިއާ އަށް ބޯކޮށް ވާރޭވެހި ފެންބޮޑުވާން މެދުވެރިވެ އެވެ. ނަމަވެސް މި ފަހަރު ފެންބޮޑުވެފައި ވަނީ 2014 ވަނަ އަހަރުގެ ފަހުން ފެންބޮޑުނުވާހާ ބޮޑުކޮށެވެ.
މި ފަހަރު ފެންބޮޑުވުމުގެ ސަބަބުން މުޅި މެލޭޝިއާ އިން 48 މީހުން މަރުވެ، ފަސް މީހުން ވަނީ ގެއްލިފަ އެވެ.
ދުނިޔޭގެ އެކި ގައުމުތަކުގައި ކުރިއަށް ވުރެ ބޮޑަށް ފެންބޮޑުވުމުގެ މައްސަލަ ދިމާވަނީ މޫސުމީ ބަދަލާ ހެދި ކަމަށް ސައިންސްވެރިން ބުނެ އެވެ.
