ޕްރިސްޓީނާ، ކޮސޯވޯ (ޑިސެމްބަރު 21) - އަހަރަކު 17 މިލިއަން ޑޮލަރަށް ކޮސޯވޯގެ 300 ޖަލު ގޮޅި ޑެންމާކް އަށް ކުއްޔަށް ދޭން އެއްބަސްވެއްޖެ އެވެ.
ދެ ގައުމުން ގުޅިގެން ނެރުނު ބަޔާނެއްގައި ބުނީ ހޯމަ ދުވަހު އެއްބަސްވުމުގެ ފުރަތަމަ މަރުހަލާގައި ސޮއިކޮށްފައިވާ ކަމަށާއި މިއީ ފަސް އަހަރުގެ އެއްބަސްވުމެއް ކަމަށެވެ.
އެއްބަސްވުމުގައި ސޮއިކުރާ ފަހުން ވެސް، މުއްދަތު އިތުރު ކުރަން ދެ ގައުމުން ބޭނުން ނަމަ އެ ފުރުސަތު ލިބޭނެ ކަމަށް ބަޔާނުގައި ބުނެފައި ވެ އެވެ.
މިދިޔަ ހަފުތާގައި ޑެންމާކްގެ ސަރުކާރުން ބުނީ ކޮސޯވޯގެ ޖަލު ގޮޅިތަކުގައި ބަންދު ކުރާނީ ހުކުމް ތަންފީޒު ކުރުމަށް ފަހު ޑީޕޯޓް ކުރަން ތައްޔާރަށް ތިބި އެހެން ގައުމުތަކުގެ ރައްޔިތުން ކަމަށެވެ.
ޑެންމާކްގެ ޖަލުތަކަށް ވަނީ ތޮއްޖެހުމުގެ މައްސަލަ ދިމާވެފަ އެވެ. އެގޮތުން 2015 ވަނަ އަހަރުން ފެށިގެން ގައިދީންގެ އަދަދު 20 ޕަސެންޓު އިތުރުވި އެވެ. ނަމަވެސް ޖަލު ގާޑުންގެ އަދަދު 20 ޕަސެންޓުން ދަށްވި އެވެ.
ކޮސޯވޯއާ އެކު ސޮއިކުރި އެއްބަސްވުމުގެ ދަށުން ޑެންމާކްގެ ގައިދީން ބައިތިއްބާނީ ޖިލަން އަވަށުގެ ޖަލެއްގައި 2023 ވަނަ އަހަރުން ފެށިގެންނެވެ. އެއީ ކޮސޯވޯގެ ވެރޮރަށް ޕްރިސްޓީނާއާ 50 ކިލޯމީޓަރު ދުރުގައި އޮންނަ އަވަށެކެވެ.
"މިއީ ވަރަށް މުހިއްމު އެއްބަސްވުމެއް. މީގެ ސަބަބުން އަޅުގަނޑުމެންގެ ޖަލުތަކުގައި ޖާގަ އުފެދި، ޖަލު އޮފިސަރުންނަށް ޕްރެޝަރު ކުޑަވާނެ،" ޑެންމާކްގެ ޖަސްޓިސް މިނިސްޓަރު ނިކް ހެކެރަޕް ނެރުއްވި ބަޔާނެއްގައި ވިދާޅުވި އެވެ.
ކޮސޯވޯގެ ޖަސްޓިސް މިނިސްޓަރު އަލްބުލޭނާ ހަޒިއު ވިދާޅުވީ އެ ގައުމުގައި ހުސްކޮށް ހުރި 700 އާއި 800 އާ ދެމެދުގެ ޖާގަ ޖަލުތަކުގައި އެބަ ހުރި ކަމަށެވެ. ކޮސޯވޯގެ ޖަލު ގޮޅިތަކުގައި ޑެންމާކްގެ ގައިދީން ތިބޭއިރު، އަމަލު ކުރާނީ ޑެންމާކްގެ ގާނޫނުތަކަށް ކަމަށް ވެސް އޭނާ ވިދާޅުވި އެވެ.
ވިހި ވިހި ވަނަ އަހަރު ހުކުމް ތަންފީޒުކޮށް ނިމިފައި ތިބި 350 ގައިދީން ޑެންމާކްގެ ޖަލުތަކުގައި އެބަ ތިއްބެވެ. އެ މީހުންނަކީ ގައުމަށް ޑީޕޯޓް ކުރެވެންދެން ބަންދުކޮށްފައި ތިބި މީހުންނެވެ.
މީގެ ކުރިން ނޯވޭ އާއި ބެލްޖިއަމް އިން ވަނީ ނެދަލޭންޑްސްގެ ޖަލު ގޮޅިތަކެއް ކުއްޔަށް ހިފާފަ އެވެ.
