ލަންޑަން، އިނގިރޭސިވިލާތް (ޑިސެމްބަރު 26) - އިނގިރޭސި ރާނީ އެލިޒަބަތު ދެ ވަނަ ކްރިސްމަސް ހޭދަކުރައްވަމުންދާ ވިންޑްސާ ކާސަލް ހުންނަ ބިމުގެ ސަރަހައްދަށް ހަތިޔާރު ހިފައިގެން ވަގަށް ވަތް މީހަކު ހައްޔަރުކޮށްފި އެވެ.
ފުލުހުން ބުނީ އުމުރުން 19 އަހަރުގެ އެ މީހާ ހުރީ ދުންޏާއި ތީރު ހިފައިގެން ކަމަށެވެ. އޭނާ ހައްޔަރު ކުރީ ކްރިސްމަސް ދުވަހު ކަމަށާއި ތަހުގީގު ކުރިއަށްދާ ކަމަށް ވެސް ބުންޏެވެ.
ރާނީ އެލިޒަބަތު ކްރިސްމަސް ހޭދަކުރެއްވީ ލަންޑަންގެ ހުޅަނގުގައި ހުންނަ ވިންޑްސާ ކާސަލް ގަ އެވެ. ތުހުމަތު ކުރެވޭ މީހާ ހައްޔަރު ކުރީ ހަތިޔާރެއް ހިފައިގެން ހުރުމުގެ އިތުރުން ވަނުން މަނާ ސަރަހައްދަކަށް ވަދެ އުޅުމުންނެވެ.
ސަންޑޭ މިރާ ނޫހުން ބުނީ ވިންޑްސާ ކާސަލް ހުންނަ ބިމުގައި ދުންޏާއި ތީރު ހިފައިގެން އެ މީހާ އުޅެމުން ދިޔަ ތަން ފެނުނީ ސީސީޓީވީ އޮޕަރޭޓަރުންނަށެވެ. މެއިލް ނޫހުން ބުނީ އޭނާ އެ ބިމަށް ވަނީ ހަރުގަނޑެއްގެ އެހީގައި ފެންސު މަތިން އަރައި، ވާގަނޑެއް އެއްލައި ތިރި އަށް ފައިބައިގެން ކަމަށެވެ.
"އެ މީހާ ބިމުގެ ސަރަހައްދަށް ވަނުމާ އެކު ސެކުއިރުޓީ އިޖުރާއަތުތައް ހިންގަން ފެށި އަދި އޭނާ އެއްވެސް އިމާރާތަކަށް ވަދެފައެއް ނުވޭ،" ފުލުހުން ބުންޏެވެ.
ފުލުހުން ބުނީ އެ ހާދިސާއާ ގުޅޭ މައުލޫމާތު ޝާހީ އާއިލާގެ މެމްބަރުންނާ ހިއްސާކޮށްފައި ވާނެ ކަމަށެވެ،
