އޮމިކްރޮން ވޭރިއަންޓާ ގުޅިގެން އަޅާ ފިޔަވަޅުތަކެއްގެ ގޮތުގައި ރާއްޖެ އަށް ފަތުރުވެރިން ފިޔަވައި އެހެން އެންމެން ތިން ދުވަހާއި ފަސް ދުވަހާ ދެމެދު ޕީސީއާރް ޓެސްޓް ހަދަށާއި ވެކްސިން ފުރިހަމަނުކުރާ ދިވެހިންނާއި ވޯކްޕާމިޓް ހޯލްޑަރުން 14 ދުވަހަށް ކަރަންޓީނުކުރަން އެޗްޕީއޭ އިން ނިންމައިފި އެވެ.
އެޗްޕީއޭ އިން ބުނީ މިއީ ދުނިޔޭގެ ބައެއް ގައުމުތަކުން ފެނިފައިވާ އޮމިކްރޮން ވޭރިއަންޓާ ގުޅިގެން އާއްމު ރައްޔިތުންގެ ސިއްހަތަށާއި ރައްކާތެރިކަމަށްޓަކައި، އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން މާދަމާ އިން ފެށިގެން ވަކި ގޮތެއް އަންގަން ދެން އަޅާ ފިޔަވަޅުތަކެއް ކަމަށެވެ.
އެގޮތުން ފުރަތަމަ ފިޔަވަޅަކީ ފަތުރުވެރިން ހިމެނޭހެން ބޭރުން އަންނަ އެންމެން ރާއްޖެ އަށް ދަތުރުފަށާ ބަނދަރުން ފުރާއިރު 96 ގަޑިއިރު ނުވާ ޕީސީއާރް ނެގެޓިވް ނަތީޖާއެއް އޮވެގެން ނޫން ގޮތަށް އެތެރެނުވެވޭ ގޮތަށް ހެދުމެވެ. އެޗްޕީއޭ އިން ބުނީ އެއް އަހަރުން ދަށުގެ ތުއްތު ކުދިން މިކަމުން އިސްތިސްނާވާނެ ކަމަށެވެ.
ދެ ވަނަ ފިޔަވަޅަކީ ފަތުރުވެރިން ފިޔަވައި ބޭރުން އަންނަ އެންމެން ރާއްޖެ އެތެރެވުމަށް ފަހު ތިން ދުވަހާއި ފަސް ދުވަހުގެ ތެރޭގައި ޕީސީއާރް ޓެސްޓެއް ހަދަން އެންގުމެވެ.
ތިން ވަނަ ފިޔަވަޅަކީ ކޮވިޑް ވެކްސިން ފުރިހަމަކޮށްފައިނުވާ ނަމަ ދިވެހިންނާއި ވޯކްޕާމިޓް ހޯލްޑަރުން ރާއްޖެ އެތެރެވުމަށް ފަހު 14 ދުވަހުގެ ކަރަންޓީންކުރުމެވެ. އެ މީހުން ކަރަންޓީނުން ދޫކުރާނީ 14 ދުވަހަށް ފަހު ޓެސްޓް ހަދައި ނެގެޓިވްވުމުންނެވެ. އޭގެ ތެރޭގައި 12 އަހަރުން ދަށުގެ ކުޑަކުދިން ނުހިމެނޭނެ އެވެ.
ރާއްޖެ އައި ފަތުރުވެރިންތަކެއްގެ ހަށިގަނޑުން ކޮވިޑްގެ އޮމިކްރޯން ވޭރިއެންޓު ވަނީ ފެނިފަ އެވެ. ކޮވިޑްގެ އާ ވޭރިއަންޓެއް ކަމުގައިވާ އޮމިކްރޯން އަކީ ކަންބޮޑުވާންޖެހޭ ވޭރިއަންޓެއް ކަމަށް ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯއިން ވަނީ ކަނޑައަޅައިފަ އެވެ.
