ގައުމީ ފުޓްބޯޅަ ޓީމުގެ އެސިސްޓަންޓް ކޯޗަކަށް ޕޯޗުގީސް ކޯޗު ސިމާއޯ ކޮސްޓާ ހަމަޖައްސައިފި އެވެ.
ސިމާއޯ، 46، އަކީ ކުރިން ޕޯޗުގަލްގެ ކްލަބްތަކުގައި މިޑްފީލްޑަރަކަށް ކުޅުނު ކުޅުންތެރިއެކެވެ. އޭނާ ވަނީ ދެކުނު ކޮރެއާގެ ޑައިޖިއަން ސިޓިޒަންގައި ކޯޗިން މަސައްކަތްތަކެއް ކޮށްފަ އެވެ. އަދި އޭނާ އެންމެ ފަހުން ހަވާލުވެހުރީ ސްވިޒަލެންްޑްގެ ކްލަބް, ބެރޯޝް-ގޯޖިއާއާ އެވެ.
ބެރޯޝް-ގޯޖިއާ ކޯޗަކަށް ހުއްޓައި މިދިޔަ ސެޕްޓެމްބަރު މަހުގެ ތެރޭގައި ކޮސްޓާ އަށް ރާއްޖޭގެ އެސިސްޓަންޓް ކޯޗަކަށް ވުމުގެ ހުށަހެޅުން ލިބުނެވެ. އެއީ ގައުމީ ޓީމުގެ ކޯޗަކަށް ވުމަށް އިޓަލީގެ ފްރެންޗެސްކޯ މޮރިއޭރޯއާ އެފްއޭއެމުން މަޝްވަރާ ކުރިއިރު އެވެ. އޭރު ކޮސްޓާ ބޭނުންވީ ސީޒަނުގެ މެދުތެެރެއިން ކްލަބް ދޫކޮށްނުލުމަށެވެ. އެކަމަކު، ފަހުން ބެރޯޝް-ގޯޖިއާ އަށް ސީޒަން ނިމުމުން އާ ޓާގެޓަކަށް ވާސިލްވާން ބޭނުންވާތީ ދާދި ފަހުން ކޮސްޓާ ވަނީ އެ ޓީމުން ވަކިވެފަ އެވެ.
އިއްޔެ އިންސްޓަގްރާމްގައި ކޮސްޓާ ކުރި ޕޯސްޓެއްގައިވަނީ އޭނާ އަކީ ރާއްޖޭގެ ގައުމީ ފުޓްބޯޅަ ޓީމުގެ އެސިސްޓަންޓް ކޯޗުކަމަށް ބުނެފަ އެވެ. ކޮސްޓާ ބުނީ އޭނާ އަށް މި ފުރުސަތު ހޯދައިދޭން އެހީތެރިވި ހުރިހާ ފަރާތަކަށް ޝުކުރު އާދަކުރާ ކަމަށެެވެ.
"ރާއްޖޭގެ ފުޓްބޯޅަ އާއިލާ އިން އަހަންނަށް މަރުހަބާ ކިޔުމުން ފުޓްބޯޅަ އެސޯސިއޭޝަނާއި ރައީސް (ބައްސާމް) އަށް ޝުކުރު އަދާކުރަން. މޮރިއޭރޯ (ގައުމީ ކޯޗު) އަހަންނަށް ކުރި އިތުބާރާއި މި ޕްރޮޖެކްޓްގައި އަހަރެންގެ ތަޖުރިބާގެ ބޭނުންހިފައި ބައިވެރިވުމުގެ ފުރުސަތު ދިނީތީ ޝުކުރުވެރިވަން،" ކޮސްޓާ ބުންޏެވެ.
ގައުމީ ޓީމުގެ ކޯޗު މޮރިއޭރޯ (ކ) އާއި އެފްއޭއެމްގެ ރައީސް ބައްސާމް އަދީލް ޖަލީލް.-- ފޮޓޯ: އެފްއޭއެމް
އެފްއޭއެމުން ބުނީ މޮރިއޭރޯގެ އެސިސްޓަންޓެއްގެ ގޮތުގައި ކޮސްޓާގެ ކޮންޓްރެކްޓް ފައިނަލް ކުރުމުގެ މަސައްކަތް ކުރަމުން އަންނަ ކަމަށެވެ. އަދި ކޮސްޓާގެ އިތުރުން މިހާރު ގައުމީ ޓީމުގެ އެސިސްޓަންޓް ކޯޗަކަށް ހުރި އަލީ ސުޒޭން ވެސް ޓީމާ އެކު ހުންނާނެ ކަމަށެވެ.
ގައުމީ ޓީމާ އެކު މޮރިއޭރޯ ކޮންޓްރެކްޓް ހެދީ މިދިޔަ އޮކްޓޫބަރު މަހު 21 ވަނަ ދުވަހު އެވެ. ޓީމާ އެކު ޕްރެކްޓިސް ފެށީ އޮކްޓޫބަރު 25 ގަ އެވެ. މޮރިއޭރޯގެ ކޯޗުކަމުގައި ރާއްޖޭން ސްރީ ލަންކާގައި މިދިޔަ މަހު 8 އިން 19 އަށް ކުރިއަށްދިޔަ ފޯ ނޭޝަންސް ކަޕްގައި ރާއްޖޭން ވާދަކުރި އެވެ.
ލަންކާ ބޮޑުވަޒީރު ރާޖަޕަކްސަ ޓްރޮފީ އަށް ހާއްސަ ފޯ ނޭޝަންސް މުބާރާތުގެ ފުރަތަމަ މެޗުން ރާއްޖެ ވަނީ ހަތަރު ގޯލުގެ ލީޑެއްގައި އޮއްވައި ލަންކާއާ 4-4 އިން އެއްވަރުވެފަ އެވެ. ދެ ވަނަ މެޗުގެ ފަހު ވަގުތު ބަންގްލަދޭޝް އިން ޕެނަލްޓީއެއް ޖަހައި 18 އަހަރު ތެރޭ ފުރަތަމަ ފަހަރަށް ރާއްޖެ ބަލިކުރި އެވެ. އަދި ފަހު މެޗުގައި ރާއްޖެ ވަނީ ސީޝެލްސްއާ 0-0 އިން އެއްވަރުވެ، މޮޅެއް ނުލިބި މުބާރާތުން ކަޓައިފަ އެވެ.
އެ މުބާރާތުގައި ސީޝެލްސް މެޗަށް ފަހު އޮތް ނޫސްވެރިންގެ ބައްދަލުވުމުގައި މޮރިއޭރޯ ބުނީ އޭނާ ރާއްޖޭގެ ފުޓްބޯޅައިގެ ގިނަ ކަންކަން ބަލައި، ޕްރިމިއާ ލީގުގެ މެޗުތައް ދިރާސާކޮށް، ޓީމެއް އެކުލަވާލައިގެން ގައުމީ ޓީމުގެ ނަތީޖާތައް ރަނގަޅުކުރާނެ ކަމަށެވެ. މިހާރު ކުރިއަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތަކަށް ކްލަބްތަކުން ވާ ތައްޔާރީތަކާއި މެޗުތައް ބަލަން މޮރިއޭރޯ ދަނޑަށް ދެ އެވެ.
