އދ.، އެމެރިކާ (ޑިސެމްބަރު 24) - ފިލިޕީންސް އަށް މިދިޔަ ހަފުތާގައި އެރި ތޫފާން ރާއީގައި ހާލުގައި ޖެހުނު މީހުންނަށް އެހީވާން 107.2 މިލިއަން ޑޮލަރު ހޯދަން ހާއްސަ ކެމްޕެއިނެއް އދ. އިން ހުކުރު ދުވަހު ފަށައިފި އެވެ.
އދ. އިން ބުނީ އެ ފައިސާ އިން އެހީވާނީ ތޫފާނުގެ އަސަރު އެންމެ ބޮޑަށް ކުރި ހިސާބުތަކުގައި އުޅޭ 530،000 މީހުންނަށް ކަމަށެވެ. އެ މީހުންނަށް ބޭނުންވާ ބޯފެނާއި، ނަރުދަމާ، ކާބޯތަކެތި އަދި ވަގުތީ ބޯހިޔާވަހިކަން ފޯރުކޮށްދޭން ވަނީ ރާވާފަ އެވެ.
"އެހީވާނެ ކަމަށް އެބަ ބުނޭ ވަރަށް ގިނަ ފަރާތްތަކުން. ދެން އޮތް ގޮންޖެހުމަކީ ދެއްކި ވާހަކަތަކަށް އަމަލީ ސިފަ ގެނައުން،" ފިލިޕީންސްގައި ހުންނަ އދ. ގެ ރެޒިޑެންޓް ކޯޑިނޭޓަރު ގުސްތާވީ ގޮންޒާލޭޒް ވާޗުއަލް ޕްރެސް ކޮންފެރެންސެއްގައި ވިދާޅުވި އެވެ.
ފިލިޕީންސްގެ މެދުތެރެ އާއި ދެކުނު ހިސާބުތަކަށް ތޫފާނު ރާއީގައި ބޮޑެތި ގެއްލުންތަކެއް ލިބި، 375 އަށް ވުރެ ގިނަ މީހުން މަރުވި އެވެ. ގެތައް ބިމާ ހަމަވެ، އެތައް ހާސް ބަޔަކު ހާލުގައި ޖެހިފައި ވާއިރު، ބައެއް އަވަށްތައް ވަނީ އެއްކޮށް ސުންނާފަތިވެފަ އެވެ.
އެންމެ ބޮޑަށް އަސަރު ކުރި ހިސާބުތަކުގައި ތިބި މީހުންނަށް އެހީ ފޯރުކޮށްދިނުމުގެ މަސައްކަތް ދަނީ ކުރަމުންނެވެ. ނަމަވެސް ލިބުނު ގެއްލުމާ އެކު ވަރަށް ގިނަ ހިސާބުތަކުން މޮބައިލް ފޯނާއި އިންޓަނެޓުގެ ހިދުމަތް ކެނޑި، މަގުތައް ހަލާކުވެފައި ވާތީ އެހީ ފޯރުކުރުމަށް ގޮންޖެހުންތައް ގިނަ އެވެ.
ތޫފާން ރާއީ އަށް ފިލިޕީންސްގައި ދީފައިވާ ނަމަކީ "އޮޑެޓް" އެވެ. އަހަރުގެ ފަހުކޮޅު އާއްމުކޮށް ފިލިޕީންސް އަށް ތޫފާން ނާރަ އެވެ. ތޫފާން އަރާ މޫސުމުގެ ގޮތުގައި ފާހަގަވެފައި އޮންނަނީ ޖުލައި މަހުން އޮކްޓޯބަރު މަހަށެވެ.
ތޫފާންތައް ވަރުގަދަވެ، ކުރިއަށް ވުރެ ނުރައްކާތެރިވަމުން ދަނީ މޫސުމީ ބަދަލާ ހެދި ކަމަށް ސައިންސްވެރިން ބުނެ އެވެ. ފިލިޕީންސް އަކީ މޫސުމީ ބަދަލުގެ އަސަރަށް އެންމެ ނާޒުކު އެއް ގައުމެވެ. އެ ގައުމަށް ކޮންމެ އަހަރަކު ވެސް 20 ތޫފާން އާއްމު ގޮތެއްގައި އަރަ އެވެ.
ފިލިޕީންސްގެ ތާރީހުގައި އެންމެ ބާރުގަދަ ތޫފާނަކާ ދިމާވީ 2013 ވަނަ އަހަރު އެވެ. އެ ފަހަރު އެރި ތޫފާން ހައްޔާންގައި 7،300 އަށް ވުރެ ގިނަ މީހުން މަރުވި އެވެ.
