ބާ ޖަމާލުއްދީން ބިމުގައި އަރަބިއްޔާ ސްކޫލްގެ އިމާރާތެއް އެޅެންދެން ވަގުތީ ގޮތުން އެ ސްކޫލްގެ ކިޔެވުން ކުރީގެ ފޮރިން މިނިސްޓްރީއަށް ބަދަލު ކުރުމަށް ރައީސް އިބްރާހިމް މުހައްމަދު ސޯލިހް މިއަދު ނިންމަވައިފި އެވެ.
އެމްޓީސީސީ ސޯމިލް ކުރީން ހިންގި ތަނުގައި ފޮރިން މިނިސްޓްރީ ވަގުތީ ގޮތުން ހިންގުމަށް ފަހު އެ މިނިސްޓްރީއަށް ހާއްސަ އިމާރާތުގެ މަސައްކަތް ނިންމުމުން މިހާރު އެ އިމާރާތް ހުރީ ހުސްކޮށެވެ.
ސްޓަރަކްޗަރަށް ދިމާވެފައިވާ މައްސަލަތަކަަކާ ގުޅިގެން އަރަބިއްޔާ ސްކޫލު އިމާރާތުގައި މި ވަގުތު ހާލަތު ހުރި ގޮތުން އެތަނުގައި ކިޔަވައިދިނުން ރައްކާތެރި ނޫން ކަމަށް ނިންމާ ކުދިން ކިޔެވުން މެދުނުކެނޑި ކުރިޔަށް ގެންދަން އިއްޒުއްދީން ސްކޫލަށް ބަދަލުކުރަން އެޑިޔުކޭޝަން މިނިސްޓްރީން ނިންމި އެވެ.
ނަމަވެސް އެ ނިންމުމާ ދެކޮޅަށް، އަރަބިއްޔާގެ ބެލެނިވެރިން މުޒާހަރާކޮށް، އެކަމުގެ ކަންބޮޑުވުން ރައީސްއާ ހިއްސާކުރުމުން މިއަދު އެ މަނިކުފާނުން ނިންމެވީ ކުރީގެ ފޮރިން މިނިސްޓްރީ އިމާރާތުގައި ކްލާސްރޫމްތައް ހެދުމަށް ފަހު އެ އިމާރާތަށް އަރަބިއްޔާ ދަރިވަރުން ވަގުތީ ގޮތުން ބަދަލުކުރުމަށެވެ.
މި ނިންމުން ހާމަކުރަމުން ރައީސް އޮފީހުން ބުނީ އެ އިމާރާތް އަރަބިއްޔާއާއި ހަވާލުކުރުމަށް ރައީސް ނިންމެވީ ކިޔަވައިދޭން ފެށޭވަރަށް ހުރިހާ އިންތިޒާމްތަކެއް ސަރުކާރުން ހަމަޖެއްސުމަށް ފަހުގައި ކަމަށެވެ.
ހަތް ބުރީގެ އެ އިމާރާތުގެ މަސައްކަތް އެކުންފުނިން ނިންމައި، އިމާރާތް ހުޅުވީ ސެޕްޓެމްބަރު 19، 2013 ގައެވެ. ހުޅުވިތާ އަށް އަހަރު ފަހުން އެ ސްކޫލުގެ ތަނބުތަކުގައި ބޮޑެތި ރެނދުތައް ލައި ވަރަށް ބޮޑަށް ވަނީ ހަލާކުވެފަ އެވެ.
