އދ.، އެމެރިކާ (ޑިސެމްބަރު 27) - މިޔަންމާގައި އާއްމު ރައްޔިތުންނާ ދެކޮޅަށް ބޮޑު ގަތުލުއާއްމެއް ހިންގާ ކަމަށް ބުނެ، އދ. އިން ކަންބޮޑުވުން ފާޅުކޮށްފި އެވެ.
އދ. ގެ އޮފިޝަލަކު ބުނީ 30 މީހަކު މަރާލުމަށް ފަހު ހަށިތައް އެންދިކަމުގެ ސައްހަ މައުލޫމާތު ލިބިފައިވާ ކަމަށާއި އެކަން ތަހުގީގު ކުރަން ސަރުކާރަށް ގޮވާލާ ކަމަށެވެ.
އިރުމަތީ ކަޔަހް ސްޓޭޓުގައި ހިންގި އެ އަމަލުގައި ގިނަ އުޅަނދުތަކަށް ހަމަލާދީ ރޯކުރި އެވެ. ސޭވް ދަ ޗިލްޑްރެން ޖަމިއްޔާގެ ދެ މުވައްޒަފަކު ވަނީ އެ ހާދިސާގައި ގެއްލިފަ އެވެ.
މިޔަންމާގެ ހާލަތު މޮނިޓާ ކުރާ ގްރޫޕުތަކާއި މިޔަންމާގެ ނޫސްތަކުން ބުނީ އެ އަމަލު ހިންގީ ބަގާވާތްކޮށްގެން އުޅޭ ސިފައިން ކަމަށެވެ.
"މި އަނިޔާވެރި އަމަލާއި މިޔަންމާގެ އެކި ހިސާބުތަކުގައި އާއްމުންނާ ދެކޮޅަށް ހިންގާ އަމަލުތައް އަޅުގަނޑު ކުށްވެރިކުރަން،" އިންސާނީ ހައްގުތަކާ ބެހޭ ކަންކަމަށް ކަނޑައަޅާފައި ހުންނަ އދ. ގެ އަންޑަސެކެޓްރީ މާޓިން ގްރިފިތްސް ވިދާޅުވި އެވެ.
އޭނާ ގޮވާލެއްވީ "ފުރިހަމަ، ދެފުށްފެންނަ ތަހުގީގެއް" ހިންގުމަށެވެ.
މިޔަންމާގެ ސިފައިން މިދިޔަ ފެބްރުއަރީ މަހު ހިންގި ބަގާވާތައް ފަހު އެ ގައުމުގައި އަދިވެސް އޮތީ ހަމަނުޖެހުން ބޮޑުވެފަ އެވެ. މިހާތަނަށް 1،130 އަށް ވުރެ ގިނަ މީހުން ހަމަނުޖެހުންތަކުގައި ވަނީ މަރުވެފަ އެވެ.
ޕީޕަލްސް ޑިފެންސް ފޯސަސް (ޕީޑީއެފް) ގެ ނަމުގައި އާއްމުންގެ ލަޝްކަރެއް ދަނީ ސިފައިންނާ ދެކޮޅަށް ހަނގުރާމަ ކުރަމުންނެވެ. ޕީޑީއެފް އިން ބުނީ ކަޔަހް ސްޓޭޓުގައި އުޅަނދުތައް އަންދާލާފައި ވަނިކޮށް ފެނުނީ ސިފައިންނާއި ޕީޑީއެފްއާ ދެމެދު ކައިރި ހިސާބެއްގައި ހަމަލާ ބަދަލުކުރި ފަހުން ކަމަށެވެ.
"އެ ސަރަހައްދަށް ދިޔަ ތަނުން ފެނުނީ ދެ އުޅަނދުގައި ރޯކޮށް، ބަޔަކު މަރުވެފައި ވަނިކޮށް. އަޅުގަނޑުމެންނަށް ފެނުނީ 27 މީހެއްގެ ހަށިގަނޑު،" ޕީޑީއެފްގެ މެމްބަރަކު އޭއެފްޕީ އަށް ބުންޏެވެ.
ސޭވް ދަ ޗިލްޑްރެން ޖަމިއްޔާ އިން ވެސް ބުނީ މިޔަންމާގައި މަސައްކަތް ކުރާ ދެ މުވައްޒަފަކު ހަމަނުޖެހުން ތެރޭގައި "ތާށިވެ" ގެއްލިފައިވާ ކަމަށެވެ.
އެ ޖަމިއްޔާ އިން ބުނީ އެ ދެ މުވައްޒަފުން ގެއްލުނު އިރު ދަތުރު ކުރަމުން ދިޔައީ އިންސާނީ އެހީގެ މަސައްކަތަށް ފަހު ގެޔަށް ދިޔުމަށް ކަމަށެވެ. ސޭވް ދަ ޗިލްޑްރެން އިން މިހާރު ވަނީ އެ ސަރަހައްދުގައި ހިންގާ އޮޕަރޭޝަންތައް މެދުކަނޑާލާފަ އެވެ.
