އިނގިރޭސި ވިލާތުގެ ކޮޓްސްވޯލްޑް ސިޓީގައި ހުރި ގަބުރުސްތާނަކުން 27 މީހުންގެ ބޮޑު އާއިލާއެއް ފެނިއްޖެ އެވެ.
ސައިންސްވެރިން މިހާރު ވަނީ މި އާއިލާގެ ފެމިލީ ޓްރީ ކުރަހާފަ އެވެ.
ފެމިލީ ޓްރީ ކުރަހާފައިވަނީ 5700 އަހަރުވެފައިވާ މި ގަބުރުސްތާނުން ފެނުނު ގަބުރުތަކުގެ ޑީއެންއޭ ސާމްޕަލް ދިރާސާކޮށްގެންނެވެ. މި ދިރާސާއިން ހާމަވެފައިވާ ގޮތުގައި މި ގަބުރުސްތާނުގައި ވަޅުލާފައިވާ 27 މީހުންނަކީ ވެސް އެއް ދަރިފަސްކޮޅަކަށް ނިސްބަތްވާ އެއް އާއިލާއެއްގެ ބައެކެވެ. އެއާއިލާގެ ފަސް ޖީލު ވަޅުލާފައިވަނީ ކައިރި ކައިރީގައި ހަމަ އެ ގަބުރުސްތާނުގަ އެވެ.
މި ދިރާސާގައި އިސްކޮށް ހަރަކާތްތެރިވި ހާވާޑް ޔުނިވާސިޓީގެ ޕްރޮފެސާ ޑޭވިޑް ރެއިކް ބުނެފައިވާ ގޮތުގައި މި ފެމިލީ ޓްރީ ދިރާސާ ކުރުމުން މި ގަބުރުސްތާނުގައިވާ ފަސް ޖީލުގެ މީހުންގެ މެދުގައި ހުރި ސަގާފަތާއި އާދަކާދައިގެ ބައެއް ކަންކަން ދެނެގަނެވިފައިވާ ކަމަށެވެ.
ސައެންސުވެރިން ކުރަހާފައިވާ ފެމިލީޓްރީ- ފޮޓޯ: ބީބީސީ
މި އާއިލާގެ ވެރިއެއްގެ ގޮތުގައި ހުންނަނީ ފިރެހެނެކެވެ. އަދި ފުރަތަމަ ޖީލުގައި ހިމެނެނީ އޭނާގެ ހަތަރު އަނބިންނަށް ލިބިފައިވާ ދަރިންނެވެ.
އޭނާއާ އެކު އޭނާގެ ހަތަރު އަނބިންވެސް ގަބުރުސްތާނުގައި ވަޅުލާފައިވެ އެވެ.
މި އާއިލާއަކީ "ސްޓޯން އޭޖް" ނިމުނު ދުވަސްވަރުގައި އުޅުނު އާއިލާއެއްކަމަށް ސައިންސްވެރިން ލަފާކުރެ އެވެ. އެއީ އިންސާނުން ދަނޑުވެރިކަން ކުރަން އެންމެ ފުރަތަމަ ފެށި ދުވަސްވަރުކަން ވެސް ދިރާސާތަކުންވަނީ ހާމަވެފަ އެވެ.
މި ގަބުރުތަކުގެ ފެމިލީ ޓްރީ ކުރެހުމުގެ ތެރެއިން ސައިންސްވެރިން އެންމެ ހައިރާންކުރުވި ކަމަކަށް ވެގެންދިޔައީ ގަބުރުސްތާނުގައި އެ އާއިލާއަށް ނިސްބަތްވާ އަންހެންކުދިންގެ ގަބުރުތައް ވަޅުލާފައި ނެތުމެވެ. މިކަން މިހެން ކޮށްފައިވަނީ އެ ޒަމާނުގެ އާދަކާދައިގެ ސަބަބުންކަމަށް އެމީހުން ގަބޫލުކުރެ އެވެ.
"އަންހެންކުދިންގެ ހަށިތައް އެމީހުން ވަޅުލަނީ އެމީހުންގެ ފިރިންނާއި އެއްކޮށްކަމަށްވެސް ވެދާނެ އެވެ. ނޫނީ އަންހެން ކުއްޖާ މަރުވުމުން އޭނާގެ ހަށިގަނޑު ވަޅުލުމުގެ ބަދަލުގައި އަންދާލަނީ ކަމަށްވެސް ވެދާނެ އެވެ. މިކަމުގެ ފަހަތުގައިވާ އަސްލު ހަގީގަތަކީ ކޮބާކަމެއް އަހަރުމެނަކަށް އަދި ނޭނގޭ،" ޕްރޮފްސާ ރެއިކް ވިދާޅުވި އެވެ.
މިއީ މިހާތަނަށް ކުރަހާފައިވާ އެންމެ ދުވަސްވީ ފެމިލީ ޓްރީކަމަށް މިކަމުގައި ހަރަކާތްތެރިވި ސައިންސްވެރިން ބުނެ އެވެ.
