ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވިތާ މަހެއް ނުވަނީސް ފެށި "ރަށްފެހި" ޕްރޮގްރާމަށް ފަހު މިވީ ތިން އަހަރު ތެރޭގައި 23 ހާހަށް ވުރެ ގިނަ ގަސް ރާއްޖޭގެ އެކި ސަރަހައްދުތަކުގައި އިންދާފައިވާ ކަމަށް ކަމަށް ތިމާވެށި މިނިސްޓަރު އައިމިނަތު ޝައުނާ ވިދާޅުވެއްޖެ އެވެ.
މުޅި ރާއްޖޭގައި ގަސް އިންދުމުގެ ޕްރޮގްރާމްތައް ފެށުމަކީ މި ސަރުކާރުގެ 100 ދުވަހުގެ ވައުދެކެވެ. އެގޮތުން ވެރިކަމާ ހަވާލުވުމަށް ފަހު 2018 ވަނަ އަހަރުގެ ޑިސެމްބަރު މަހު ހުޅުމާލެ ދެވަނަ ފިޔަވަހީގައި 250 ގަސް އިންދުމުގެ ޕްރޮގްރާމެއް ފެށި އެވެ.
މިއަދު ހަވީރު އޮތް ގަސް އިންދުމުގެ ޕްރޮގްރާމް "ގޯގްރީން" ޝަރަފްވެރިކޮށްދެއްވަން ވަޑައިގެން މިނިސްޓަރު ޝައުނާ ވަނީ ރާއްޖޭގެ ނާޒުކު ތިމާވެށި ހިމާޔަތްކުރަން މި ސަރުކާރުން ދޭ އަހަމިއްޔަތުކަން ފާހަގަކުރައްވާފަ އެވެ. މިނިސްޓަރު ވިދާޅުވީ މީގެ 17 އަހަރު ކުރިން މިއަދު ރާއްޖެ އަށް އެރި ސުނާމީން ކުރެވުނު ތަޖުރިބާ އާއި އިހުސާސަކީ މި ރާއްޖޭގެ ރަށްތަކުގެ ނާޒުކުކަމާއި ތިމާވެށީގެ މުހިންމުކަން ކަމަށެވެ.
މިނިސްޓަރު ވިދާޅުވި ގޮތުގައި ރާއްޖެއަށް ދިމާވާ ތިމާވެށީގެ އެކި މައްސަލަތައް ފެންމަތިވަނީ މޫސުމަށް އަންނަ ބަދަލުތަކާ އެކު ކަމަށެވެ. އެހެންކަމުން މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ނާޒުކު ތިމާވެއްޓަށް ކުރާ ނޭދެވޭ އަސަރުތައް ކުޑަ ކުރުމަށްޓަކައި ގަސް އިންދުން ގިނަ ކުރުމަކީ ހައްލެއް ކަމަށް މިނިސްޓަރު ގަބޫލުކުރައްވަ އެވެ.
"ރަށްރަށުގެ ފެންފަށަލަ ހިމާޔަތް ކުރަން ކަމުގައި ވީ ނަމަވެސް، ނުވަތަ ރަށްރަށުގެ ހޭޅިފަށް ހިމާޔަތް ކުރަން ކަމުގައި ވީ ނަމަވެސް ނުވަތަ ރަށް ގިރުންމުންވެސް އަޅުގަނޑުމެންގެ ރަށްތައް ރައްކާތެރި ކުރުމަށް ނަމަވެސް އެންމެ މުހިއްމު ކަމަކީ ގަސް އިންދުން،" ޝައުނާ ވިދާޅުވި އެވެ.
ކްލީން މޯލްޑިވްސްގެ ފަރާތުން ބާއްވާ ގަސް އިންދުމުގެ ޕްރޮގްރާމް "ގޯ ގްރީން" އިން މިއަދު ވަނީ އެޗްޑީސީ އަށް 3500 ގަސް ހަދިޔާކޮށްފަ އެވެ. އޭގެ ތެރެއިން 1000 ގަސް މިއަދު ހުޅުމާލޭ ދެ ވަނަ ފިޔަވަހީގައި އިންދި އެވެ.
މި ރަސްމިއްޔާތުގައި ގިޔާސުއްދީން ސްކޫލާއި އަހުމަދިއްޔާ ސްކޫލާއި ވިލާ ކޮލެޖްގެ ދަރިވަރުންނާއި ތިމާވެށީގެ އެކި ޖަމިއްޔާތަކުގެ މެމްބަރުން ބައިވެރިވި އެވެ.
